រាជធានីភ្នំពេញ ៖ រដ្ឋបាលសាលារាជធានីភ្នំពេញ បានបង្ហាញអត្តសញ្ញាណអ្នកវិជ្ជមានកូវីដ-១៩ ចំនួន ១០៣ រូបថ្មី ដោយក្នុងនោះមានបុគ្គលិកធនគារអេស៊ីលីដា មួយរូបនៅសាខា គីឡូម៉ែត្រលេខ ៦ មានវិជ្ជមានកូវីដ ១៩ និងមានរកឃើញគ្រូទាយបៀរម្នាក់រស់នៅសង្កាត់មិត្តភាព ខណ្ឌ៧មករា រាជធានីភ្នំពេញ វិជ្ជមានកូវីដ ១៩ ដែលអ្នកទាំងពីរ គឺជាមនុស្សក្នុងចំណោម ១០៣ នាក់ដែលឆ្លងក្នុងរាជធានីភ្នំពេញ ។
យោងតាមសេចក្ដីជូនដំណឹងរបស់រដ្ឋបាលសាលារាជធានីភ្នំពេញ ចុះថ្ងៃទី ៨ ខែមេសា បានឱ្យដឹងថា នៅថ្ងៃទី០៧ ខែមេសា ឆ្នាំ២០២១ នៅរាជធានីភ្នំពេញ រកឃើញករណីវិជ្ជមានកូវីដ-១៩ ចំនួន ១០៣រូប ដែលជាករណីឆ្លងក្នុងសហគមន៍ រដ្ឋបាលរាជធានីភ្នំពេញ សូមអំពាវនាវដល់បងប្អូនប្រជាពលរដ្ឋដែលធ្លាប់ប្រាស្រ័យទាក់ទងជាមួយអ្នកជំងឺកូវីដ-១៩ ទាំងអស់ខាងក្រោម ត្រូវរាយការណ៍ជូនអាជ្ញាធរមូលដ្ឋានជាបន្ទាន់ និងរួសរាន់ទៅយកសំណាកនៅតាមទីតាំងដែលបានកំណត់។
នៅក្នុងនោះ គឺមានអ្នកជំងឺម្នាក់ឈ្មោះ ប្រាក់ សង្វាត ភេទប្រុស អាយុ ៣៧ ឆ្នាំ ជាបុគ្គលិកធនាគារអេស៊ីលីដា សាខាគីឡូម៉ែត្រលេខ ៦ មានទីលំនៅបច្ចុប្បន្ន ផ្ទះចូលតាមក្លោងទ្វារវត្តច័ន្ទបុរីរង្ស ប្រហែល ៤០ ម៉ែត្រខាងឆ្វេងដៃ ផ្លូវបេតុង ភូមិគ្រួស សង្កាត់សំរោង ខណ្ឌព្រែកព្នៅ ។
ចំណែកអ្នកជំងឺម្នាក់ទៀត គឺមានឈ្មោះ ខៀវ ផល្លា ភេទស្រី អាយុ ៥៤ ជាគ្រូទាយបៀរ មានទីលំនៅបច្ចុប្បន្នផ្ទះលេខ ១៤៣E4z ផ្លូវលេខ ១២៨ ភូមិ ៦ សង្កាត់មិត្តភាព ខណ្ឌ៧មករា ។
ជាមួយគ្នានោះផងដែរ អ្នកឆ្លងច្រើនលើសលប់ នៃចំនួន ១០៣ នាក់ឆ្លងក្នុងសហគមន៍នាថ្ងៃទី ៧ ខែមេសា គឺជាអាជីវករនិងក្រុមសន្តិសុខនៅផ្សារអូរឫស្សី និងកម្មកររោងចក្រកាត់ដេរ ឌីន ហាន នៅសង្កាត់ស្ទឹងមានជ័យទី ៣ ខណ្ឌមានជ័យ ៕
ចែករំលែកព័តមាននេះ