រាជធានី​ភ្នំពេញ ៖ ក្រុមហ៊ុន​ស៊ីម៉ងត៍ Siam City Cement (SCCC)​របស់​ប្រទេស​ថៃ​បាន​ទិញ​យក​ភាគហ៊ុន​ប្រមាណ​ជា​៤០​ភាគរយ​ពី​ក្រុមហ៊ុន​ស៊ីម៉ងត៍ Chip Mong Group កម្ពុជា ដើម្បី​ទាញ​យក​ប្រយោជន៍​ពី​សមាហរណកម្ម​អាស៊ាន​ដែល​ចូល​មក​ដល់​នា​ចុងខែ​ធ្នូ​ខាង​មុខ​នេះ ។ នេះ​បើ​យោង​តាម​កាសែត The Nation របស់​ប្រទេស​ថៃ ។

កាសែត​The Nation បាន​ដកស្រង់​សម្តី​របស់​លោក Siva Mahasandana ដែល​ជា​អនុប្រធាន​នាយក​ប្រតិបត្តិ​ស្តីទី និង​ជា​អនុប្រធាន​ជាន់ខ្ពស់​ទទួល​បន្ទុក​ផ្នែក​ទីផ្សារ និង​ផ្នែក​លក់​របស់​SCCC ថា ការ​ចូល​ភាគហ៊ុន​នេះ​គឺ​ទាក់ទង​នឹង​ការ​សាងសង់​រោងចក្រ​ស៊ីម៉ងត៍ ប្រតិបត្តិការ​និង​ជំនួញ​ផ្សេង​ៗ ។

លោក Siva Mahasandana មាន​ប្រសាសន៍​បញ្ជាក់​ថា ៖ «​ក្រុមហ៊ុន SCCC​បាន​ចុះហត្ថលេខា​អំពី​កិច្ចព្រមព្រៀង​ជាក់លាក់​មួយ​នេះ​ជាមួយ​ក្រុមហ៊ុន Chip Mong Group ជាមួយនឹង​បុគ្គល​សំខាន់​ៗ​របស់​ក្រុមហ៊ុន​ផ្សេង​ៗ​ទៀត​ដែល​ត្រូវ​បាន​ស្គាល់​ជា​រួម​ថា CMG  ដើម្បី​បង្កើត​នៃ​ការ​ចូល​ហ៊ុន​នេះ ដែល​រំពឹង​ថា នឹង​ដំណើរការ​នៅ​ខែធ្នូ​ខាង​មុខ​នេះ» ។

លោក Siva​បាន​មាន​ប្រសាសន៍​ថា ទុន​វិនិយោគ​ដែល​បាន​ចុះបញ្ជី​ក្នុង​ភាគហ៊ុន​នេះ​មាន ប្រមាណ​ជា​១៥០​លាន​ដុល្លារ ប្រហែលជា ៥,៣៨​ប៊ី​លាន​បាត ដោយ​បញ្ចូល​ជាមួយនឹង​ហ៊ុន​ធម្មតា​ប្រមាណ​ជា​៧៥.០០០​ហ៊ុន ដែល​ក្នុង​មួយ​ហ៊ុន​មាន​តម្លៃ​២០០០​ដុល្លារ ។ លោក​ថា នៅ​ពេល​ការ​បង្កើត​នេះ​រួចរាល់​ជា​ស្ថាពរ ក្រុមហ៊ុន​នេះ​នឹង​ប្តូរ​ឈ្មោះ​ថ្មី​ទៅ​ជា Chip Mong Insee Cement Corp ។

