រាជធានីភ្នំពេញ ៖ រថយន្តមួយគ្រឿងម៉ាកម៉ាស្តា ពណ៌ខ្មៅ ពាក់ស្លាកលេខពាក់ស្លាកលេខ ភ្នំពេញ 2AB 8801 អ្នកបើកបរស្រវឹងជោកជាំបើករថយន្តលឿនរេពេញផ្លូវជ្រុលទៅបុករះពីក្រោយម៉ូតូពីរគ្រឿងបណ្តាលឲ្យស្លាប់៣នាក់ និងរបួសធ្ងន់ម្នាក់ កាលពីវេលាម៉ោង១ និង១៥នាទីរំលងអធ្រាត្រ ឈានចូលថ្ងៃទី៤ តុលា ស្ថិតនៅតាមបណ្តោយផ្លូវលេខ1986 មុខភោជនីយដ្ឋាន 36ឆ្នាំងទិព្វ ស្ថិតក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។
ក្នុងហេតុការណ៍នោះធ្វើឱ្យរថយន្តបង្កម៉ាកម៉ាស្តារងការខូចខាតស្ទើរទាំងស្រុង។ អ្នកបើកបររថយន្តមានឈ្មោះ ទុំ សម្បត្តិ ភេទប្រុស អាយុ២៣ឆ្នាំ មុខរបរជាយោធា មានទីលំនៅភូមិទឹកថ្លា សង្កាត់ទឹកថ្លា ខណ្ឌសែនសុខ និងអ្នករួមដំណើរម្នាក់ទៀតត្រូវបានប្រជាពលរដ្ឋវាយមួយដៃមួយជើងម្នាក់រងរបួសធ្ងន់ត្រូវបានគេបញ្ជូនទៅគ្លីនិកឯកជន ។
ចំណែកម៉ូតូរងគ្រោះទីមួយ ម៉ាកហុងដាឌ្រីម ស៊េរីឆ្នាំ2013 ពណ៌ខ្មៅ ពាក់ស្លាកលេខ ភ្នំពេញ1BU 0906 ជិះគ្នា2នាក់ ស្លាប់ទាំង2នាក់ មានឈ្មោះ សយ តុល ភេទប្រុស អាយុ៣៧ឆ្នាំ មុខរបរជាងជួសជុលម៉ូតូ ស្នាក់នៅភូមិប៉ប្រ៉កខាងត្បូង សង្កាត់កាកាប ខណ្ឌពោធិ៍សែនជ័យ មានស្រុកកំណើតនៅភូមិភ្លង ឃុំប្រសាទ ស្រុកកំពុងត្របែក ខេត្តព្រៃវែង និងឈ្មោះ អុល សំណាង ភេទប្រុស អាយុ២៥ឆ្នាំ មុខរបរកម្មកររោងចក្រ មានទីលំនៅភូមិប៉ប្រ៉កខាងត្បូង សង្កាត់កាកាប ខណ្ឌពោធិ៍សែនជ័យ និងម៉ូតូមួយគ្រឿងទៀតម៉ាកហុងដាឌ្រីម ប្រើប៊ិច ស៊េរីឆ្នាំ2012 ពណ៍ខ្មៅ ពាក់ស្លាកលេខភ្នំពេញ 1BG 6776 ជិះគ្នា២នាក់ ស្លាប់ម្នាក់ មាន
ឈ្មោះ ហេង តុប ភេទប្រុស អាយុ៣៧ឆ្នាំ មុខរបរជាងជួសជុលរថយន្ត មានទីលំនៅភូមិត្រពាំងសាលា សង្កាត់ពងទឹក ខណ្ឌដង្កោ និងម្នាក់ទៀតរួមដំណើរជាមួយរងរបួសធ្ងន់មិនត្រូវបានគេស្គាល់ឈ្មោះកំពុងសំរាកព្យាបាលនៅមន្ទីពេទ្យឯកជន ។
ប្រភពព័ត៌មានពីមិត្តភក្តិរួមដំណើរមួយគ្នាដែលមិនមានរងរបួសបានឲ្យដឹងថា នៅថ្ងៃកើតហេតុប្អូនស្រីរបស់ឈ្មោះ ហេង តុប បានស្លាប់ហើយទើបនឹងបូជារួចថ្មីធ្វើឲ្យគេមានទឹកមុខស្រងូតស្រងាត់ ឃើញបែបនេះមិត្តភក្កិបានណាត់គ្នាហើយហៅហេង តុប ទៅផឹកស៊ីដើម្បីបំបាត់ទុក្ខ បែរជាជួបគ្រោះថ្នាក់អកុសលរហូតបាត់បង់ជីវិតទៅវិញ ។
