រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា ជំរុញឲ្យវិស័យឯកជន ដៃគូអភិវឌ្ឍន៍ ស្ថាប័នរដ្ឋ អង្គការមិនមែនរដ្ឋាភិបាល និងប្រជាពលរដ្ឋឲ្យយល់ច្បាស់អំពីតួនាទី និងអត្ថប្រយោជន៍នៃវិស័យទេសចរណ៍ក្នុងការអភិវឌ្ឍសេដ្ឋកិច្ច
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា ជំរុញឲ្យវិស័យឯកជន ដៃគូអភិវឌ្ឍន៍ ស្ថាប័នរដ្ឋ អង្គការមិនមែនរដ្ឋាភិបាល និងប្រជាពលរដ្ឋឲ្យយល់ច្បាស់អំពីតួនាទី និងអត្ថប្រយោជន៍នៃវិស័យទេសចរណ៍ក្នុងការអភិវឌ្ឍសេដ្ឋកិច្ច និងសង្គមកិច្ច ហើយអះអាងថា វិស័យនេះចូលរួមចំណែកយ៉ាងសំខាន់ក្នុងការអភិរក្សសម្បត្តិវប្បធម៌ ការការពារបរិស្ថាន ធនធានធម្មជាតិ និងកាត់បន្ថយភាពក្រីក្ររបស់ប្រជាពលរដ្ឋ ។
ការអំពាវរបស់ប្រមុខរាជរដ្ឋាភិបាលកម្ពុជា ធ្វើឡើងក្នុងឱកាសនៃការអបអរសាទរនៃទិវាទេសចរណ៍ពិភពលោក នៅថ្ងៃទី២៧ ខែកញ្ញា ខាងមុខនេះ ក្រោមប្រធានបទ« មួយពាន់ លានទេសចរ-មួយពាន់លានកាលានុវត្តភាព » ដែលធ្វើឡើងជាផ្លូវការនូវប្រទេសបួគីណាហ្វាសូ ។
សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍យ៉ាងដូច្នេះថា ៖ « ទិវាទេសចរណ៍ពិភពលោកនេះ ដើរតួយ៉ាងចម្បងក្នុងការពង្រឹងនិងពង្រីកកិច្ចសហប្រតិបត្តិការជាតិ និងអន្តរជាតិ ដោយផ្សារភ្ចាប់វិស័យទេសចរណ៍ទៅនឹងវិស័យនានា ។ ទេសចរណ៍ពិភពលោកបាននិងកំពុងស្ថិតក្នុងដំណាក់កាលលូតលាស់យ៉ាងឆាប់រហ័សក្នុងរយៈពេលប៉ុន្មានទសវត្សរ៍ចុងក្រោយនេះ ។ ជាក់ស្តែងភ្ញៀវទេសចរពិភពលោកមានការកើនឡើងលើសពីការរំពឹងទុកដែលនៅឆ្នាំ២០១៣ មានចំនួន ១.០៨៧លាននាក់ នៅឆ្នាំ២០១៤មានចំនួន ១.១៣៨លាននាក់ ក្នុងនោះកម្ពុជាទទួលបានភ្ញៀវទេសចរអន្តរជាតិសរុបប្រមាណ៤,២លាននាក់នៅឆ្នាំ២០១៣ និងចំនួន៤,៥លាននាក់នៅឆ្នាំ២០១៤ » ។
យោងតាមសារលិខិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងទិវាទេសចរណ៍ពិភពលោកក្រោមប្រធានបទ «មួយពាន់លានទេសចរ-មួយពាន់លានកាលានុវត្តភាព » បានបង្ហាញថា វិស័យទេសចរណ៍នៅកម្ពុជាដែលជាទេសចរណ៍វប្បធម៌និងធម្មជាតិ បាននិងកំពុងបោះជំហានរីកចម្រើនយ៉ាងខ្លាំងជាលំដាប់ ដោយរក្សាបាននូវស្ថិរភាពកំណើនជារៀងរាល់ឆ្នាំ និងបានរួមចំណែកប្រមាណជាង១០ភាគរយ នៃផលិតផលក្នុងស្រុកសរុប ។
