រាជធានីភ្នំពេញ ៖ បន្ទាប់ពីមានធ្វើការហ្វឹកហ្វឺនសត្វសុនខជាច្រើនក្បាល ដើម្បីស្វែងរកអ្នកផ្ទុកវីរុសកូវីដ១៩ អង្គភាពស៊ីម៉ាក់បានអះអាងថា ការងារនេះកំពុងដំណើរល្អឆ្ពោះមុខក្នុងការប្រើប្រាស់សុនខស្វែងរកអ្នកឆ្លងជំងឺកូវីដ១៩ ។ នេះបើតាមអគ្គនាយកអង្គភាពស៊ីម៉ាក់ ។ លោក…
រាជធានីភ្នំពេញ ៖ បន្ទាប់ពីមានធ្វើការហ្វឹកហ្វឺនសត្វសុនខជាច្រើនក្បាល ដើម្បីស្វែងរកអ្នកផ្ទុកវីរុសកូវីដ១៩ អង្គភាពស៊ីម៉ាក់បានអះអាងថា ការងារនេះកំពុងដំណើរល្អឆ្ពោះមុខក្នុងការប្រើប្រាស់សុនខស្វែងរកអ្នកឆ្លងជំងឺកូវីដ១៩ ។ នេះបើតាមអគ្គនាយកអង្គភាពស៊ីម៉ាក់ ។
លោក ហេង រតនា អគ្គនាយកមជ្ឈមណ្ឌលកំចាត់មីនកម្ពុជា (ស៊ីម៉ាក់) បានបញ្ជាក់នៅបណ្តាញសង្គម នៅថ្ងៃទី៧ ខែមេសា ឆ្នាំ២០២១ថា ដំណើរឆ្ពោះទៅមុខនៃសុនខហិតរកអ្នកផ្ទុកវីរុសកូវីដ១៩ នៅកម្ពុជាមានល្អប្រសើរ ។
លោកបន្តថា អង្គភាពស៊ីម៉ាក់មានសុនខ មានឯកសារ និងសំភារ:ហ្វឹកហ្វឺន មានអ្នកមានសមត្ថភាពកាន់សុនខ និងមានគ្រូបច្ចេកទេសមានសមត្ថភាពបង្ហាត់បង្រៀនសុនខ រួមគ្នាជាមួយសាស្ត្រាចារ្យវេជ្ជសាស្ត្រនៃសកលវិទ្យាល័យវិទ្យាសាស្ត្រសុខាភិបាល ព្រមទាំងមានការគាំទ្រទាំងស្មារតី និងសំភារ:ពីមិត្តភក្តិជាតិ និងអន្តរជាតិទាំងអស់គ្នាបន្តខិតខំ និងប្តេជ្ញាអនុវត្តតាមគំនិតផ្តួចផ្តើមនិងអនុសាសន៍ដ៏ខ្ពង់ខ្ពស់របស់សមេ្តចតេជោ ក្នុងការស្រាវជ្រាវ និងអភិវឌ្ឍន៍សុនខហិតរកអ្នកផ្ទុកវីរុសកូវីដ១៩ ដើម្បីរួមចំណែកក្នុងការប្រយុទ្ធប្រឆាំងជម្ងឺកូវីដ១៩ នៅកម្ពុជាទាំងស្ថានភាពចំពោះមុខ និងអនាគតវែងឆ្ងាយទៅមុខទៀត ។
លោកអគ្គនាយកស៊ីម៉ាក់ បានលើកឡើងបច្ចុប្បន្ននេះ សុនខហិតអ្នកផ្ទុកវីរុសកូវីដ១៩ បានហ្វឹកហ្វឺន និងកំពុងប្រើប្រាស់នៅប្រទេសមួយចំនួន ។
សូមជម្រាបថា កាលពេលកន្លងមកអង្គភាពស៊ីម៉ាក់ធ្លាប់លើកឡើងថា នឹងត្រៀមប្រើប្រាស់សត្វសុខនចំនួន១០ក្បាល ដើម្បីស្វែងរកអ្នកផ្ទុកជំងឺកូវីដ១៩ ។ លោក ហេង រតនា បានលើកឡើងថា ការត្រៀមសត្វឆ្កែចំនួន១០ក្បាល រួមទាំងអ្នកជំនាញពីក្រសួងសុខាភិបាល និងឯកសារសម្រាប់ហ្វឹកហ្វឺន ដើម្បីត្រៀមហ្វឹកហ្វឺនសត្វឆ្កែទាំងនោះ ។ លោកបន្តថា ការហ្វឹកហាត់សត្វឆ្កែទាំង១០ក្បាលនេះ ឱ្យហិតក្លិនរកអ្នកដែលមានជំងឺកូវីដ-១៩ អាចប្រើរយៈពេលប្រហែល៣ទៅ៤ខែ ។
លោក ហេង រតនា បញ្ជាក់ថា ៖ «ក្រោយពីចេះហិតក្លិនកូវីដហើយ ត្រូវសាកល្បងឱ្យរកជាក់ស្ដែងមុននឹងចេញឱ្យអនុវត្តប្រតិបត្តិការបាន ។ ក្រោយពីធ្វើការជាមួយអ្នកវិទ្យាសាស្ត្រខាងវិជ្ជសាស្ត្រហើយធានាសុវត្ថិភាព១០០ភាគរយ ហើយមិនឱ្យប៉ះពាល់ទៅលើការឆ្លង ឬហានិភ័យណាមួយដល់សុនខ ឬសត្វឆ្កែហើយ គឺយើងចាប់ផ្ដើមអនុវត្ត» ។
លោកបន្ថែមថា ក្រៅពីហ្វឹកហ្វឺនសត្វឆ្កែទាំង១០ក្បាលនេះហើយស៊ីម៉ាក់ក៏បានត្រៀមសត្វឆ្កែជាច្រើនក្បាលទៀតដែរទុកត្រៀមហ្វឹកហាត់បន្តសម្រាប់ហិតក្លិន និងស្រាវជ្រាវអ្នកដែលកើតជំងឺកូវីដ-១៩ បើសិនការអនុវត្តជំហានដំបូងទទួលបានជោគជ័យនោះ ។
សូមជម្រាបថា ការបណ្តុះបណ្តាលនេះធ្វើឡើង បន្ទាប់ពីសម្តេចតេជោហ៊ុន សែន នាយករដ្ឋមន្ត្រី បានអនុញ្ញាតឱ្យក្រសួងសុខាភិបាល និងអង្គភាពស៊ីម៉ាក់រៀបចំកម្មវិធីសិក្សាស្រាវជ្រាវ និងអភិវឌ្ឍន៍សុនខ ឬសត្វឆ្កែ ជាជំនួយហិតរកអ្នកផ្ទុកកូវីដ-១៩ ដោយថា ដើម្បីចូលរួមទប់ស្កាត់ និងប្រឆាំងទៅនឹងការរីករាលដាលជំងឺកូវីដ-១៩ នៅក្នុងសហគមន៍ ៕
ចែករំលែកព័តមាននេះ