ខេត្តរតនគិរី ៖ រោងល្បែងស៊ីសងគ្រប់ប្រភេទដ៍ធំមួយនៅក្នុងភូមិប៉ក់ធំ ឃុំប៉ក់ញ៉ៃ ស្រុកអូរយ៉ាដាវ ដែលទើបនឹងបង្កើតបានរយៈពេលជាងមួយខែ ដោយមានការត្រូវរ៉ូវគ្នាជាមួយអាជ្ញាធរដែនដីគ្រប់ជាន់ថ្នាក់ ធ្វើឲ្យប្រជាពលរដ្ឋ ជាពិសេសស្រ្តីមេផ្ទះមួួចំនួនធំ មានការក្តៅក្រហាយយ៉ាងខ្លំាងដោយសារប្តីយកកសិកផលទៅលក់នៅប្រទេសវៀតណាមចេញមកវិញចូលលេងល្បែងចាញ់ខ្ទេចខ្ទីអស់ ។
បើតាមសេចក្តីរាយការណ៍បានឲ្យដឹងថា រោងល្បែងមួយនេះចេញពីទីរួមខេត្តរតនគិរីចម្ងាយជាង៧០គីឡូម៉ែត្រ ស្ថិតនៅលើភ្នំតូច១ ហៅទួលសេវា ធ្វើរបងព័ទ្ឋជុំវិញនិងមានអ្នកយាមកាមយ៉ាងតឹងរឹង ។
រោងល្បែងស៊ីសងមួយនេះ គេសង្កេតឃើញមានលេងដូចជាយូគី បៀ អាប៉ោង និងល្បែងជល់មាន់ បើកលេងរៀងរាល់ថ្ងៃ ដោយមានអ្នកញៀនល្បែងចូលលេងក្នុងមួយថ្ងៃៗមិនក្រោម១០០នាក់នោះទេ ។
ប្រភពបានបន្តថា ភាគច្រើនអ្នកចូលលេងល្បែងជាជនជាតិខ្មែរ និងជនជាតិវៀតណាមមានតិចតួច ដែលឆ្លងដែនចូលមកលេង ។
ទាក់ទិនទៅនឹងរោងល្បែងស៊ីសងខាងលើនេះ តាមប្រភពពីមន្រ្តីរាជការតូចតាចក្នុងស្រុកអូរយ៉ាដាវបានលួចខ្សឹបថា ថៅកែរោងល្បែងនេះឈ្មោះ សាន ជាអ្នកមានទ្រព្យសម្បត្តិរស់នៅរាជធានីភ្នំពេញ ។
ព័ត៌មានលម្អិតនឹងមានផ្សាយជូននៅលើសារព័ត៌មានកោះសន្តិភាព ៕
ចែករំលែកព័តមាននេះ