រាជធានីភ្នំពេញ ៖ នៅវេលាព្រឹកថ្ងៃទី០៨ ខែមេសា ឆ្នាំ២០២១នេះ ក្រុមគ្រូពេទ្យបានបន្តចុះទៅយកសំណាក បងប្អូនកម្មករកម្មការនីរោងចក្រកាត់ដេរសម្លៀកបំពាក់ « ឌីន ហាន » ដែលមានទីតាំង ស្ថិតតាមបណ្តោយផ្លូវដួងងៀប ក្នុងភូមិថ្មី សង្កាត់ស្ទឹងមានជ័យ៣ ខណ្ឌមានជ័យ ក្រោយរកឃើញកម្មករជិត៥០នាក់ វិជ្ជមានជម្ងឺកូវីដ១៩ កាលពីថ្ងៃទី០៧ ខែមេសា ឆ្នាំ២០២១ ។
ការចុះយកសំណាកពីសំណាក់ក្រុមគ្រូពេទ្យ គឺធ្វើឡើងនៅក្នុងបរិវេណរោងចក្រផ្ទាល់តែម្តង ដោយក្រុមកម្មករនាំគ្នាមកជាបន្តបន្ទាប់ ហើយក្រោយធ្វើសំណាករួច ក្រុមគ្រូពេទ្យអនុញ្ញាត្តិអោយត្រឡប់ទៅលំនៅឋានវិញដោយខ្លួនឯង ប៉ុន្តែបានធ្វើការណែនាំដល់បងប្អូនអោយធ្វើចត្តាឡីស័កនៅផ្ទះដោយខ្លួនឯង ដើម្បីបន្តយកសំណាកនៅពេលខាងមុខទៀត ក្នុងការតេស្តិ៍មេរោគកូវីដ១៩ ។
សូមបញ្ជាក់ថា បន្ទប់ជួលប្រមាណជាង១០០បន្ទប់ នៅក្បែរនឹងរោងចក្រខាងលើ គឺត្រូវបានអាជ្ញាធរចុះទៅធ្វើការណែនាំអោយបងប្អូននាំគ្នាទៅយកសំណាកអោយបានគ្រប់ៗគ្នា ពីព្រោះបងប្អូនរស់នៅបន្ទប់ជួលទាំងនោះភាគច្រើន គឺសុទ្ធសឹងតែជាកម្មករកម្មការនី ធ្វើការនៅក្នុងរោងចក្រ « ឌីនហាន » ខាងលើ ។
នៅវេលាព្រឹកថ្ងៃទី០៨ ដដែលកម្មការនីម្នាក់រស់នៅតំបន់បន្ទប់ជួលខាងលើ ត្រូវបានក្រុមគ្រូពេទ្យរកឃើញថា មានផ្ទុកកូវីដ១៩ ក្រោយការយកសំណាកកាលពីម្សិលមិញរួចមក ។ នារីនោះមានវ័យប្រមាណ៣០ឆ្នាំ ជាកម្មការនីរោងចក្រ ឌីនហាន ។ នាងរស់នៅជាមួយសមាជិក៥នាក់ផ្សេងទៀត ដែលកម្មកររោងចក្រ ឌីនហានដូចគ្នា ហើយបច្ចុប្បន្នអ្នកទាំង៥ ត្រូវបានអាជ្ញាធរតម្រូវអោយធ្វើចត្តាឡីស័ក ដើម្បីមានការហ៊ុំព័ទ្ធខ្សែ និងមានកម្លាំងអាជ្ញាធរយាមកាម នៅតំបន់ផ្ទះជួលទាំងនោះផងដែរ ។
សូមបញ្ជាក់ថា រោងចក្រ « ឌីនហាន » មានចំនួនកម្មករកម្មការនី ធ្វើការសរុប២៨០២នាក់ ក្នុងនោះប្រុសមាន២៦៣នាក់ និងមានជនបរទេស១៥នាក់ផងដែរ ។
គួររំលឹកថា អាជ្ញាធររាជធានីភ្នំពេញក៏បានប្រកាសអំពាវនាវដល់ បងប្អូនសាច់ញាតិ ឬមិត្តភក្តិ របស់កម្មករទាំងអស់ត្រូវធ្វើចត្តាឡីស័ករយៈពេល១៤ថ្ងៃ តាមចំនួនកំណត់ហើយបើមិនមកធ្វើតេស្ត រកមេរោគកូវីដ១៩ ឬក៏មិនបានចត្តាឡីស័កឲ្យបានត្រឹមត្រូវទេ នឹងត្រូវទទួលទោសពិន័យតាមច្បាប់ ជាក់ជាមិនខានឡើយ ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញបានមានប្រសាសន៍បន្តថា «យើងត្រូវរៀបចំការងារឱ្យមានការធ្វើតេស្តសំណាកនូវកម្មករ កម្មការិនីនៅក្នុងរោងចក្រនេះទាំងអស់ ។ ឆ្លៀតក្នុងឱកាសនេះដែរ ខ្ញុំក៏សូមអំពាវនាវ និងក្រើនរម្លឹកសុំបងប្អូនកម្មករ កម្មការិនីរបស់យើងដែលធ្វើការ ឬបម្រើការងារនៅរោងចក្រឌីន ហាន នេះ សូមអញ្ជើញរួសរាន់ ដោយស្មារតីភ្ញាក់រលឹក ស្មារតីចូលរួមទាំងអស់គ្នា ក្នុងការតេស្តសំណាក ដើម្បីយើងរកមើលមេរោគកូវីដ១៩ នេះ ចូលរួមទាំងអស់គ្នាបង្ការការរីករាលដាល និងការចម្លងករណីនេះកាន់តែធំឡើង» ។
លោកបានបន្តថា ក្រៅពីការអំពាវនាវ លោកក៏គូសបញ្ជាក់ថាការងារផ្តល់សំណាក ក៏ជាកាតព្វកិច្ចដែលមានចែងក្នុងអនុក្រឹត្យ ស្តីពីវិធានការទប់ស្កាត់ការរីករាលដាលនៃជំងឺកូវីដ ១៩ អនុក្រឹត្យលេខ ៣៧ បានចែងយ៉ាងច្បាស់ ពាក់ព័ន្ធជាមួយមាត្រាទី ២១ ស្តីពីទោសទណ្ឌអំពីការពិន័យអន្តការណ៍ សម្រាប់បុគ្គលដែលមិនសហការជាមួយមន្ត្រីសុខាភិបាល ដើម្បីយកសំណាកទៅវិភាគនោះ គឺអាចប្រឈមនឹងការផាកពិន័យពី១លាន ទៅ៥ លានរៀល ហើយទោះបីជាមានការពិន័យក៏ដោយ ក៏បុគ្គលនោះមិនអាចរួចផុតកាតព្វកិច្ចផ្តល់សំណាកដដែលទេ ៕
ចែករំលែកព័តមាននេះ