រាជធានីភ្នំពេញ ៖ ជនសង្ស័យម្នាក់ និងបក្សពួកចំនួន២ទៅ៣នាក់ទៀតបំរុងនឹងធ្វើសកម្មភាពចូលទៅលួចយកសម្ភារៈនៅក្នុងតូបផ្សារបឹងឈូក ប៉ុន្តែមិនបានសម្រេចនោះទេដោយសារតែសន្តិសុខប្រទះឃើញក៏នាំគ្នារត់គេចខ្លួនបាត់ស្រមោល បណ្តាលឱ្យផ្អើលដល់សមត្ថកិច្ចធ្វើការឃាត់ខ្លួន ហេតុការណ៍នេះបានកើតឡើងកាលពីវេលាម៉ោង១រំលងអធ្រាត្រឈានចូលថ្ងៃទី៨ ខែមេសា ឆ្នាំ២០២១ តាមបណ្តោយផ្លូវ២០១១នៅចំណុចក្បែរនឹងផ្សារបឹងឈូកស្ថិតនៅក្នុងសង្កាត់ក្រាំងធ្នុង ខណ្ឌសែនសុខ ។
តាមប្រភពព័ត៌មានពីសាក្សីដែលឃើញហេតុការណ៍ បានឱ្យដឹងថា មុនពេលកើតហេតុខាងលើនេះ គេបានឃើញជនសង្ស័យម្នាក់មិនស្គាល់អត្តសញ្ញាណនោះទេ មានបក្សពួក២ទៅ៣នាក់បានដើរចូលមកក្នុងផ្សារបឹងឈូក គោលបំណងចង់ធ្វើសកម្មភាពគាស់ទ្វារតូបដើម្បីយកសម្ភារៈនៅខាងក្នុងផ្សារ ប៉ុន្តែចៃដន្យអីក៏ស្រាប់តែមានសន្តិសុខ នាំគ្នាប្រទះឃើញក៏រត់ដេញតាមចាប់ខ្លួនពីចំណុចកើតហេតុខាងលើ រហូតជាងកន្លះគឺឡូដី ក៏ត្រូវបានសមត្ថកិច្ចប៉ុស្តិ៍ក្រាំងធ្នុង ធ្វើការអន្តរាគមន៍ឃាត់ខ្លួនបានម្នាក់ ចំណែកឯបក្សពួកវិញរត់គេចខ្លួនអស់តែម្តង ។
ប្រភពដដែលបន្តថា សំណាងល្អហើយដែលឃាត់ខ្លួនបានម្នាក់ ប៉ុន្តែជនសង្ស័យរូបនេះបានប្រកែកថា ខ្លួនមិនបានធ្វើសកម្មភាពលួចគាស់តូបផ្សារនោះទេ គ្រាន់តែចង់លួចយកត្រីដើម្បីយកទៅទុកហូបតែប៉ុណ្ណោះ ។ រីឯអ្នកដែលឃើញហេតុការណ៍នឹងស្គាល់មុខជនសង្ស័យបាននិយាយថា ជនសង្ស័យខាងលើនេះ ធ្លាប់ធ្វើសកម្មភាពលួចជាច្រើនដងមកហើយ ហើយមិនដែលនឹងចាប់បាននោះទេ ឱ្យតែទុកមិនប្រយ័ត្ននឹងត្រូវជនសង្ស័យលួចហើយ ។
ក្រោយពេលកើតហេតុខាងលើនេះ ជនសង្ស័យត្រូវបានសមត្ថកិច្ចធ្វើការឃាត់ខ្លួន ដើម្បីយកទៅសួរនាំបន្តនៅប៉ុស្តិ៍ក្រាំងធ្នុង ដើម្បីចាត់ការទៅតាមនីតិវិធី ៕
ចែករំលែកព័តមាននេះ