ខេត្តកំពង់ចាម ៖ មេខ្លោងជួញដូរគ្រឿងញៀនម្នាក់ និងបក្ខពួក៣នាក់ទៀតត្រូវបានកម្លាំងសមត្ថកិច្ចតាមប្រមាញ់ និងចាប់ខ្លួនបានជាបន្តបន្ទាប់កាលពីវេលាម៉ោង៦ល្ងាច ថ្ងៃទី១ តុលា ២០១៥ ព្រមទាំងដកហូតបានថ្នាំញៀនចំនួន៥កញ្ចប់ ក្នុងនោះធំ៣កញ្ចប់ និងតូច២កញ្ចប់ ជញ្ជឹងថ្លឹងគ្រឿងញៀន១ ម៉ូតូ៣គ្រឿង ទូរស័ព្ទដៃ២គ្រឿង និងកាំភ្លើង៣ដើមផងដែរ ។
នាយការិយាល័យប្រឆាំងគ្រឿងញៀនខេត្ត លោកវរសេនីយ៍ទោ សោម រស់ ប្រាប់ឲ្យដឹងថា ជនសង្ស័យដែលត្រូវបានចាប់ខ្លួនទាំង៤នាក់នោះមាន ១-ឈ្មោះ ស៊ិន ចិត្រា ភេទប្រុស អាយុ២៥ឆ្នាំ នៅភូមិអណ្តូងច្រុះ ឃុំអំពិល ស្រុកកំពង់សៀម, ២-ឈ្មោះ ហួត ថៃ ហៅម៉ាប់ថៃ ភេទប្រុស អាយុ២៥ឆ្នាំ នៅភូមិទី៤ សង្កាត់វាល់វង់ ក្រុងកំពង់ចាម ជាមេខ្លោងជួញដូរគ្រឿងញៀន, ៣-ឈ្មោះ លី រតនៈ ភេទប្រុស អាយុ២១ឆ្នាំ នៅភូមិអំពិលលើ ឃុំអំពិល ស្រុកកំពង់សៀម និង ៤-ឈ្មោះ ប៉ុន រ៉ានី ភេទស្រី អាយុ១៩ឆ្នាំ នៅភូមិអំពិលលើ ឃុំអំពិល ។
លោកនាយការិយាល័យប្រឆាំងគ្រឿងញៀនខេត្តបន្តឲ្យដឹងទៀតថា លោកស្នងការនគរបាលខេត្តបានដាក់ផែនការឱ្យតាមចាប់ខ្លួនក្រុមជួញដូរគ្រឿងញៀន ដែលស្ថិតនៅក្នុងបញ្ជីខ្មៅរបស់សមត្ថកិច្ច ។ ក្រោយពីតាមដានដឹងមុខសញ្ញាប្រើប្រាស់គ្រឿងញៀននោះ នៅរសៀលថ្ងៃទី១ តុលា សមត្ថកិច្ចបានប្រើប្រាស់វិធីញុះញង់ណាត់ទិញថ្នាំញៀន១កញ្ចប់តម្លៃ៥ម៉ឺនរៀលពីឈ្មោះ រតនៈ នៅក្បែរច្រកចូលវត្តនគរបាជ័យ ស្រុកកំពង់សៀម ស្របពេលដែលប្រគល់ថ្នាំញៀននោះក៏ត្រូវបានចាប់ខ្លួនតែម្តង ។ ដោយទទួលបានចម្លើយសារភាពពីជនសង្ស័យ ទើបសមត្ថកិច្ចឈានទៅធ្វើការឡោមព័ទ្ធចាប់មេខ្លោង ឈ្មោះ ម៉ាប់ថៃ នៅក្នុងភូមិអំពិល ឃុំអំពិល បានចំនួន៣នាក់ ព្រមទាំងដកហូតបានថ្នាំញៀន និងវត្ថុតាងមួយចំនួន ។ ដែលប្រតិបត្តិការនេះដឹកនាំសម្របសម្រួលដោយលោក រៀល សុភិន ព្រះរាជអាជ្ញារងអមសាលាដំបូងខេត្ត ព្រមទាំងមានការចូលរួមពីអាជ្ញាធរមូលដ្ឋានផងដែរ ។
លោកវរសេនីយ៍ទោ សោម រស់ បញ្ជាក់ថា រហូតមកដល់រសៀលថ្ងៃទី២ តុលា ថ្នាំញៀនដែលដកហូតបានធ្វើតេស្តឃើញពិតជាប្រភេទមេតំហ្វេតាមីនពិតប្រាកដមែន និងបានកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់វិធានការតាមច្បាប់ និងតាមស្រាវជ្រាវចាប់បក្ខពួកបន្តទៀត ហើយមេខ្លោងជួញដូរថ្នាំញៀនខាងលើនេះ គឺធ្លាប់ជាប់គុក៤ដងហើយរួមទាំងលើកចុងក្រោយនេះ ៕
ចែករំលែកព័តមាននេះ