យោងតាមការវាយតម្លៃស្ថានភាពជាក់ស្តែង គឺមានពលរដ្ឋខ្មែរយើងមិនតិចទេដែលនៅតែមានការយល់ច្រឡំពីទំនៀមទម្លាប់ចូលឆ្នាំថ្មីប្រពៃណីជាតិខ្មែរដែលទាក់ទងទៅនឹងសត្វជាយានជំនិះបុត្រីទាំង៧អង្គរបស់កបិលមហាព្រហ្ម ដែលពួកគេតែងតែយល់ថា ទេពធីតារៀងរាល់ឆ្នាំក្នុងពិធីចូលឆ្នាំថ្មី ទេវតាឆ្នាំថ្មី ដែលនឹងយាងមកថែរក្សាមនុស្សលោកនេះនឹងជិះសត្វតំណាងឱ្យពង្សធាតុនៃសត្វតាមឆ្នាំនីមួយៗ ឧទាហរណ៍ៈ ទេវតាឆ្នាំថ្មី ឆ្នាំឆ្លូវ ត្រូវតែជិះគោ ជាយានជំនិះ ព្រោះតំណាងឆ្នាំទាំង១២គឺឆ្នាំឆ្លូវ មានសត្វគោជាតំណាងប្រចាំឆ្នាំនេះ ។
ការយល់ឃើញបែបនេះមិនទាន់ត្រឹមត្រូវទេ ព្រោះបុត្រីកបិលមហាព្រហ្មមានតែ៧អង្គ បើសិនជាមានយានជំនិះតាមពង្សធាតុឆ្នាំ ដែលមានសត្វទាំង១២ជាតំណាង តើត្រូវធ្វើដូចម្ដេចនឹងជិះអស់នោះ បើទេពធីតាមានតែ៧អង្គហ្នឹង ដូច្នេះមានន័យថា បុត្រីទាំង៧អង្គនៃកបិលមហាព្រហ្មមានយានជំនិះរៀងៗខ្លួន មិនមែនសត្វដែលជាពង្សធាតុទាំង១២នោះឡើយ ។
រីឯសង្ក្រាន្តឆ្នាំថ្មី ឆ្នាំឆ្លូវ ចូលចំថ្ងៃពុធ ៣កើត ខែពិសាខ ត្រូវនឹងថ្ងៃទី ១៤ មេសា គ.ស ២០២១ គឺត្រូវនឹងវេនទេពធីតាមួយព្រះអង្គ ជាបុត្រីទី៤ នៃកបិលមហាព្រហ្ម ដែលទ្រង់មាន គទ្រភៈ (សត្វលា) ជាពាហនៈ មិនមែនសត្វគោនោះទេ ។
ដើម្បីស្រាយចម្ងល់នេះឱ្យកាន់តែងាយយល់ស្រួលចាំ សូមធ្វើការពន្យល់ដូច្នេះថា សត្វទាំង១២ គឺតំណាងឱ្យពង្សធាតុមនុស្ស ដែលត្រូវកើតចំឆ្នាំណា ឧទាហរណ៍ៈ អ្នកកើតចំឆ្នាំឆ្លូវ គឺមានសត្វគោ ជាសត្វតំណាងឆ្នាំរបស់ខ្លួន, ឯទេវតាជាបុត្រីទាំង៧អង្គឯណោះវិញ គឺមានយានជំនិះផ្សេងៗពីគ្នា មិនមែនជាសត្វទាំង១២នៃពង្សធាតុមនុស្សនោះឡឺ ។
សូមខេមរជនគ្រប់រូបចងចាំអំពីយានជំនិះរបស់បុត្រីកបិលមហាព្រហ្មទាំង៧អង្គដូចតទៅ ១-ថ្ងៃអាទិត្យ ចំវេន បុត្រីទី១ ព្រះនាង ទុង្សទេវី មានសុបណ្ណរាជ ជា ពាហនៈ (ស្ដេចគ្រុឌ), ២-ថ្ងៃ ចន្ទ ចំវេន បុត្រីទី២ ព្រះនាង គោរាគទេវី មានព្យគ្ឃៈ ជាពាហនៈ (សត្វខ្លា), ៣-ថ្ងៃអង្គារ ចំវេន បុត្រីទី៣ ព្រះនាង គោរាក្សសាទេវី មានអស្សតរៈ (សត្វសេះ) ឬ សុករៈ (ជ្រូក) ជាពាហនៈ, ៤-ថ្ងៃពុធ ចំវេន បុត្រីទី៤ ព្រះនាង មណ្ឌាទេវី មានគទ្រភៈ ជាពាហនៈ (សត្វលា), ៥-ថ្ងៃព្រហស្បតិ៍ ចំវេន បុត្រីទី៥ ព្រះនាង កិរិណីទេវី មានគជសារ ជាពាហនៈ (សត្វដំរី), ៦-ថ្ងៃសុក្រ ចំវេន បុត្រីទី៦ ព្រះនាង កិមិរាទេវី មានមហិសារាជ ជាពាហនៈ (សត្វក្របី) និង៧-ថ្ងៃសៅរ៍ ចំវេន បុត្រីទី៧ ព្រះនាង មហោទរាទេវី មានមយូរា ជាពាហនៈ (ក្ងោក) ៕ សាន សារិន
ចែករំលែកព័តមាននេះ