រាជធានីភ្នំពេញ ៖ សមាគមអ្នកសាងសង់កម្ពុជា តែងតែរៀបចំឲ្យមានការជួបជុំរវាងសមាជិកទាំងអស់ ដើម្បីបង្កើនទំនាក់ទំនងក្នុងគោលបំណងជំរុញការធ្វើអាជីវកម្មទៅវិញទៅមកនៃសមាជិកនៅក្នុងសមាគម ដែលសព្វថ្ងៃមានប្រមាណ១១០ក្រុមហ៊ុន ។
ថ្លែងក្នុងពិធីជួបជុំរវាងសមាជិកនៃសមាគម អ្នកសាងសង់កម្ពុជានៅសណ្ឋាគាររ៉ាហ្វល់ ឡឺរ៉ូយ៉ាល់ កាលពីថ្ងៃទី២៩ កញ្ញា កន្លងទៅ លោក ឆារស៍ វ៉ាន់ តំណាងអ្នកឧកញ៉ាពុង ឃាវសែ ប្រធានសមាគមអ្នកសាងសង់កម្ពុជា បានមានប្រសាសន៍ថា ការបង្កើតកម្មវិធីជួបជុំសំណេះសំណាល និងទំនាក់ទំនងធុរកិច្ចនេះឡើង ដើម្បីផ្ដល់ឱកាសជូនដល់សមាជិករបស់សមាគមបានជួបជុំពិភាក្សាគ្នា និងធ្វើទំនាក់ទំនងជាមួយគ្នា ជួយផ្ដល់ការងារ ឬគម្រោងសាងសង់ឲ្យគ្នាជួយទិញ ជួយលក់ផលិតផល សម្ភារ ឧបករណ៍ និងគ្រឿងចក្រសំណង់ដែលមានតម្លៃថោកជាងតម្លៃទីផ្សារ។ មិនត្រឹមតែប៉ុណ្ណោះ ជារៀងរាល់ចុងឆ្នាំ សមាគមតែងតែរៀបចំកម្មវិធីតាំងពិព័រណ៍ ឧស្សាហកម្ម សំណង់ កម្ពុជា ដែលបង្ហាញផលិតផលប្រមាណ១០០ប្រភេទ មកពីបណ្ដាប្រទេសនានានៅលើពិភពលោក ។ ពិធីពិព័រណ៍នេះដែរ ក៏ត្រូវបានរៀបចំដើម្បីបង្កើតកម្មវិធីនិងផ្ដល់ឱកាសឱ្យសមាជិកសមាគមទាំងអស់បានដាក់តាំងបង្ហាញ និងលក់ផលិតផលដូចជា សមា្ភរ ឧបករណ៍ គ្រឿងចក្រសំណង់ គម្រោងសាងសង់ផ្ទះសម្បែង ការបង្ហាញពីបច្ចេកទេសសាងសង់ទំនើបៗ និងដំឡើងប្រព័ន្ធទឹក អគ្គិសនី ម៉ាស៊ីនត្រជាក់ កាមេរ៉ា សុវត្ថិភាព និងសេវាកម្មដែលពាក់ព័ន្ធនឹងវិស័យសំណង់ជាច្រើនប្រភេទដូចជា ធានារ៉ាប់រង និងធនាគារ ដើម្បីធ្វើការខ្ចីប្រាក់សម្រាប់កិច្ចការទិញ និងលក់ផ្ទះ និងកិច្ចការវិនិយោគសាងសង់ជាដើម ។
លោកបន្តថា ចំពោះកិច្ចសហប្រតិបត្តិការ របស់សមាគមជាមួយស្ថាប័នផ្សេងៗទាំងថ្នាក់ជាតិ និងអន្តរជាតិ គឺយើងបានប្រតិបត្តិការយ៉ាងល្អប្រសើរ និងមានភាពទូលំទូលាយ ដោយស្ថាប័នទាំងនោះ មានភាពជឿជាក់ និងមានការកោតសរសើរដល់សមាគម និងស្នើសុំ ការសហការឱ្យចូលរួមចំណែកលើកិច្ចការផ្សេងៗ ដូចជា កន្លងមកមានការផ្ដល់យោបល់លើឯកសារគតិយត្ត និងច្បាប់ផ្សេងៗពាក់ពន្ធ័នឹងវិស័យសំណង់ ហើយកិច្ចការនេះ គឺត្រូវបានលើកមតិឡើងដោយតំណាងសមាគមអ្នកសាងសង់កម្ពុជា ក្នុងកម្មវិធីវេទិកាសាធារណៈលើវិស័យឯកជន នៅទីស្ដីការគណៈរដ្ឋមន្ត្រី ហើយមានការគាំទ្រពីស្ថាប័នរដ្ឋ និងប្រមុខរាជរដ្ឋាភិបាលផងដែរ ។
លោកក៏បានសូមអំពាវនាវឱ្យសមាជិកសមាគមទាំងអស់មេត្តាជួយបន្តនូវកិច្ចសហការផ្លាស់ប្តូរយោបល់ និងធ្វើការទំនាក់ទំនងធុរកិច្ច ជាមួយគ្នាឲ្យបានជិតស្និទ្ធ និងល្អប្រសើរថែម ទៀត ដើម្បីទទួលបានជោគជ័យ និងផលប្រយោជន៍ដល់ក្រុមហ៊ុនគ្រប់ៗគ្នា ហើយសូមជួយទិញ រឺលក់ផលិតផល រឺផ្ដល់គម្រោងផ្សេងៗ ក្នុងតម្លៃសមរម្យជូនគ្នាទៅវិញទៅមក ។
គួរបញ្ជាក់ថា ប្រភេទក្រុមហ៊ុន ដែលជាសមាជិករបស់សមាគមអ្នកសាងសង់កម្ពុជា រួមមានក្រុមហ៊ុនប្រកបអាជីវកម្មសិក្សាគម្រោងប្លង់ ក្រុមហ៊ុនសាងសង់គ្រប់ប្រភេទ ក្រុមហ៊ុនលក់សម្ភារ បរិក្ខារ ឧបករណ៍ គ្រឿងចក្រសំណង់គ្រប់ប្រភេទ ក្រុមហ៊ុនអចលនទ្រព្យ រោងចក្រផលិតបេតុង ក្រុមហ៊ុនដំឡើងប្រពន្ធ័អគ្គិសនី ទឹក ម៉ាស៊ីនត្រជាក់ ក្រុមហ៊ុនធានារ៉ាប់រង ក្រុមហ៊ុនដឹកជញ្ជូនសម្ភារសំណង់ ក្រុមហ៊ុនធ្វើពិសោធន៍ដី ក្រុមហ៊ុនធ្វើសសរគ្រឹះ និងគ្រឹះក្រុមហ៊ុនសេវាកម្ម និងលក់អចលនទ្រព្យ ផ្ទះសម្បែង ដីធ្លី និងក្រុមហ៊ុនពាក់ពន្ធ័នឹងឧបសម្ពន្ធ័សំណង់ជាច្រើនផ្សេងទៀត ៕
ចែករំលែកព័តមាននេះ