រាជធានីភ្នំពេញ ៖ សេចក្តីរាយការណ៍បានឱ្យដឹងថា បុរសអ្នកលក់ទឹកត្រីម្នាក់តូចចិត្តប្រពន្ធចុះចោលបាត់២ថ្ងៃបានសម្រេចចិត្តចង.កធ្វើអត្តឃាតនៅក្នុងបន្ទប់ជួលលេខ២៣ ស្ថិតក្នុងភូមិត្រពាំងទួល សង្កាត់កំបូល ខណ្ឌពោធិ៍សែនជ័យបង្កឱ្យមានការភ្ញាក់ផ្អើលកាលពីវេលាម៉ោង៩ព្រឹក ថ្ងៃទី២ តុលានេះ ។
អ្វីដែលគួរកត់សម្គាល់នោះ នៅលើខ្លួនសពគេឃើញរូបថតក្មេងប្រុសតូចម្នាក់ពាក់ជាប់.ក ដែលទំនងជាមុនពេលស្លាប់ជនរងគ្រោះបានយករូបថតនោះមកពាក់ជាប់.ករួចទើបចង.កសម្លាប់ខ្លួន។
សពមានឈ្មោះឃិត ច័ន្ទដារ៉ា ភេទប្រុស អាយុ២៨ឆ្នាំ ជាអ្នកលក់ទឹកត្រី មានស្រុកកំណើតនៅភូមិស្រម៉លើ ឃុំខ្វាវ ស្រុកទ្រាំង ខេត្តតាកែវ ចំណែកប្រពន្ធឈ្មោះទែន អាយុ២៤ឆ្នាំ មានកូនប្រុសម្នាក់អាយុ១ខួប។
ប្រភពបានឱ្យដឹងថា កាលពី២ថ្ងៃមុនជនរងគ្រោះមានទំនាស់គ្នាជាមួយប្រពន្ធ តែគេមិនដឹងថាជារឿងអ្វីទេ ហើយប្រពន្ធបានរត់ចោលបាត់២ថ្ងៃ លុះដល់ថ្ងៃកើតហេតុនេះ ម៉ូយទឹកត្រីអត់ឃើញជនរងគ្រោះទៅយកទឹកត្រីមកលក់ក៏ទូរស័ព្ទទៅសួរតែអត់មានអ្នកទទួល។
ក្រោយមកម៉ូយទឹកត្រីបានធ្វើដំណើរមកដល់បន្ទប់ជួលរបស់ជនរងគ្រោះហើយស្រែកហៅ តែមិនឭឆ្លើយ ដោយមានការសង្ស័យម៉ូយទឹកត្រីរូបនោះបានឡើងអើតមើលតាមប្រហោងខ្យល់ស្រាប់តែឃើញជនរងគ្រោះចង.កស្លាប់បាត់ទៅហើយ៕
ចែករំលែកព័តមាននេះ