ខេត្តកំពង់ធំ ៖ យោងតាមការចេញផ្សាយរបស់គម្រោង USAID ព្រៃឡង់បៃតងថ្មីៗ កសិករម្នាក់ដែលស្នាក់នៅជិតដែនជម្រកសត្វព្រៃព្រៃឡង់ ខេត្តកំពង់ធំ នៃប្រទេសកម្ពុជា បានរៀនពីរបៀបធ្វើស្រែចម្ការពីឪពុករបស់គាត់ និងបច្ចុប្បន្នគាត់ក៏បានបង្រៀនកូនៗរបស់គាត់បន្តទៀតឱ្យចេះដាំដុះដំណាំសរីរាង្គ…
ខេត្តកំពង់ធំ ៖ យោងតាមការចេញផ្សាយរបស់គម្រោង USAID ព្រៃឡង់បៃតងថ្មីៗ កសិករម្នាក់ដែលស្នាក់នៅជិតដែនជម្រកសត្វព្រៃព្រៃឡង់ ខេត្តកំពង់ធំ នៃប្រទេសកម្ពុជា បានរៀនពីរបៀបធ្វើស្រែចម្ការពីឪពុករបស់គាត់ និងបច្ចុប្បន្នគាត់ក៏បានបង្រៀនកូនៗរបស់គាត់បន្តទៀតឱ្យចេះដាំដុះដំណាំសរីរាង្គ ជាច្រើនប្រភេទផងដែរ ។ ពេញមួយឆ្នាំចម្ការរបស់គាត់ពោរពេញទៅដោយដំណាំហូបផ្លែដូចជា ធុរេន សាវម៉ាវ ពោត ត្រសក់ ល្ហុង ព្រមទាំងផ្លែឈើ និងបន្លែជាច្រើនទៀត ។
អ្នកមីង ហឿន ឃុន គឺជាកសិករម្នាក់ដែលបានប្រែក្លាយព្រៃក្បែរផ្ទះរបស់គាត់ ឱ្យទៅជាចម្ការកៅស៊ូក្នុងរយៈពេលប៉ុន្មានឆ្នាំចុងក្រោយនេះ ។ តាមគម្រោង USAID ដើម្បីទទួលបានដីថ្មី កសិករត្រូវធ្វើដំណើរហួសចម្ការកៅស៊ូទៅកាន់ព្រៃឡង់ ។ នៅទីនោះ ដីព្រៃជាញឹកញាប់ ត្រូវបានបំលែងទៅជាដីចម្ការ ។
ជាមួយគ្នានេះដែរ គម្រោង USAID បាននឹងកំពុងធ្វើការជាមួយអ្នកមីង ហឿន ឃុន និងសហគមន៍កសិកម្ម ដែលគាត់ដឹកនាំ ដើម្បីផ្តល់ជម្រើសផ្សេងទៀត ក្រៅពីការបំលែងដីព្រៃឱ្យក្លាយជាដីចម្ការ ។ បច្ចេកទេសពីរត្រូវបានអនុវត្ត ។ ទីមួយ គឺការធ្វើឱ្យប្រសើរឡើងនូវទិន្នផលកសិកម្ម និងគុណភាពដំណាំ តាមរយៈការអនុវត្តន៍ការធ្វើកសិកម្មឱ្យបានល្អប្រសើរជាងមុន ។ ទីពីរនោះ គឺការតភ្ជាប់កសិករទៅកាន់អ្នកទិញក្នុងវិស័យឯកជន ។ អ្នកទិញទាំងនេះ និងអតិថិជនរបស់ពួកគេប្ដេជ្ញាចិត្ត ទិញផលិតផលដែលមិនដាំដុះនៅលើដីដែលបំលែង មកពីដីព្រៃនោះទេ ។
តាមរយៈគម្រោង USAID ព្រៃឡង់បៃតង មីង ហឿន ឃុន បាននិយាយថា ៖ «ព្រៃឈើ គឺជាអ្វីៗគ្រប់យ៉ាងសម្រាប់ទ្រទ្រងដល់ជីវិតរបស់យើងទាំងអស់គ្នា ហើយខ្ញុំប្តេជ្ញាចិត្តថា នឹងមិនកាប់ឆ្ការដីព្រៃសម្រាប់ការធ្វើកសិកម្មនោះទេ ។ ខ្ញុំនឹងមិនអាចលក់ផលដំណាំរបស់ខ្ញុំបានទេ ប្រសិនបើអ្នកបញ្ជាទិញបានរកឃើញថាយើងពាក់ព័ន្ធទៅនឹងករណីកាប់ព្រៃឈើ ។ តាមរយៈលទ្ធភាពទាំងនេះ ខ្ញុំអាចចូលរួមក្នុងសហគមន៍កសិកម្មដើម្បីរៀនពីរបៀបធ្វើកសិកម្មឱ្យបានល្អប្រសើរជាងមុន» ។
យោងតាមរយៈគម្រោង USAID បានបន្តថា នៅពេលដែលទិន្នផលកើនឡើង ជាមួយនឹងគុណភាពល្អ អ្នកទិញ និងកសិករនឹងអាចចុះកិច្ចសន្យា ។ កិច្ចសន្យានឹងរក្សាតម្លៃមិនឱ្យធ្លាក់ចុះ ធានាការលក់នាពេលអនាគត ព្រមទាំងអនុញ្ញាតឱ្យកសិករ និងអ្នកទិញធ្វើផែនការរយៈពេលវែង ។ កិច្ចសន្យាក៏នឹង ការពារព្រៃឡង់ដោយផ្តល់ឱ្យកសិករនូវអត្ថប្រយោជន៍ដែលបានមកពីទីផ្សារជំនួសវិញ ដើម្បីចៀសវាងការកាប់ឆ្ការព្រៃឈើ ។
អ្នកមីង ហឿន ឃុន និងអ្នកជិតខាងមួយចំនួនទៀត ត្រូវបានជ្រើសរើសដោយសហគមន៍កសិកម្មរបស់ពួកគាត់ ដើម្បីធ្វើជាកសិករគំរូ ។ ចម្ការរបស់ពួកគាត់មានតួនាទីជាចម្ការគំរូ ដែលកសិករផ្សេងទៀតអាចរៀនសូត្រពីរបៀបដាំដំណាំចម្រុះ ហើយអនុវត្តបច្ចេកទេសកសិកម្មដែលមានភាពប្រសើរជាងមុន ។
អ្នកមីង ហឿន ឃុន បានបន្ថែមថា ៖ «ចម្ការគំរូអាចចូលរួមចំណែកបង្កើនផលិតភាពព្រមទាំងធ្វើឱ្យជីវភាពកសិករ ក៏ដូចជាបរិស្ថានកាន់តែល្អប្រសើរឡើង នៅពេលដែលយើងប្តូរពីការអនុវត្តបែបប្រពៃណី ទៅជាការអនុវត្តតាមបច្ចេកវិទ្យាទំនើប ។ បច្ចេកទេសថ្មី និងឧបករណ៍កសិកម្មទំនើបក៏នឹងជួយឱ្យយើងដាំដំណាំបានល្អ កាត់បន្ថយថ្លៃដើម បង្កើនថ្លៃលក់ ព្រមទាំងជួយឱ្យយើងមិនត្រូវការជីគីមីថែមទៀតផង ។ ខ្ញុំរីករាយដែលបានធ្វើជាគំរូដល់សហគមន៍របស់ខ្ញុំ» ៕
ចែករំលែកព័តមាននេះ