ខេត្តប៉ៃលិន ៖ បុរសម្នាក់ជាប្រជាការពារភូមិ បានរងរបួសយ៉ាងធ្ងន់ធ្ងរ បន្ទាប់ពីបាត់ខ្លួនអស់រយ:ពេល៣យប់៣ថ្ងៃ ហើយត្រូវបានអ្នកភូមិដើររក ក៏ប្រទះឃើញនៅលើភ្នំត្រប់ ដោយជនរងគ្រោះត្រូវបានដើមឈើ១ដើមធំ រលំសង្កត់ចំពីលើពាក់កណ្តាលខ្លួនផ្នែកខាងក្រោម ខណ:ជនរងគ្រោះឡើងទៅអារដើមឈើ…
ខេត្តប៉ៃលិន ៖ បុរសម្នាក់ជាប្រជាការពារភូមិ បានរងរបួសយ៉ាងធ្ងន់ធ្ងរ បន្ទាប់ពីបាត់ខ្លួនអស់រយ:ពេល៣យប់៣ថ្ងៃ ហើយត្រូវបានអ្នកភូមិដើររក ក៏ប្រទះឃើញនៅលើភ្នំត្រប់ ដោយជនរងគ្រោះត្រូវបានដើមឈើ១ដើមធំ រលំសង្កត់ចំពីលើពាក់កណ្តាលខ្លួនផ្នែកខាងក្រោម ខណ:ជនរងគ្រោះឡើងទៅអារដើមឈើ លុះគេចមិនទាន់ ក៏ត្រូវរលំសង្កត់ជាប់ម្នាក់ឯង ។ ក្រោយពេលក្រុមគ្រួសារ និងអ្នកភូមិដើររកឃើញ ក៏ប្រញាប់ដឹកបញ្ជូនទៅសង្គ្រោះនៅមន្ទីរពេទ្យ ប៉ុន្តែជាអកុសល ដោយសារស្ថានភាពរបួសធ្ងន់ធ្ងរពេក ជនរងគ្រោះបានស្លា.ប់បាត់បង់ជីវិតនៅមន្ទីរពេទ្យខេត្តបាត់ដំបង កាលពីវេលាម៉ោង១២រំលងអធ្រាត្រថ្ងៃទី១៨ ខែមេសា ឆ្នាំ២០២១ ។
តាមប្រភពព័ត៌មានពីអាជ្ញាធរមូលដ្ឋានបានឱ្យដឹងថា ៖ ជនរងគ្រោះមានឈ្មោះ ជិន ម៉ាលីន ភេទប្រុស អាយុ៣៩ឆ្នាំ ជាប្រជាការពារភូមិ មានកូន៣នាក់ក្នុងបន្ទុក រស់នៅក្នុងភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
តាមប្រភពដដែលបានបន្តថា មុនពេលកើតហេតុ កាលពីថ្ងៃទី១៥ ខែមេសា ឆ្នាំ២០២១ គេឃើញជនរងគ្រោះខាងលើបានធ្វើដំណើរឡើងទៅលើភ្នំត្រប់ តែម្នាក់ឯង ស្ថិតក្នុងភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន ខេត្តប៉ៃលិន ដើម្បីអារឈើយកសង់ផ្ទះស្នាក់នៅជួបជុំប្រពន្ធកូន លុះចេញទៅតាំងពីព្រឹកព្រលឹម រហូតដល់ពេលល្ងាច ក៏បាត់ខ្លួន ដោយមិនឃើញត្រឡប់មកវិញ ទើបនាំគ្នាទូរស័ព្ទទៅសួរនាំជនរងគ្រោះ ដោយទូរស័ព្ទចូលដែរ តែគ្មានអ្នកទទួល ព្រោះជនរងគ្រោះទុកទូរស័ព្ទនៅឆ្ងាយពីខ្លួន ។
តាមប្រភពដដែលបានបន្តទៀតថា ដោយមិនអស់ចិត្ត ប្រពន្ធជនរងគ្រោះចេះតែទាក់ទងប្តីម្តងហើយម្តងទៀត រាប់សិបដង នៅតែគ្មានអ្នកទទួល ទើបធ្វើឱ្យម្នាក់ៗមានការព្រួយបារម្ភកាន់តែខ្លាំងឡើងៗ រហូតដល់ទូរស័ព្ទជនរងគ្រោះអស់ថ្ម ក៏ទាក់ទងលែងចូល ទើបប្រពន្ធជនរងគ្រោះក៏ទៅពឹងពាក់អ្នកភូមិ ឱ្យជួយដើររកនៅលើភ្នំ អស់រយ:ពេលបីថ្ងៃ គឺរហូតមកដល់ថ្ងៃទី១៧ ខែមេសា ឆ្នាំ២០២១ ទើបនាំគ្នាចូលទៅក្នុងព្រៃជ្រៅ ក៏ប្រទះឃើញដើមឈើ១ដើមធំ សង្កត់ពីលើចំពាក់កណ្តាលខ្លួន គួរឱ្យអាសូរជាពន់ពេក ។ ភ្លាមៗ នោះ អ្នកភូមិប្រញាប់សែងជនរងគ្រោះចេញពីក្នុងព្រៃជ្រៅដឹកយកទៅមន្ទីរពេទ្យបង្អែកខេត្តប៉ៃលិន តែដោយសាររបួសធ្ងន់ធ្ងរពេក ក៏បញ្ជូនទៅមន្ទីរពេទ្យខេត្តបាត់ដំបង ដោយសម្រាកព្យាបាលនៅទីនោះ បានត្រឹមតែរយ:ពេល២ថ្ងៃ ក៏ស្លា.ប់បាត់បង់ជីវិតតែម្តង ។
បច្ចុប្បន្ន ស.ពជនរងគ្រោះខាងលើ ត្រូវបានគេដឹកតាមរថយន្តយកទៅផ្ទះវិញ ដើម្បីរៀបចំធ្វើបុណ្យតាមប្រពៃណី ៕
ចែករំលែកព័តមាននេះ