ខេត្តកំពង់ឆ្នាំង ៖ ជុំវិញករណីចាប់ត្រាក់ទ័រចំនួន២គ្រឿង និងមនុស្ស២នាក់ ដែលបានធ្វើសកម្មភាពឈូសឆាយដីព្រៃលិចទឹកនៅតំបន់៣ ក្នុងភូមិសំរោងសែន ឃុំសំរោងសែន ស្រុកកំពង់លែង ខេត្តកំពង់ឆ្នាំង កាលពីថ្ងៃទី៧…
ខេត្តកំពង់ឆ្នាំង ៖ ជុំវិញករណីចាប់ត្រាក់ទ័រចំនួន២គ្រឿង និងមនុស្ស២នាក់ ដែលបានធ្វើសកម្មភាពឈូសឆាយដីព្រៃលិចទឹកនៅតំបន់៣ ក្នុងភូមិសំរោងសែន ឃុំសំរោងសែន ស្រុកកំពង់លែង ខេត្តកំពង់ឆ្នាំង កាលពីថ្ងៃទី៧ ខែកុម្ភៈ ឆ្នាំ២០២៦កន្លងទៅនេះ មកដល់ពេលនេះ មន្ត្រីជំនាញបានបង្ហាញអត្តសញ្ញាណអ្នកទាំង២នោះហើយ ប៉ុន្តែនៅឡើយតែអ្នកនៅពីក្រោយខ្នងមិនទាន់បានឱ្យដឹងនៅឡើយដែលមិនគួរនៅលាក់បាំងទេ គ្រាដែលសមត្ថកិច្ចជំនាញបានអះអាងថានឹងបន្តនីតិវិធីតាមផ្លូវច្បាប់មិនអាចអត់ឱនឱ្យបានឡើយ ។
លោក តាត សីហាក់ នាយខណ្ឌរដ្ឋបាលជលផលកំពង់ឆ្នាំងស្តីទី បានបញ្ជាក់នៅព្រឹកថ្ងៃទី១០ ខែកុម្ភៈ ឆ្នាំ២០២៦នេះថា អ្នកពាក់ព័ន្ធនឹងករណីឈូសឆាយដីព្រៃលិចទឹកក្នុងតំបន់៣ ទាំង២នាក់ ម្នាក់ឈ្មោះ យ៉ន ចិន្តា ភេទប្រុស អាយុ៥៦ឆ្នាំ រស់នៅភូមិប៉ប្រ៉ក ឃុំសំរោងសែន ស្រុកកំពង់លែង ជាម្ចាស់ដី និងម្នាក់ទៀត ឈ្មោះ ហូត ហ៊ីម ភេទប្រុស អាយុ៤៥ឆ្មាំ រស់នៅភូមិ ជ្រលង ឃុំដារ ស្រុកកំពង់លែង ជាមេការត្រាក់ទ័រ ។ ចំពោះវត្ថុតាងត្រាក់ទ័រចំនួន២គ្រឿង ម៉ាកគូបូតា កម្លាំង៦០៤០សេស ពណ៌ក្រហម ។
លោកនាយខណ្ឌរដ្ឋបាលជលផលកំពង់ឆ្នាំង បានបង្ហាញឆន្ទៈយ៉ាងម៉ឹងម៉ាត់ថា មកដល់ពេលនេះមន្ត្រីជំនាញនៅតែរឹងមាំ ដើម្បីបន្តនីតិវិធីបន្ថែមទៀត ។ ជាពិសេសនៅពេលនេះ សមត្ថកិច្ចយើងបាននាំខ្លួនជនសង្ស័យទាំង២នាក់ មកខណ្ឌហើយ និងវត្ថុតាងត្រាក់ទ័រចំនួន២គ្រឿងក៏យកមករក្សាទុកនៅអធិការដ្ឋាននគរបាលស្រុកកំពង់លែងរួចរាល់ហើយដែរ ។ ដោយសារតែក្នុងករណីនេះ យើងរកឃើញថានៅមានអ្នកពាក់ព័ន្ធមួយចំនួនទៀត ហើយឥឡូវនេះកំពុងតែបន្តនីតិវិធីដើម្បីស្រាវជ្រាវ រកអ្នកទាំងនោះមកអនុវត្តតាមនីតិវិធីច្បាប់ដោយមិនលើកលែង ដើម្បីបិទបញ្ចប់សំណុំរឿងនេះឲ្យឆាប់បំផុត ។ រឿងបែបនេះមិនគួរទុកស្អែកមេខ្លោងតទៅទៀតឡើយ…ហេ ! ហេ !
គួររំលឹកថា នៅថ្ងៃទី៧ ខែកុម្ភៈ ឆ្នាំ២០២៦ក្រោមបទបញ្ជា ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងមានការសម្របសម្រួលឯកឧត្តម ឯក ស៊ិនរស្មី ព្រះរាជអាជ្ញាអមសាលាដំបូងខេត្តបានចុះបង្ក្រាបនិងឃាត់ខ្លួនជនសង្ស័យចំនួន២នាក់ និងត្រាក់ទ័រ២គ្រឿង ដែលធ្វើសកម្មភាពឈូសឆាយដីព្រៃតំបន់៣ ដែលជាព្រៃហាមឃាត់របស់រដ្ឋនៅចំណុចតាតុន ស្ថិតក្នុងភូមិសំរោងសែន ឃុំសំរោងសែន ស្រុកកំពង់លែង ខេត្តកំពង់ឆ្នាំងឡើងវាលរហោឋានទៅហើយឬ អស់ជាច្រើនហិកតា ។
ក្រោយការចាប់ឃាត់ ឯកឧត្តមព្រះរាជអាជ្ញាអមសាលាដំបូងខេត្ត បានដឹកនាំសមត្ថកិច្ចចម្រុះចុះពិនិត្យការខូចខាតជាក់ស្ដែងនៅថ្ងៃទី៨ និងទី៩ ខែកុម្ភៈ ឆ្នាំ២០២៦បានរកឃើញថា ទំហំនៃការខូចខាតដីព្រៃលិចទឹកតំបន់៣ នៅចំណុចខាងលើមានចំនួនជាង១៣ហិកតា ។
ដោយឡែក តាមប្រភពពីប្រជាពលរដ្ឋបានបញ្ជាក់ថា មានត្រាក់ទ័រចំនួន៤គ្រឿង ចូលទៅឈូសឆាយដី ព្រៃលិចទឹក តំបន់៣ នៅចំណុចស្ពានកោះបូ និងចំណុចតាតុន ស្ថិតក្នុងភូមិសំរោងសែន ឃុំសំរោងសែន ស្រុកកំពង់លែង ប៉ុន្តែពេលសមត្ថកិច្ចប្រតិបត្តិការបង្ក្រាបចាប់បានតែ២គ្រឿងប៉ុណ្ណោះ ២គ្រឿងទៀតបានរត់រួច ។
ជុំវិញករណីនេះ ប្រជាពលរដ្ឋបានដាក់ការសង្ស័យថា ប្រហែលជាមានភ្លើងខៀវពីខាងណាហើយមើលទៅ បានជាមានបទល្មើសឈូសឆាយដីព្រៃលិចទឹកផ្លូវតំបន់៣ ដែលច្បាប់ហាមឃាត់បែបនេះ ។ សង្ស័យខ្មោចក្នុងជួយប្រាប់ទេដឹង បានជារត់រួច ។ តើបុរសណាទៅ ដែលថ្លើមពាសមេឃហ៊ានឈូសឆាយព្រៃលិចទឹកក្នុងតំបន់ហាមឃាត់បែបនេះ ?
ចែករំលែកព័តមាននេះ