ខេត្តកណ្តាល ៖ នៅថ្ងៃទី២៧ ខែមីនា ឆ្នាំ២០២១ លោក គង់ សោភណ្ឌ អភិបាលខេត្តកណ្តាល បានបញ្ជារអោយបណ្តាក្រុងស្រុកផាកពិន័យអន្ដរការណ៍លើបុគ្គលដែលមិនអនុវត្តនូវកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាពបុគ្គល ក្នុងភូមិសាស្ត្រ ខេត្តកណ្តាល ។
បើយោងតាមលិខិតជូនដំណឹងរបស់រដ្ឋបាលខេត្តកណ្តាលមានខ្លឹមសារ ៖ ស្តីពីការផាកពិន័យអន្តរការណ៍លើបុគ្គលដែលមិនអនុវត្តនូវកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ក្នុងភូមិសាស្ត្រខេត្តកណ្តាល ។ ច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរបំផុត អនុក្រឹត្យលេខ ៣៧ អនក្រ .បក ចុះថ្ងៃទី១២ ខែមីនា ឆ្នាំ២០២១ ស្តីពីវិធានការសុខាភិបាល ដើម្បីទប់ស្កាត់ ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ប្រកាសអន្តរក្រសួងលេខ ១៧៨ សហវ.ប្រក ចុះថ្ងៃទី១៩ ខែមីនា ឆ្នាំ២០២១ របស់ក្រសួងសេដ្ឋកិច្ច និងហិរញ្ញវត្ថុ និងក្រសួងសុខាភិបាល ប្រកាសលេខ០៨១ ស.នក.ប្រក ចុះថ្ងៃទី២២ ខែមីនា ឆ្នាំ២០២១ របស់ក្រសួងសុខាភិបាល ។
លិខិតលេខ ០៨៨ សុខល ចុះថ្ងៃទី២៤ ខែមីនា ឆ្នាំ២០២១ របស់ក្រសួងសុខាភិបាល – លិខិតលេខ ៨៣៣ សជណ ចុះថ្ងៃទី២៧ ខែមីនា ឆ្នាំ២០២១ របស់ក្រសួងមហាផ្ទៃ ។ សេចក្តីដូចមានចែងក្នុងកម្មវត្ថុ និងយោងខាងលើ ខ្ញុំសូមជម្រាបជូនលោក អភិបាលនៃគណៈអភិបាល ក្រុង ស្រុក និងជាប្រធានគណៈបញ្ជាការឯកភាពរដ្ឋបាលក្រុងស្រុកជ្រាបថា ក្រសួងសុខាភិបាលបានកំណត់យកខេត្តកណ្តាលជាភូមិសាស្ត្រដែលមានការឆ្លងរាលដាលនៃជំងឺកូវីដ-១៩ ក្នុង « ព្រឹត្តិការណ៍សហគមន៍ ២០ កុម្ភៈ» ដែលតម្រូវឱ្យមានការអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ដើម្បីចូលរួមសហការ ក្នុងការទប់ស្កាត់ការឆ្លងរាលដាលជំងឺកូវីដ-១៩ និងកាត់ផ្តាច់នូវខ្សែចម្លងក្នុងសហគមន៍ ។ ដើម្បីធានាប្រសិទ្ធភាពការងារនេះ រដ្ឋបាលខេត្ត សូមណែនាំដល់ លោក អភិបាលនៃគណៈអភិបាល ក្រុង ស្រុក និងជាប្រធានគណៈបញ្ជាការឯកភាពរដ្ឋបាលក្រុង ស្រុក ត្រូវអនុវត្តតាមគោលការណ៍ណែនាំដូចខាងក្រោម ៖ ១. ត្រូវរៀបចំផ្សព្វផ្សាយអប់រំតាមគ្រប់មធ្យោបាយ ដើម្បីបញ្ជ្រាបការយល់ដឹងដល់ប្រជាពលរដ្ឋ និងសាធារណជន ដែលកំពុងស្នាក់នៅ ប្រកបអាជីវកម្ម និងធ្វើដំណើរឆ្លងកាត់ភូមិសាស្ត្រខេត្តកណ្តាល ឱ្យចូលរួមអនុវត្ត កាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាពក្នុងអំឡុងពេលនៃការឆ្លងរាលដាលជំងឺកូវីដ-១៩ ក្នុងសហគមន៍ និងទោសពិន័យដែលមានចែងក្នុងច្បាប់ និងលិខិតបទដ្ឋានគតិយុត្តជាធរមាន ។
២.ត្រូវចូលរួមសហការឱ្យបានជិតស្និទ្ធជាមួយមន្ត្រីសុខាភិបាលក្នុងការអនុវត្តការផាកពិន័យអន្តរការណ៍លើបុគ្គល ឬនីតិបុគ្គលដែលមិនអនុវត្តនូវកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាពបុគ្គល ស្របតាមច្បាប់ និងលិខិតបទដ្ឋានគតិយុត្តជាធរមាន ។
៣.ត្រូវរាយការណ៍ជាបន្ទាន់ជូនគណៈបញ្ជាការឯកភាពរដ្ឋបាលខេត្តអំពីការលំបាក ឬបញ្ហាប្រឈមណាមួយក្នុងពេលចាត់ចែងអនុវត្តការងារជាក់ស្តែង ដើម្បីផ្តល់ការអន្តរាគមន៍គាំទ្រ និងចាត់វិធានការដោះស្រាយបានទាន់ពេលវេលា ។ ទទួលបានសេចក្តីជូនដំណឹងនេះ សូម លោកអភិបាលនៃគណៈអភិបាលក្រុង ស្រុក និងជាប្រធានគណៈបញ្ជាការឯកភាពរដ្ឋបាលក្រុង ស្រុក ជ្រាប និងចាត់ចែងអនុវត្តឱ្យបានខ្ជាប់ខ្ជួនតាមខ្លឹមសារខាងលើ ប្រកបដោយស្មារតីម្ចាស់ការ និងទទួលខុសត្រូវខ្ពស់ ៕
ចែករំលែកព័តមាននេះ