ខេត្តកណ្តាល ៖ កាលពីវេលាម៉ោង៨ព្រឹកថ្ងៃទី២៤ ខែមីនា ឆ្នាំ២០២១ មានករណីអគ្កិភ័យឆាបឆេះរោងបាយកម្មករ នៅរោងចក្រខ្សែភ្លើង ឃ្យុងស៊ីង ដែលមានទីតាំងស្ថិតនៅតំបន់សេដ្ឋកិច្ចពិសេស7NG ក្នុងភូមិវិហារសួគ៌ ឃុំវិហារសួគ៌ ស្រុកខ្សាច់កណ្ដាល ខេត្តកណ្តាល ។
របាយការណ៍ពីសមត្ថកិច្ចបានឱ្យដឹងថា ក្នុងហេតុការណ៍ខាងលើនេះបានបណ្ដាលអោយមានកម្មករម្នាក់ រងរបួសស្រាល គឺឈ្មោះ ភឹម រដ្ឋា ភេទប្រុស អាយុ២៤ឆ្នាំ ជាកម្មករផ្នែកជាង រស់នៅភូមិព្រៃចាស់ឃុំវិហារសួគ៌ ស្រុកខ្សាច់កណ្ដាល និងខូចខាតសម្ភារៈ មានដូចជា ម៉ាស៊ីនភ្លើងធំចំនួន១គ្រឿង ម៉ាស៊ីនស្កេនក្រយៅដៃ១៥គ្រឿង តុបាយ កៅអី និង កង្ហារ មួយចំនួន ។
ម្ចាស់រោងចក្រឈ្មោះ ចាង សាងហូ ភេទប្រុស អាយុ៤៦ឆ្នាំ ជនជាតិកូរ៉េខាងត្បូង ហើយរោងចក្រខាងលើមានកម្មករ-កម្មការិនីសរុបចំនួន១៦៧៥នាក់ដែលកំពុងធ្វើការងារ ។
សមត្ថកិច្ចបានធ្វើការសន្និដ្ឋានថា ដោយសារឆ្លងចរន្តអគ្គិសនីនៅក្បែររោងបាយកម្មករ ហើយបានឆាបឆេះផ្នែករោងម៉ាស៊ីនរហូតរាលដាលដល់រោងបាយ តែមិនឆេះដល់កន្លែងធ្វើការរបស់កម្មករឡើយ ។
ក្នុងហេតុការណ៍៍ខាងលើនេះ សមត្ថកិច្ចបានប្រើរថយន្តពន្លត់អគ្គីភ័យស្រុកខ្សាច់កណ្ដាល១គ្រឿងនិងរថយន្តពន្លត់អគ្គិភ័យរបស់ 7NG ចំនួន២គ្រឿង ទើបភ្លើងរលត់ទាំងស្រុង ៕
ចែករំលែកព័តមាននេះ