ខេត្តព្រះសីហនុ៖ ចៅហ្វាយខេត្តព្រះសីហនុ លោក គួច ចំរើន​ កំពុងពិចារណា ឱ្យអ្នកចាក់វ៉ាក់សាំងបង្ការជំងឺកូវីដ១៩រួច​ អាចចេញចូល​ខេត្តព្រះសីហនុបាន។

លោក គួច ចំរើន បានលើកឡើងថា «រដ្ឋបាលខេត្តព្រះសីហនុ កំពុងពិចារណា ផ្តល់ការអនុញ្ញាតជូនចំពោះតែអ្នក ដែលបានចាក់វ៉ាក់សាំងការពារជំងឺកូវីដ-១៩ ចំនួនពីរលើករួចរាល់ និងមានភាពចាំបាច់ ត្រូវ​ធ្វើដំណើរចេញចូលក្នុងខេត្តព្រះសីហនុតែប៉ុណ្ណោះ នៅក្រោយ​ពេលបម្រាមធ្វើដំណើរឆ្លងខេត្តរបស់រាជរដ្ឋាភិបាល​បានបញ្ចប់»​។

បំណងដូច្នេះ​ ត្រូវ​បាន​បង្ហោះ​តាមហ្វេសប៊ុក​របស់រដ្ឋបាលខេត្តព្រះសីហនុ ​នៅថ្ងៃទី៨ ខែមេសា ឆ្នាំ២០២១​។​

គួររម្លឹកថា ខេត្តព្រះសីហនុ បានបិទ​ចរាចរណ៍ មិន​ឲ្យអ្នកដំណើរឆ្លងកាត់ ចាប់តាំងពីថ្ងៃទី៤ ខែមីនា ឆ្នាំ២០២១ ដើម្បីទប់ស្កាត់​ការឆ្លងរាលដាលជំងឺកូវីដ១៩​។ រីឯ​បម្រាម​របស់រាជរដ្ឋាភិបាល បិទ​ការធ្វើដំណើរឆ្លងកាត់ពីខេត្តមួយ ទៅខេត្តមួយ មានរយៈពេល ១៤ថ្ងៃ ចាប់ពីថ្ងៃទី៧ ដល់ថ្ងៃទី២០​ ខែមេសា ឆ្នាំ២០២១៕