អ្នក​ពាក់ព័ន្ធ និង​អាជីវករ​ផ្សារ​ក្រោម​​ក្នុង​ក្រុង​សៀម​រាប ត្រូវ​ក្រុម​គ្រូពេទ្យ​ចុះ​យកសំណាក – Koh Santepheap Daily

ADផ្ទាំងផ្សព្វផ្សាយពាណិជ្ជកម្ម

Picture

អ្នក​ពាក់ព័ន្ធ និង​អាជីវករ​ផ្សារ​ក្រោម​​ក្នុង​ក្រុង​សៀម​រាប ត្រូវ​ក្រុម​គ្រូពេទ្យ​ចុះ​យកសំណាក

1 ខែ មុន
  • Siem Reap

ខេត្ត​សៀម​រា​ប ៖ ​ក្រុម​គ្រូពេទ្យ​នៃ​រដ្ឋបាល​ខេត្តសៀមរាប​បាន​ចុះ​ប្រតិបត្តិ​ការដោយ​មិន​កំណត់​ថ្ងៃ ដើម្បី​យក​វត្ថុ​សំណាក​វិភាគ នៃ​ពលរដ្ឋ​អ្នក​ពាក់ព័ន្ធ និង​ធ្លាប់​បាន​ចេញចូល​ផ្សារ​ក្រោម​នៃ​ក្រុង​សៀមរាប បន្ទាប់​ពី​បាន​រក​ឃើញ​វិជ្ជមាន​កូ​វី​ដ​១៩​ចំនួន​៥​នាក់ នៅ​ទីនោះ​ ។ ក្រុម​គ្រូពេទ្យ​នៃ​រដ្ឋបាល​ខេត្តសៀមរាប…

ខេត្ត​សៀម​រា​ប ៖ ​ក្រុម​គ្រូពេទ្យ​នៃ​រដ្ឋបាល​ខេត្តសៀមរាប​បាន​ចុះ​ប្រតិបត្តិ​ការដោយ​មិន​កំណត់​ថ្ងៃ ដើម្បី​យក​វត្ថុ​សំណាក​វិភាគ នៃ​ពលរដ្ឋ​អ្នក​ពាក់ព័ន្ធ និង​ធ្លាប់​បាន​ចេញចូល​ផ្សារ​ក្រោម​នៃ​ក្រុង​សៀមរាប បន្ទាប់​ពី​បាន​រក​ឃើញ​វិជ្ជមាន​កូ​វី​ដ​១៩​ចំនួន​៥​នាក់ នៅ​ទីនោះ​ ។

ក្រុម​គ្រូពេទ្យ​នៃ​រដ្ឋបាល​ខេត្តសៀមរាប ថ្ងៃ​ទី​១៤ ខែមេសា ឆ្នាំ​២០២១ បាន​ចេញ​ប្រតិបត្តិ​ការដ៏​ធំ​មួយ នៅ​តំបន់​ផ្សារក្រោម ក្នុងភូមិ​វិហារ​ចិន សង្កាត់​ស្វាយ​ដង្គំ ក្រុង​សៀមរាប ដែល​ក្នុង​នោះ អ្នក​ពាក់ព័ន្ធ​ និង​សង្ស័យ​មិន​ក្រោម​ពី១​ពាន់​នាក់​នោះ​ទេ ដែល​ត្រូវ​យក​វត្ថុ​សំណាក​ធ្វើតេស្ត​រក​វា​រ៉ុ​ស កូ​វី​ដ​-១៩ ។

បើ​តាម​លោក​វេជ្ជបណ្ឌិត ក្រុស សា​រ៉ាត់ ប្រធាន​មន្ទីរ​សុខាភិបាល​ខេត្តសៀមរាប មាន​ប្រសាសន៍​ឲ្យ​ដឹង​យ៉ាង​ដូច្នេះ​ថា ខណៈ​ពេល​ដែល​លោក​វត្ត​មាននៅ​ក្នុង​ប្រតិបត្តិ​ការណ៍​យក​សំណាក​ជន​ដែល​ដែល​ពាក់ព័ន្ធ​ទាំងនោះ ។ លោក​បាន​បញ្ជាក់​សារ​ជា​ថ្មី​ថា​ កាលពី​ថ្ងៃ​ទី​១២ ខែមេសា​កន្លង​ទៅ​នេះ នៅ​ក្នុង​ផ្សារ​ក្រោម បាន​រក​ឃើញ​អាជីវករ​ចំនួន​៥​នាក់ មាន​ផ្ទុក​វីរុស​កូ​វី​ដ​-១៩ ក្នុង​នោះ​៤​នាក់​រស់នៅ​ក្នុង​ចង្កោម​គ្រួសារ​តែ​មួយ និង​ម្នាក់​ទៀត​ជា​អ្នកលក់​បន្លែ ។

