រាជធានីភ្នំពេញ ៖ មកទល់ពេលនេះ ស្ថានភាពកូវីដ-១៩ កាន់តែផ្ទុះខ្លាំងឡើងនៅក្នុងប្រទេសកម្ពុជា ដោយបណ្ដាគម្រោងសាងសង់
មួយចំនួនត្រូវគេឃើញផ្អាក ឬមានការលុបចោលនោះផង ។ ក្នុងនោះមានការភ័យបារម្ភមិនតិចទេ ដោយសារតែគម្រោងសាងសង់ពហុកីឡដ្ឋានមរតកតេជោ គឺសុទ្ធតែត្រូវការអ្នកឯកទេសជំនាញមកពីប្រទេសចិន ដែលក្នុងពេលនេះត្រូវគេដឹងថា មានការប៉ះពាល់រឿងពិបាកឡើងចុះគ្នា ។ យ៉ាងណាក៏ដោយ ទិន្នន័យបង្ហាញចុងក្រោយនៅចុងខែមីនានេះ គឺគម្រោងសាងសង់នៅពហុកីឡដ្ឋានមួយនេះ អត់មានការពន្យារពេល ឬប៉ះពាល់ទេ ផ្ទុយទៅវិញ គឺមានតែត្រូវបានបញ្ចប់តាមការគ្រោងទុក។
បើទោះបីជាកម្ពុជាកំពុងស្ថិតនៅក្នុងវិបត្តិជំងឺកូវីដ-១៩ដោយសារព្រឹត្តិការណ៍សហគមន៍២០ កុម្ភៈ នៅឡើយក្តី ប៉ុន្តែដំណើរការសាងសង់កីឡដ្ឋានធំនៃពហុកីឡដ្ឋានជាតិមរតកតេជោ ស្ថិតនៅខណ្ឌជ្រោយចង្វា រាជធានីភ្នំពេញ នៅតែបន្តដំណើរការដោយរលូន ហើយ
នឹងសម្រេចបានតាមផែនការដែលបានគ្រោងទុក ខណៈការបំពាក់កៅអីសម្រេចបានជាង១២.០០០កៅអីហើយ គិតមកដល់ថ្ងៃទី២៣ ខែមីនា ឆ្នាំ២០២១នេះ ។
លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ ហៅកាត់ គ.ជ.ប.អ (CAMSOC) បានបង្ហាញពីការសាទរយ៉ាងខ្លាំង ដែលគម្រោងសាងសង់ទាំងមូលកាន់តែត្រូវបានពន្លឿន ហើយជាងជំនាញទាំងខ្មែរ និងចិន បានពុះពាររួមគ្នាសម្រេចផែនការនេះឡើង ធ្វើឱ្យលោកមើលឃើញពីការទទួលខុសត្រូវមួយដ៏ល្អក្នុងការងារមួយនេះ។
មកដល់ពេលនេះ បច្ចុប្បន្នភាពនៃដំណើរការសាងសង់កីឡដ្ឋានធំនៃពហុកីឡដ្ឋានជាតិមរតកតេជោ កំពុងបន្តការសាងសង់ដោយរលូនជាប្រក្រតី ដោយអាចនិយាយបានថា គឺអាចនឹងបញ្ចប់ការសាងសង់នាអំឡុងចុងខែឧសភា ឆ្នាំ២០២១ ។ លោកថា ទីលានបាល់ទាត់ គឺជាគម្រោងដ៏សំខាន់ ដែលមានការភ័យបារម្ភថា ធ្វើមិនទាន់ តែបើតំបន់សំខាន់នេះរួចរាល់តាមការគ្រោងទុក នោះគឺជារឿងសម្រេចតាមផែនការហើយ ។
លោកបន្តថា ពេលនេះ ការបំពាក់កៅអីអង្គុយសម្រាប់កីឡដ្ឋានធំ (Main Stadium) សម្រេចបានជាង១២.០០០កៅអីហើយ គឺនៅសល់តែជាង៤០.០០០កៅអីទៀតប៉ុណ្ណោះ ដោយក្នុង១ថ្ងៃៗ ការបំពាក់កៅអី សម្រេចបានប្រមាណ៨០០កៅអី ហើយនឹងអាចរួចរាល់ជាស្ថាពរនៅក្នុងខែមេសា ឆ្នាំ២០២១។ ចំពោះការដាំស្មៅលើទីលានបាល់ទាត់ គឺបានដាំពេញទីលានរួចរាល់ហើយ នៅសល់តែផ្លូវរត់អត្តពលកម្មអមជុំវិញទីលានបាល់ទាត់ប៉ុណ្ណោះ ដែលតាមផែនការរៀបចំតុបតែងនានា កំពុងពន្លឿនឲ្យបានឆាប់រហ័សផងដែរ ។ លោកអគ្គលេខាធិការបន្ថែមថា ខាងភាគីចិនកំពុងពន្លឿនផែនការសាងសង់នេះឲ្យបានឆាប់រហ័ស ដោយទាំងវិស្វករកម្មករចិន-ខ្មែរទាំងអស់ ត្រូវបានអនុវត្តវិធានការ
បង្ការជំងឺកូវីដ-១៩ ដោយមិនអនុញ្ញាតឲ្យចេញចូលនោះទេ ពោលគឺអ្នកធ្វើការសាងសង់កីឡដ្ឋានធំនេះ ស្នាក់នៅ ហូបចុក នៅទីនេះតែម្តង។ នេះគឺជាដំណើរការវឌ្ឍនភាពការងារនៃការងារសាងសង់ពហុកីឡដ្ឋានធំនៃពហុកីឡដ្ឋានជាតិមរតកតេជោ ។
សូមបញ្ជាក់ថា ពហុកីឡដ្ឋានជាតិមរតកតេជោ គឺជាកន្លែងរៀបចំពិធីបើក-បិទព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ហើយក៏ជាកន្លែងប្រកួតកីឡាមួយភាគធំនៅទីនោះដែរ ដែលព្រះរាជាណាចក្រកម្ពុជា ទទួលធ្វើម្ចាស់ផ្ទះការប្រកួតកីឡាថ្នាក់តំបន់អាស៊ីអាគ្នេយ៍មួយនេះ ជាលើកដំបូងក្នុងប្រវត្តិសាស្ត្ររបស់ខ្លួន ។ ជាមួយនឹងគម្រោងជិតរួចរាល់ នៃពហុកីឡដ្ឋានមួយនេះ បានធ្វើឱ្យកម្ពុជាកាន់តែងាយស្រួលក្នុងការត្រៀមខ្លួន ដើម្បីទទួលរៀបចំស៊ីហ្គេម២០២៣ ថ្វីដ្បិតតែក្នុងអំឡុងពេលនេះ ជំងឺកូវីដ-១៩រីករាលដាលខ្លាំងពាសពេញពិភពលោក ហើយមិនទាន់ស្ងប់ស្ងាត់ ។ លោកថា ពហុកីឡដ្ឋាននេះ ក្រោយពេលរួចរាល់ គឺនឹងបើកទ្វារឱ្យចូលទស្សនានោះផង ដើម្បីដឹងពីការប្រឹងប្រែងទម្រាំតែចេញរូបរាង៕
ចែករំលែកព័តមាននេះ