រាជធានីភ្នំពេញ ៖ លោក ឌួង ឆាយ និងភរិយា នៅរសៀលថ្ងៃទី៣០ កញ្ញាម្សិលមិញ បាននាំថវិកាចំនួន៤លានរៀល ដើម្បីជួយឧបត្ថម្ភដល់មន្ទីរពេទ្យគន្ធបុប្ផា ដែលមានលោក Dr.Denis Laurent អនុប្រធានមូលនិធិមន្ទីរពេទ្យគន្ធបុប្ផា ជាអ្នកទទួលផ្ទាល់ ។
លោក ឌួង ឆាយ បានថ្លែងថា ដោយមើលឃើញមន្ទីរពេទ្យគន្ធបុប្ផាដែលមានលោកវេជ្ជបណ្ឌិត Beat Richner ជាប្រធាន និងជាស្ថាបនិកមន្ទីរពេទ្យគន្ធបុប្ផា មានការខ្វះខាតថវិកាដើម្បីជួយដល់កុមារក្នុងប្រទេសកម្ពុជា ដូច្នេះហើយលោកនិងភរិយាបានចំណាយធន់ធានផ្ទាល់ខ្លួន ដើម្បីចូលរួមកាត់បន្ថយការលំបាកខ្លះៗរបស់មន្ទីរពេទ្យ និងដើម្បីជួយទ្រទ្រង់ ការពិនិត្យព្យាបាលជំងឺដល់កុមារកម្ពុជាដែលមួយថ្ងៃៗ មកទទួលការព្យាបាលរាប់ពាន់នាក់ ។
លោក ឌួង ឆាយ បានបញ្ជាក់ថា ពីពេលនេះតទៅ មុននិងទិញរថយន្តទំនើប លោកនិងភរិយាត្រូវតែជួយដល់សង្គមលើវិស័យអប់រំនិងវិស័យសុខាភិបាលឱ្យបាន១០០.០០០ដុល្លារសិន ហើយលោកស្វាគមន៍ចំពោះការចូលរួមរបស់អ្នកទាំងអស់គ្នាតាមលទ្ធភាពទោះតិចក្តីច្រើនក្តី លោកសង្ឃឹមថាពូមីងបងប្អូននឹងគាំទ្រ ។
ក្នុងមួយឆ្នាំៗ មន្ទីរពេទ្យគន្ធបុប្ផា បានចំណាយថវិកា សម្រាប់ព្យាបាលកុមារកម្ពុជាដោយឥតគិតថ្លៃ ចំនួនប្រមាណពី៤២ទៅ៤៣លានដុល្លារអាមេរិក ។ បច្ចុប្បន្ននេះ មន្ទីរពេទ្យគន្ធបុប្ផាបានជួយព្យាបាលកុមារកម្ពុជាបាន១៤,៥លាននាក់មកហើយ ៕
ចែករំលែកព័តមាននេះ