ខេត្តព្រះសីហនុ ៖ បុរសម្នាក់បានស្លាប់នៅនឹងកន្លែង ខណៈពេលជិះម៉ូតូទៅបុករថយន្តដែលចតឈប់ស្ងៀមនៅលើកំណាត់ផ្លូវជាតិលេខ៣ កាលពីវេលាម៉ោង៨និង៤៥នាទីយប់ថ្ងៃទី១ តុលា ស្ថិតក្នុងភូមិបឹងវែង ឃុំវាលរេញ ស្រុកព្រៃនប់ ។
បុរសរងគ្រោះឈ្មោះ ជាន ចើយ អាយុ២៤ឆ្នាំ រស់នៅភូមិតាអោងធំ ឃុំសាមគ្គី ស្រុកព្រៃនប់ បានជិះម៉ូតូម៉ាកវ៉េវ ពណ៌ក្រហម ទិសដៅពីលិចទៅកើត លុះមកដល់ចំណុចកើតហេតុក៏បុករថយន្តធុនធំដែលចតឈប់ស្របទិស បណ្តាលឱ្យស្លាប់នៅនឹងកន្លែង ។ ចំណែករថយន្តមិនស្គាល់ម៉ាក ក្រោយកើតហេតុបានបញ្ឆេះរថយន្តបើកទៅមុខបាត់ស្រមោល ។
ប្រភពបានឱ្យដឹងថា មុនពេលកើតហេតុ បុរសរងគ្រោះបានដឹកប្រពន្ធពោះធំទៅសម្រាលកូននៅមន្ទីរពេទ្យវាលរេញ តែមិនទាន់សម្រាល ក៏ដឹកប្រពន្ធត្រឡប់ទៅផ្ទះវិញ ប៉ុន្តែភ្លេចថ្នាំបានបកទៅយកថ្នាំតែម្នាក់ឯងក៏ជួបគ្រោះថ្នាក់ស្លាប់តែម្តង ។
នៅព្រឹកម៉ោង៩ព្រឹកថ្ងៃទី២ តុលា នេះ លោក លូ គឹមឈន់ នាយកកំពង់ផែខេត្តព្រះសីហនុ បានចូលរួមរំលែកទុក្ខចំពោះក្រុមគ្រួសារ និងជួយរៀបចំចាត់ចែងស្ត្រីពោះធំឱ្យទៅមន្ទីរពេទ្យឆ្លងទន្លេ ៕
ចែករំលែកព័តមាននេះ