សក្តានុពលនៃវិស័យទេសចរណ៍ត្រូវបានរាជរដ្ឋាភិបាលកម្ពុជាចាត់ទុកជាវិស័យអាទិភាពដោយសារវិស័យនេះមិនត្រឹមតែបង្កើតនូវកាលានុវត្តភាពការងារ លើកកម្ពស់កម្រិតជីវភាពរស់នៅរបស់ប្រជាពលរដ្ឋ និងបង្កើនចំណូលជាតិប៉ុណ្ណោះទេ ប៉ុន្តែវាថែមទាំងទាក់ទាញការវិនិយោគផ្ទាល់ពីបរទេស និងរូបិយប័ណ្ណអន្តរជាតិ ដែលជាកត្តារួមចំណែកដល់ការអភិវឌ្ឍសេដ្ឋកិច្ច សង្គម និងកាត់បន្ថយភាពក្រីក្រ។ នេះបើយោងតាមយោងតាមសារលិខិតរបស់សម្តេចអគ្គមហាសេនាបតីតេជោ ហ៊ុន សែន ។
លោក ហូ វណ្ឌី ទីប្រឹក្សាសភាពាណិជ្ជកម្មកម្ពុជា និងជាប្រធានក្រុមហ៊ុន និងជានាយកគ្រប់គ្រងក្រុមហ៊ុនភ្នាក់ងារទេសចរណ៍ Tours & Travel មានប្រសាសន៍ប្រាប់កោះសន្តិភាពថា ក្នុងនាមជាក្រុមហ៊ុន នៅក្នុងវិស័យឯកជនលោកមានគោលនយោបាយផ្សព្វផ្សាយដល់ប្រជាពលរដ្ឋកម្ពុជាក្នុងដំណើរកម្សាន្តផ្សេងៗ ជាមួយនឹងកញ្ចប់ទស្សនកិច្ចដែលមានតម្លៃសមរម្យ ផ្តល់ឱកាសដល់និស្សិតដែលសិក្សាលើជំនាញទេសចរណ៍ដើម្បីឲ្យពួកគាត់ស្វែងយល់ពីការទាក់ទាញនូវផលិតផលទេសចរណ៍ពិតប្រាកដមួយ និងការផ្សព្វផ្សាទេសចរណ៍រួមគ្នារវាងក្រុមហ៊ុនទេសចរណ៍ និងក្រុមហ៊ុនទេសចរណ៍ផ្សេងៗទៀតនៅក្រៅប្រទេសដើម្បីឲ្យមានទេសចរណ៍ដើរនៅក្នុងតំបន់។
លោក ហូ វណ្ឌី មានប្រសាសន៍យ៉ាងដូច្នេះថា៖ « វា[វិស័យទេសចរណ៍]ស្រូបយកនូវកម្លាំងពលកម្មច្រើនមែនទែន ទាំងប្រយោលនិងត្រង់ ហើយវាជាវិស័យទី២ បន្ទាប់ពីកសិកម្ម ដូចយើងឃើញហើយការស្រូបយកនូវកម្លាំងពលកម្មជិត១លាននាក់ ទាំងប្រយោលនិងដោយត្រង់ អាចចូលជាលាននាក់ក៏ថាបាន កន្លងមកទេសចរណ៍នាំមុខវិនិយោគ » ។
លោក លូ ម៉េង សហប្រធានក្រុមការងារវិស័យទេសចរណ៍ឯកជន-រាជរដ្ឋាភិបាលមានប្រសាសន៍ប្រាប់កោះសន្តិភាពថា វិស័យឯកជននិងផ្នែករដ្ឋ ធ្វើការរួមគ្នាក្នុងការផ្សព្វផ្សាយទៅ លើវិស័យទេសចរណ៍ដើម្បីទាក់ទាញទាំងភ្ញៀវជាតិ និងអន្តរជាតិ ។ លោកថា វិស័យឯកជនបានស្នើសុំឲ្យមានកម្មវិធីប្រចាំខែសម្រាប់ឆ្នាំ២០១៦ ដូចជា បុណ្យទន្លេ ឬបុណ្យសមុទ្រ ជាដើម ឬហៅថាកម្មវិធីក្នុងស្រុក ហៅថា(Dmestic Event) ហើយឆ្នាំ២០១៦-២០១៧ខាងមុខ ខាងផ្នែកវិស័យទេសចរណ៍ឯកជននិងរដ្ឋស្នើសុំឲ្យមានជាកម្មវិធីប្រចាំខែមួយ បានន័យថាក្នុងមួយខែមានកម្មវិធីមួយសម្រាប់បរទេសមកកម្សាន្តនៅកម្ពុជាវិញ ដែលហៅថា ប្រម៉ូសិនអុីវីន (Promotion Event) ដើម្បីស្រូបយកភ្ញៀវបរទេសមកកម្ពុជា ។
