រាជធានីភ្នំពេញ ៖ ក្រុមហ៊ុន Oxley Worldbridge (Cambodia) Co.,Ltd វិនិយោគទឹកប្រាក់ប្រមាណ៥៨០លានដុល្លារក្នុងការសាងសាង់អគារខុនដូថ្មីមួយទៀតដែលមានឈ្មោះថា គម្រោងThe Peak
រាជធានីភ្នំពេញ ៖ ក្រុមហ៊ុន Oxley Worldbridge (Cambodia) Co.,Ltd វិនិយោគទឹកប្រាក់ប្រមាណ៥៨០លានដុល្លារក្នុងការសាងសាង់អគារខុនដូថ្មីមួយទៀតដែលមានឈ្មោះថា គម្រោងThe Peak បន្ទាប់ពីខ្លួនទទួលបានជោគជ័យ១០០%លើគម្រោងខុនដូ The Bridge ។
លោក សៀ រឹទ្ធី អគ្គនាយកក្រុមហ៊ុន Oxley Worldbridge (Cambodia ) Co.,Ltd បានមានប្រសាសន៍នៅក្នុងសន្និសីទសារព័ត៌មានមួយកាលពីព្រឹកថ្ងៃទី១៦ កញ្ញា ២០១៥ ថា គម្រោងថ្មីដែលប្រកាសលក់នាពេលនេះ ជាគម្រោងទី២ បន្ទាប់ពីគម្រោងទី១ The Bridge បានទទួលជោគជ័យ ហើយគម្រោងThe Peakនេះនឹងត្រូវសាងសង់លើផ្ទៃដី ១,៣ហិកតា ជិតគម្រោងទី១ The Bridge ខាងលិចទីក្រុងកោះពេជ្រដែរ ។
លោកបានមានប្រសាសន៍ថា ៖ «ឥឡូវនេះ យើងនឹងធ្វើការផ្សព្វផ្សាយលក់របស់គម្រោង The Peak ឲ្យអតិថិជនរបស់យើងបានស្គាល់និងបានដឹងពីគម្រោងទី២ The Peak នេះ ដែលមានអ្វីប្លែកៗពីគម្រោងទី១ » ។
លោកបន្តថា លោកចង់ឲ្យមានអ្វីប្លែកសម្រាប់អតិថិជន ជាក់ស្ដែងគម្រោងថ្មី The Peak បានអភិវឌ្ឍន៍ឲ្យប្លែកពីគម្រោងទី១The Bridge ដោយគម្រោងថ្មី មានសណ្ឋាគារ មានការិយាល័យធំៗជាងគម្រោងទី១ ។
លោកមានប្រសាសន៍បន្តទៀតថា ៖ « ក្នុងក្រុមហ៊ុនរបស់យើងចង់ធ្វើអ្វីឲ្យមានការផ្លាស់ប្តូររសជាតិខ្លះ ។ ក្នុងគម្រោងទី១ The Bridgeរបស់យើងដែលយើងធ្វើ វាជាការពិតហើយ ជាគម្រោងដែលកសាងឡើងរួមបញ្ចូលមានការិយាល័យ ការស្នាក់នៅ និងផ្សារទំនើប ប៉ុន្តែការិយាល័យដែលកសាងនៅក្នុងគម្រោងThe Bridge ជាការិយាល័យប្រភេទធុនតូច ចំណែកឯគម្រោងThe Peak ប្លែកពីគម្រោងThe Bridge ដោយសារតែគម្រោងThe Peak មានបីអគារ ដោយពីរអគារជាខុនដូ និង១អគារជាសណ្ឋាគារផ្កាយប្រាំ ឈ្មោះថា Shangri-La និងមានការិយាល័យផងដែរ តែជាការិយាល័យខ្នាតធំ ។ ក្នុងគម្រោង The Peak នេះដែរ ក៏មានផ្សារទំនើបដូចគម្រោងទី១ដែរ » ។