លោក​អំពាវនាវ​ថា សូម​ឲ្យ​អ្នក​ពាក់ព័ន្ធ​ទាំងអស់ ទាំង​ផ្ទាល់ ទាំង​ប្រ​យោ​ល និង​ធ្លាប់​ចេញចូល​ផ្សារ​ក្រោម ចាប់ពី​ថ្ងៃ​ទី​១៤ ខែមីនា​កន្លង​មក សូម​មក​សហ​ការណ៍​ជាមួយ​ក្រុមការងារ​ស្ម័គ្រចិត្ត មក​យក​សំណាក​ធ្វើតេស្ត​កុំបី​ខាន ដើម្បី​សុវត្ថិភាព​ក្នុង​សហគមន៍ ។

លោក​បន្ថែម​ថា ប្រតិបត្តិ​ការនេះ​មិន​កំណត់​ពេលវេលា​នោះ​ទេ គឺ​ក្រុមការងារ​នៅ​រង់ចាំ​ទទួល​សំណាក រហូត​ដល់​អស់អ្នក​ពាក់ព័ន្ធ ហើយ​លោក​ក៏​បាន​បញ្ជាក់​ដែរ​ថា កន្លង​មក​នៅ​ក្នុង​ព្រឹត្តិការណ៍​សហគមន៍​២០​កុម្ភៈ ខេត្តសៀមរាប​ធ្លាប់​បាន​បិទ​ផ្សារ ពីរ ទៅ បី កន្លែង​រួច​មក​ហើយ តែ​ការ​យក​សំណាក​ធ្វើតេស្ត ពុំ​រក​ឃើញ​វិជ្ជមាន​កូ​វី​ដ​-១៩​នោះ​ឡើយ ក៏​ប៉ុន្តែ​ព្រឹត្តិការ​ណ័​នៅ​ផ្សារ​ក្រោម​នេះ បាន​រក​ឃើញ​វិជ្ជមាន​លើ​អ្នក​ពាក់ព័ន្ធ​ចំនួន​៥​នាក់​រួច​ទៅ​ហើយ ហើយ​អ្នក​ពាក់ព័ន្ធ​និង​អ្នក​ដែល​មានការ​សង្ស័យ ត្រូវ​បន្ត​យក​សំណាក​នោះ មក​ពិនិត្យ​បន្ត​។

លោក​ប៉ាន់​ស្មានថា មិន​ក្រោម​១​ពាន់​នាក់​នោះ​ឡើយ ដោយសារ​តែ​ក្នុង​ក្រុម​គ្រួសារ​មួយ​ដែល​មាន​សមាជិក​៤​នាក់ រក​ឃើញ​ថា​វិជ្ជមាន​នោះ ពាក់ព័ន្ធ​នឹង​ការ​បិទ​ផ្សារ​វត្ត​អធ្វា​ផង​ដែរ ។ លោក ក្រុស សា​រ៉ាត់ បាន​ឲ្យ​ដឹង​ទៀត​ថា មន្ទីរពេទ្យ​បង្អែក​ខេត្ត​សៀមរាប មាន​មន្ទីរពិសោធន៍​ធ្វើតេស្ត​លើ​វត្ថុ​សំណាក​រក​វី​រុ​​ស​កូ​វី​ដ​-១៩ ដែល​មាន​សមត្ថភាព​ក្នុង​១​ថ្ងៃ អាច​វិភាគ​វត្ថុ​សំណាក​បាន​ចំនួន​២០០​វត្ថុ​សំណាក ។ បើ​គិត​អំពី​ស្ថានភាព​​ប្រមូល​វត្ថុ​សំណាក ​កាលពីថ្ងៃទី១២​ មេ​សា ​នៅ​ផ្សារ​ក្រោម សំណាក​មួយ​ចំនួន​ត្រូវ​បាន​វេច​ខ្ចប់​បញ្ជូន​ទៅ​ភ្នំពេញ ដើម្បី​ជួយ​សម្រាល​បន្ទុក​នៃ​ការ​វិភាគ​ឲ្យ​បាន​ទាន់​ពេលវេលា ។

គួរ​បញ្ជាក់​ដែរ​ថា នៅ​ក្នុង​ព្រឹត្តិការណ៍​សហគមន៍​២០​កុម្ភៈ មក​ដល់​ពេល​នេះ ខេត្តសៀមរាប​បាន​រក​ឃើញ​វិជ្ជមាន​កូ​វី​ដ​- ១៩​ចំនួន​១៧​ករណី ក្នុង​នោះ ៧​ករណី ជា​ការ​ចម្លង​នាំ​ចូល​ពី​ខេត្ត​ខាងក្រៅ និង​១០​ករណី​ទៀត ជា​ការ​ចម្លង​បន្ត​គ្នា​ដែល​ចេញ ពី​ការ​នាំ​ចូល​នោះ ។ ​ក្នុង​ចំណោម​អ្នកជម្ងឺ​ទាំង​១៧​នាក់​នោះ មាន​៣​នាក់​ហើយ ដែល​បាន​ទទួល​ការ​ព្យាបាល​ជា​សះ​ស្បើយ ចេញពី​មន្ទីរពេទ្យ​បង្អែក​ខេត្ត​សៀមរាប បាន​ត្រឡប់​ទៅ​ផ្ទះ​វិញ​៕​

Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture