ខេត្តកំពង់ឆ្នាំង ៖ កសិករដាំល្ពៅនៅតាមចំការក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ កាន់តែខកចិត្ត ខណៈផ្លែល្ពៅបន្តធ្លាក់ចុះរហូតត្រឹម១០០រៀលក្នុងមួយគីឡូក្រាម ខុសពីប៉ុន្មានថ្ងៃមុនលក់បាន២៥០រៀល ។ នេះជាការបញ្ជាក់ប្រាប់អ្នកសារព័ត៌មាននៅព្រឹកថ្ងៃទី២ ខែមេសា ឆ្នាំ២០២១ នៅចំណុចមាត់កំពង់ទឹក ឃុំឆ្នុកទ្រូ ស្រុកបរិបូណ៌ ។
បើតាមលោក ម៉ែ រិន អាយុ៣៥ឆ្នាំ មានទីលំនៅភូមិត្រពាំងចាន់ ឃុំត្រពាំងចាន់ ស្រុកបរិបូណ៌ បានឲ្យដឹងថា គាត់មានដីចំការនៅចំណុចកោះក្រមុំ ស្ថិតក្នុងភូមិឆ្នុកទ្រូ ចំនួន១ហិចតា គាត់បានដាំល្ពៅជារៀងរាល់ឆ្នាំ។ កាលពីឆ្នាំទៅមិញ ល្ពៅគាត់លក់បានពី៧ទៅ៨រយរៀលក្នុង១គីឡូក្រាម។ ប៉ុន្តែក្នុងឆ្នាំនេះ បន្ទាប់ពីធ្លាក់ថ្លៃត្រឹម២៥០រៀលកាលពីប៉ុន្មានថ្ងៃមុន លុះនៅថ្ងៃនេះ ល្ពៅរបស់គាត់បានត្រឹម១០០រៀលតែប៉ុណ្ណោះ ក្នុង១គីឡូក្រាម ធ្វើឲ្យគាត់ខាតបង់ជាខ្លាំង ។
លោកបានបញ្ជាកថា បើផ្លែល្ពៅជាប់លេខ គឺក្នុងមួយផ្លែទម្ងន់ចាប់ពី៥គីឡូក្រាមឡើងទៅ អាចលក់បាន២៥០រៀលក្នុង១គីឡូក្រាម ប៉ុន្តែទោះជាប់លេខក៏ដោយ បើមានរបកសំបក ឬស្នាមកកិតតែបន្តិច គេទម្លាក់ថ្លៃត្រឹម១០០រៀលក្នុង១គីឡូក្រាមដូចគ្នា ។ បើនិយាយពីថ្លៃចំណាយវិញ សូម្បីតែគ្រាប់ល្ពៅទិញយកមកដាំ ក្នុង១កញ្ចប់២៤ម៉ឺន (ទម្ងន់ត្រឹមតែ២ខាំ) ហើយបើដាំ១ហិកតាដូចគាត់ត្រូវទិញគ្រាប់២កញ្ចប់ស្មើនឹង៤៨ម៉ឺនរៀល នេះនិយាយត្រឹមគ្រាប់ពូជទិញមកដាំប៉ុណ្ណោះ នៅថ្លៃទិញប្រេងភ្ជួរពង្រាបដី ថ្លៃទិញប្រេងបូមទឹក ថ្លៃទិញជី ថ្លៃទិញថ្នាំបាញ់សម្លា.ប់សត្វល្អិត គឺចំណាយច្រើនណាស់។
លោកបបន្តថា ដោយសារល្ពៅថោកពេក មិនហ៊ានជួលគេបេះល្ពៅទេ សុខចិត្តបេះយកមកលក់ខ្លួនឯង ក៏ជួបការលំបាកដែរ ។ មនុស្សស្រីបេះទូលពីខ្នងចំការ មកដាក់កាណូតបានតែ២ផ្លែទេ ហើយបើខ្លាំងអាចកណ្តៀតនៅចង្កេះ១ទៀត បាន៣ផ្លែក្នុង១ជើងដែលមានចម្ងាយដី៥ទៅ៦រយម៉ែត្រ តែបើមនុស្សប្រុសរែកបាន៦ផ្លែ (ម្ខាង៣ផ្លែ) គឺពិតជាមានការលំបាកណាស់។ លុះដល់ពេលយកមកលក់ មួយជើងបានត្រឹមជាង១០ម៉ឺនរៀល ក្នុង១កាណូតបាឡាស្មាច់ ហើយបើតាមការប្រមាណល្ពៅគាត់ ១ហិកតាលក់បានយ៉ាងច្រើនប្រហែល១លានរៀល ខណៈការចំណាយជាង២លានរៀលទៅហើយ។
ស្របពេលនោះផងដែរ កសិករទាំងអស់ ក៏បានសំណូមពរដល់រាជរដ្ឋាភិបាល ក៏ដូចជាមន្ត្រីជំនាញជួយរកទីផ្សារឱ្យពួកគាត់បានថ្លៃជាងនេះផង ។
ជាមួយគ្នានោះ ស្ត្រីឈ្មោះ ជុំ អាត អាយុ៤៨ឆ្នាំ ជាអាជីវករចាំទិញផ្លែល្ពៅនៅមាត់កំពង់ទឹកឆ្នុកទ្រូទ្រូង បានឲ្យដឹងថា ផ្លែល្ពៅពិតជាថោកជាងថ្ងៃមុនមែន បើផ្លែល្ពៅជាប់លេខ (ទម្ងន់៥គីឡូឡើង) គាត់ទិញ២៥០រៀល ក្នុង១គីឡូក្រាម ទម្ងន់ក្រោមហ្នឹង ទិញតែ១០០រៀលទេក្នុង១គីឡូក្រាម។ គាត់លក់បន្តទៅឱ្យឈ្មួញដឹកឡានយកទៅលក់នៅខេត្តកំពង់ចាម និងបណ្តាខេត្តនានា។ ចំពោះមូលហេតុ ល្ពៅធ្លាក់ចុះ គឺបណ្តាលមកពីការផ្ទុះឡើងនៃជំងឺកួវីដ -១៩ ។ ក្រោយកើតជំងឺនេះ គេបិទច្រកចេញ ប្រទេសជិតខាងគេឈប់ទិញដែរ ម្ល៉ោះហើយ ល្ពៅលក់តែក្នុងស្រុកប៉ុណ្ណោះ ។
សូមបញ្ជាក់ដែរថា បន្ទាប់ពីមានការផ្សព្វផ្សាយល្ពៅចុះថោក ក៏មានសប្បុរសជនមួយចំនួនចុះទៅទិញល្ពៅដាក់តាមមណ្ឌលកុមារកំព្រា និងដាក់តាមផ្ទះបាយរបស់កងយោធពលខេមរភូមិន្ទផងដែរ៕
ចែករំលែកព័តមាននេះ