លោក លូ ម៉េង មានប្រសាសន៍បញ្ជាក់ថា៖ « វាជាចំណុចសំខាន់ណាស់ដែលយើងចង់បានភ្ញៀវចូលរួមវិនិយោគនៅស្រុកយើង ជើងទីមួយគាត់មកគឺទេសចរណ៍ហ្នឹង ហើយកាលណាសេវាល្អគាត់មកវិញ គាត់វិនិយោគបន្ត ហើយបើកាលណាគាត់ចាប់ផ្តើមវិនិយោគ គាត់បង្កើតការងារឲ្យច្រើន អុីចឹងទេសចរណ៍ជាមុខមាត់របស់ប្រទេសជាតិ យើងឃើញថាទេសចរណ៍ល្អ ប្រទេសយើងក៏មានមុខមាត់ល្អដែរ » ។
ទន្ទឹមនឹងការរីកចម្រើននៃវិស័យទេសចរណ៍នៅកម្ពុជាគួរឲ្យកត់សម្គាល់ក្នុងប៉ុន្មានឆ្នាំចុងក្រោយនេះ ប៉ុន្តែធនធានមនុស្សក្នុងផ្នែកមួយនេះនៅតែជាចំណោទបញ្ហាទាំងវិស័យឯកជន និងរដ្ឋ ។
សហប្រធានក្រុមការងារវិស័យទេសចរបានលើកឡើងថា ធនធានមនុស្សលើវិស័យទេសចរណ៍នៅកម្ពុជាមិនទាន់គ្រាន់ទេ កម្ពុជាត្រូវការធនធានមនុស្សបន្ថែមទៀត ខណៈពេលដែលសណ្ឋាគារបើកថ្មីចូលប្រមាណជា៦០ ភោជនីយដ្ឋានចូលជិត២០០ជារៀងរាល់ឆ្នាំនៅទូទាំងប្រទេស ។
ដោយឡែក លោក ហូ វណ្ឌី ក៏បានលើក ឡើងពីកង្វះខាតធនធានមនុស្សក្នុងវិស័យទេសចរណ៍ដែរថា ធនធានមនុស្សកន្លែងមួយចំនួននៅតែខ្វះខាត ដូចជាមានការទាញយកបុគ្គលិកពីគ្នាទៅវិញទៅមក និងមានការដេញថ្លៃ ជាដើម ។ មួយវិញទៀត ដោយសារតែបញ្ហាចំណាកស្រុកទៅបរទេសច្រើន ដូចជាថៃ ម៉ាឡេស៊ី កូរ៉េ សង្ហិបុរី ដែលជាប្រទេសស្រូបយកកម្លាំងពលកម្មរបស់យើងច្រើន ។
លោកវណ្ឌី មានប្រសាសន៍ថា ៖ « កាលខ្ញុំ នៅជាអតីតប្រធានក្រុមការងារទេសចរណ៍ ខ្ញុំបានស្នើសុំឲ្យមានការបណ្តុះបណ្តាលនៅសាកលវិទ្យាល័យ និងបណ្តុះបណ្តាលនូវវិជ្ជាជីវៈទេសចរណ៍តែមួយឲ្យវាសមមូលនៅក្នុងស្តង់ដាអាស៊ាន » ។
តាមរបាយការណ៍ពីក្រសួងទេសចរណ៍ក្នុងរយៈពេល៦ខែឆ្នាំ២០១៥នេះ ភ្ញៀវទេសចរបរទេសចូលមកកម្ពុជាប្រមាណជាង៣លាននាក់។ ដោយឡែកក្នុងរយៈពេល៨ខែឆ្នាំ២០១៥នេះ គ្រាន់តែខេត្តព្រះសីហនុទទួលភ្ញៀវទេសចរជាតិនិងអន្តរជាតិប្រមាណជា១លាននាក់ កើនឡើង១៣,៣៣ភាគរយ បើធៀបនឹងរយៈពេលដូចគ្នាកាលពីឆ្នាំ២០១៤៕
ចែករំលែកព័តមាននេះ