ខេត្តក្រចេះ ៖ បើយោងតាមសេចក្តីជូនដំណឹងរបស់រដ្ឋបាលខេត្តក្រចេះ ស្តីពីការរកឃើញវិជ្ជមានជំងឺកូវីដ-១៩ កាលពីថ្ងៃទី១២ ខែមេសា ឆ្នាំ ២០២១នេះ នៅមណ្ឌលចត្តាឡីស័កមន្ទីរពេទ្យបង្អែកស្នួល ដែលជាការរកឃើញអ្នកកើតជំងឺកូវីដ-១៩ជាលើកដំបូងគេបង្អស់សំរាប់ខេត្តក្រចេះ ទៅលើកម្មការនីរោងចក្រ «ឌីនហាន»ម្នាក់ ។
ខ្លឹមសារនៃលិខិតជូនដំណឹងបានបញ្ជាក់ថា ៖ យោងតាមលទ្ធផលវិភាគសំណាក់ពីមន្ទីរពេទ្យព្រះកេតុមាលា បានបង្ហាញលទ្ធផលអ្នកវិជ្ជមានជំងីកូវីដ-១៩លើកដំបូង០១ករណី នៅក្នុងស្រុកស្នួល ខេត្តក្រចេះ លើឈ្មោះជុំ ចន្ធី ភេទស្រី អាយុ២៩ឆ្នាំ ជា
កម្មការនីរោងចក្រ«ឌីនហាន» មានទីលំនៅបច្ចុប្បន្នភូមិវាលបីចក្រីហេង ឃុំក្រញូងសែនជ័យ ស្រុកស្នួល ខេត្តក្រចេះ។
លិខិតនេះ បានបញ្ជាក់បន្តថា៖ ឈ្មោះ ជុំ ចន្ធី ដែលបានធ្វើដំណើរវិលត្រឡប់មកពីរាជធានីភ្នំពេញ មកដល់ភូមិវាលបីចក្រីហេង ឃុំក្រញូងសែនជ័យ ស្រុកស្នួល ខេត្តក្រចេះ កាលពីថ្ងៃទី០៣ ខែមេសា ឆ្នាំ ២០២១ ហើយត្រូវបានមន្ត្រីជំនាញសុខាភិបាល និងអាជ្ញាធរមូលដ្ឋានបានដាក់ឲ្យធ្វើចត្តាឡីស័កនៅផ្ទះ។ បន្ទាប់ពីទទួលបានព័ត៌មានថារោងចក្រឌីនហាន មានករណីផ្ទុះកូវីដ-១៩ មន្ត្រីជំនាញសុខាភិបាលនិងអាជ្ញាធរមូលដ្ឋានបានបញ្ជូនឈ្មោះ ជុំ ចន្ធី ទៅសម្រាកនៅមន្ទីរពេទ្យបង្អែកស្នួល។ លុះនៅថ្ងៃទី០៩ ខែមេសា ឆ្នាំ ២០២១ បុគ្គលនេះមានអាការៈក្តៅខ្លួន ក្អក និងឈឺបំពង់ក មន្ត្រីជំនាញសុខាភិបាលបានយកសំណាកទៅពិនិត្យតេស្តរកមេរោគ កូវីដ-១៩ ជាផទ្ធផលគឺវិជ្ជមានជំងឺកូវីដ-១៩។ បច្ចុប្បន្នអ្នកជំងឺរូបនេះត្រូវបានក្រុមគ្រូពេទ្យដាក់ឲ្យសម្រាកព្យាបាលនៅមន្ទីរពេទ្យបង្អែកស្នួល។
គួរបញ្ជាក់ថា៖ រដ្ឋបាលខេត្តក្រចេះបានអំពាវនាវជូនសាធារណជន និងបងប្អូនប្រជាពលរដ្ឋដែលបានពាក់ព័ន្ធដោយផ្ទាល់ ឬដោយប្រយោលជាមួយអ្នកវិជ្ជមានជំងឺកូវីដ-១៩ ខាងលើ សូមទៅជួបគ្រូពេទ្យជាបន្ទាន់ដើម្បីពិនិត្យសុខភាព និងយកសំណាក់តេស្តរកជំងឺកូវីដ-១៩ ។ ដោយ៖ ប៊ុន លីនណា
ចែករំលែកព័តមាននេះ