លោក Siva បន្ត​ថា កម្ពុជា​ជា​ប្រទេស​ដែល​មានការ​ទាក់ទាញ​ការ​វិនិយោគ​ល្អ​បំផុត និង​តម្លៃ​ពលកម្ម​ទាប ។ លោក Siva មាន​ប្រសាសន៍​បញ្ជាក់​ថា ៖ « យើង​ជឿជាក់​ថា​ជំនួញ​រួម​គ្នា​នេះ​គឺ​ពិតជា​ស្ថិតស្ថេរ​ជា​និរន្តរ៍​នៅ​កម្ពុជា ហើយ​ក្នុង​ពេល​នេះ​ដែរ យើង​កំពុង​ស្វែងរក​ឱកាស​វិនិយោគ​ថ្មី​ៗ​បន្ថែម​ទៀត​នៅ​ក្នុង​បណ្តា​ប្រទេស​អាស៊ាន ជា​ពិសេស​បណ្តាល​ប្រទេស CLMV ដែល​មាន​កម្ពុជា ឡាវ មី​យ៉ា​ន់​ម៉ា និង​វៀតណាម » ។

គួរ​បញ្ជាក់​ថា រោងចក្រ​ស៊ីម៉ងត៍​ថ្មី​នៅ​កម្ពុជា​នេះ នឹង​បង្កើន​សមត្ថភាព​ផលិត​ប្រចាំឆ្នាំ​ប្រមាណ​ជា​១,៥​លាន​តោន ។

លោក ប៊ូ អ៊ា​វ គង់ ប្រធាន​គ្រប់គ្រង​ទូទៅ​ក្រុមហ៊ុន​អេ​ស៊ា​រៀល​អុ​ី​ស្ទេ​ត ខេ​ម​បូ​ឌា ប្រាប់​កោះសន្តិភាព​ថា ការ​ផ្គត់ផ្គង់​ស៊ីម៉ងត៍ និង​សង្វា​ក់​ផលិតកម្ម​នៅ​លើ​ទីផ្សា​របស់​ក្រុមហ៊ុន​ស៊ីម៉ងត៍​នៅ​ស្រុក​ខ្មែរ គឺ​មិន​ទាន់​បំពេញតម្រូវការ​នៃ​សាងសង់​នៅ​កម្ពុជា​បាន​នៅឡើយ​ទេ ។

លោក ប៊ូ អ៊ា​វ គង់ មាន​ប្រសាសន៍​បញ្ជាក់​ថា ៖« ដូច្នេះ​យើង​ឃើញ​មានការ​នាំ​ចូល​ស៊ីម៉ងត៍​ពី​ទីផ្សារ​ខាងក្រៅ​ដូច​ជា ចិន វៀតណាម និង​ថៃ ជាដើម ដោយសារ​កម្ពុជា​មាន​ក្រុមហ៊ុន​ផលិត​ស៊ីម៉ងត៍​ក្នុងស្រុក​ធំ​ៗ​ចំនួន​២ ដូច្នេះ​មាន​ក្រុមហ៊ុន​នាំ​ចូល​ស៊ីម៉ងត៍​មក​ស្រុក​ខ្មែរ​មិន​តិច​ជាង​១០​ទេ​នា ពេល​ឥឡូវ » ។

បើ​តាម​របាយការណ៍​ពី​ក្រសួង​ដែនដី នគរូបនីយកម្ម និង​សំណង់ ក្នុង​រយៈពេល​៦​ខែ​ឆ្នាំ​នេះ រាជធានី​ភ្នំពេញ អគារ​ខ្ពស់​ដែល​បាន​ស្នើ​សុំ​សាងសង់​មាន​ប្រមាណ​ជា​៦២៨​អគារ ចំនួន​បុរី និង​បណ្តុំ​លំនៅ​ឋាន​មាន​លក្ខណៈ​ជា​បុរី មាន​ចំនួន​១១០​ទីតាំង ដែល​បាន​សាងសង់ និង​កំពុង​សាងសង់ ។ ការ​ចុះបញ្ជី​ក្រុមហ៊ុន​អាជីវកម្ម​សិក្សា​គម្រោង​ប្លង់ និង​សាងសង់​គិត​ពី​ឆ្នាំ​២០០០​មក​ដល់​៦​ខែ​ឆ្នាំ​២០១៥ មាន​១៥៨១​ក្រុមហ៊ុន ប៉ុន្តែ​នៅ​មាន​សុពលភាព​តែ​៦៤៦​ក្រុមហ៊ុន ក្នុង​នោះ​ក្រុមហ៊ុន​បរទេស មាន​ចំនួន​២០២​ក្រុមហ៊ុន៕