ប្រភពដដែលបន្តទៀតថា មុនពេលកើតហេតុពួកគេមានគ្នា៦នាក់ ជិះម៉ូតូ៣គ្រឿង មានម៉ាកណៃហត និងហុងដាឌ្រីម២គ្រឿង ដែលម៉ូតូមួយគ្រឿងជិះគ្នា២នាក់ បានណាត់គ្នាផឹកស៊ី លុះផឹកស៊ីស្រវឹងស្រឿងក៏នាំគ្នាទៅហូបបរសនៅហាងតាយតាយដែលមានទីតាំងក្បែរកន្លែងកើតហេតុខាងលើ ខណៈពេលហូបបបរសរួចហើយពួកគេបានជិះម៉ូតូ៣គ្រឿងគោលបំណងត្រឡប់ទៅផ្ទះវិញតាមផ្លូវលេខ1986ក្នុងទិសដៅពីកើតទៅលិច គឺបានជិះបន្តបន្តាប់គ្នា ដោយម៉ូតូណៃហ៊តជិះខាងមុខគេ ហើយម៉ូតូសង់ប៊ិចជិះប្រលោះកណ្តាល និងម៉ូតូហុងដា ឌ្រីម ស៊េរី២០១៣ ជិះខាងក្រោយគេ លុះមកដល់ចំណុចកើតហេតុស្រាប់តែមានរថយន្តបង្កជិះគ្នា២នាក់ក្នុងស្ថានភាពស្រវឹងជោកជាំបើកលឿនហើយរេពេញផ្លូវប៉ះគេប៉ះឯងតាំងពីស្តុប៥៩៨មកម្ល៉េះ បានបើកលឿនដូចហោះទៅបុកពីក្រោយម៉ុតូហុងដាឌ្រីមស៊េរី២០១៣ ពេញទំហឹងខ្ទាតអ្នកជិះលើម៉ូតូ២នាក់ធ្លាក់ពីលើម៉ូតូមកខាងឆ្វេង ម្នាក់ធ្លាក់មកខាងស្តាំបោកក្បាលស្លាប់ភ្លាមៗនៅនឹងកន្លែងកើតហេតុទាំង២នាក់ ។
បន្ទាប់ពីបុកមនុស្សស្លាប់រួចរថយន្តបង្កនៅមិនទាន់អស់ល្បឿនបានបន្តទៅបុកពីក្រោយម៉ូតូសង់ប៊ិចជិះគ្នា២នាក់ពេញទំហឹងទៀតដោយបុកជាប់ម៉ូតូពីមុខរថយន្តផ្លោងអ្នកជិះម៉ូតូទាំង២នាក់បោកនឹងកញ្ចក់រថយន្តផ្ទាំងខាងមុខធ្លាក់រដូករណែលរងរបួសធ្ងន់ទាំង២នាក់ ត្រូវបានរថយន្តសង្គ្រោះគ្លីនិកឯកជនដឹកយកទៅព្យាបាលនៅមន្ទីរពេទ្យកាល់ម៉ែត ម្នាក់បានស្លាប់តាមផ្លូវ និងម្នាក់ទៀតរងរបួសធ្ងន់កំពុងសម្រាកព្យាបាលនៅគ្លីនិកឯកជន រីឯរថយន្តបង្កបានបន្តអូសម៉ូតូជាប់ពីមុខរថយន្តជិត១០០ម៉ែត្របើកទៅដល់មុខខារ៉ាអូខេឌីយ៉ាម៉ង់ទើបរថយន្តទៅមុខលែងរួច ត្រូវប្រជាពលរដ្ឋដែលធ្វើដំណើរតាមផ្លូវព័ទ្ធរថយន្តជុំវិញហើយយកដុំថ្មគប់ទៅលើរថយន្តបង្កបណ្តាលឱ្យបែកកញ្ចក់ទ្វារឆ្វេង ស្តាំ និងផ្ទាំងកញ្ចក់មុខក្រោយរងខូចខាតទាំងស្រុង ខ្ទាតដុំថ្មត្រូវអ្នកជិះក្នុងរថយន្តម្នាក់រងរបួធ្ងន់ត្រូវបានបញ្ជូនទៅសង្គ្រោះនៅគ្លីនិកឯកជន។
ចំណែកឯអ្នកបើកបរមិនមានរងរបួសត្រូវបានសមត្ថកិច្ចឃាត់ខ្លួនយកទៅអធិការដ្ឋានខណ្ឌសែនសុខដើម្បីបញ្ចៀសពីកំហឹងរបស់ប្រជាពលរដ្ឋ ។ ដោយឡែកម៉ូតូណៃហ៊តដែលបើកនៅខាងមុខគេពេលដែលឃើញរថយន្តបុករះម៉ូតូ២គ្រឿងបែបនេះធ្វើឲ្យគេភ័យស្លន់ស្លោបានរេចង្កូតទៅបុកខឿនចិញ្ចើមផ្លូវនៅខាងស្តាំដៃតែមិនបណ្តាលឲ្យដួលរងរបួសទេ ។
ក្រោយពេលកើតហេតុរថយន្តបង្ក និងម៉ូតូរងគ្រោះ២គ្រឿងរួមជាមួយអ្នកបើករថយន្តបង្កត្រូវបានសមត្ថកិច្ចបញ្ជូនទៅការិយាល័យនគរបាលចរាចរណ៍ផ្លូវគោករង់ចាំដោះស្រាយតាមផ្លូវច្បាប់ ។ ចំណែកសពត្រូវបានសមត្ថកិច្ចប្រគល់ឲ្យសាច់ញាតិយកទៅធ្វើបុណ្យតាមប្រពៃណីរៀងខ្លួន ៕
ចែករំលែកព័តមាននេះ