លោក អិុន ស៊ីថា អគ្គនាយករងក្រុមហ៊ុនវើលត្រាសអីុស្ទេត ក៏បានមានប្រសាសន៍ដែរថា តំបន់ទន្លេសាបាក់ ជាពិសេសកោះពេជ្រ វាជាតំបន់ដែលមានសក្ដានុពលវិស័យលំនៅឋាន ហើយក៏ជាតំបន់ដែលមានផ្លូវធ្វើដំណើរងាយស្រួល ដោយមានទេសភាពល្អៗដូចជា មានទន្លេហ៊ុមព័ទ្ធជុំវិញ និងជាតំបន់ពាណិជ្ជកម្ម សាលារៀន ឬមជ្ឈមណ្ឌលពាណិជ្ជកម្មសំខាន់ៗផងដែរ ។
លោកបន្តថា « បើយើងវិភាគ និងប្រៀបធៀបជាមួយតំបន់ដែលមានសក្ដានុពលខាង វិស័យពាណិជ្ជកម្ម និងវិស័យលំនៅឋាន តំបន់កោះពេជ្រ ជាតំបន់លំនៅឋានលេខ១ ។ ចំណែកនៅតាមបណ្ដោយមហាវិថីព្រះមុនីវង្ស ជាពិសេសក្នុងសង្កាត់បឹងកេងកង ជាតំបន់ពាណិជ្ជកម្មដែលអាចខ្លាំងជាតំបន់កោះពេជ្រ » ។
លោក សៀ រឹទ្ធី បន្ថែមថា គម្រោង The Peak ដែលជាគម្រោងទី២ មានកម្ពស់៥៥ជាន់ ហើយយើងនឹងចាប់ផ្ដើមសាងសង់នៅអំឡុងចុងឆ្នាំ២០១៥នេះ និងគ្រោងបញ្ចប់នៅឆ្នាំ២០២០ ។ លោកថ្លែងថា ៖ « យើងនឹងព្យាយាមឲ្យបានបញ្ចប់មុននោះ ព្រោះយើងមិនចង់កំណត់ពេលលឿន តែជាក់ស្ដែងធ្វើយឺតនោះទេ។ ដោយឡែកទឹកប្រាក់វិនិយោគនេះមានចំនួន៥៨០លានដុល្លារអាមេរិក ជាទឹកប្រាក់រួមបញ្ចូលគ្នារបស់អ្នកវិនិយោគក្រៅប្រទេសផងដែរ » ។
លោកបញ្ជាក់ថា បច្ចុប្បន្ននេះ ទីតាំងដែលគម្រោង The Bridge និង The Peak កំពុងអភិវឌ្ឍន៍ជាទីតាំងដែលល្អបំផុត វាជាតំបន់លំនៅឋាននិងពាណិជ្ជកម្ម ព្រមទាំងជាតំបន់ដែលមានទេសភាពល្អស្អាត នៅមាត់ទន្លេថែមទៀតផង ។
លោកបញ្ជាក់បន្ថែមថា ៖ « របត់នៃការរស់នៅរបស់ប្រជាជនកម្ពុជា ខ្ញុំសង្ឃឹមថា នឹងផ្លាស់ប្តូរដូចនៅប្រទេសថៃ ។ នៅប្រទេសថៃ កាលពីមុនអ្នកស្នាក់នៅក្នុងខុនដូភាគច្រើនជាជនបរទេស តែក្រោយមក អ្នកស្នាក់នៅក្នុងខុនដូក្នុងប្រទេសថៃភាគច្រើនជាជនជាតិថៃ ដែលទិញខុនដូពីជនបរទេសវិញ វាមិនខុសអីពីកម្ពុជាពេលនេះទេ ដែលភាគច្រើនជាជនបរទេសជាអ្នកស្នាក់នៅក្នុងខុនដូ តែនៅពេលខាងមុខទៀត អ្នកស្នាក់នៅខុនដូ អាចជាប្រជាជនកម្ពុជាយើងច្រើនជាងជនបរទេសវិញក៏ថាបាន » ៕
ចែករំលែកព័តមាននេះ