ខេត្តព្រះវិហារ ៖ កូនឈើបេងនិងធ្នង់ប្រមាណ៥ម៉ឺនដើម ដែលបានដាំនៅលើផ្ទៃដីជាង១០០ហិកតា នៅក្នុងតំបន់ឧទ្យានជាតិតេជោសែនឫស្សីត្រឹប ក្នុងស្រុកឆែប ខេត្តព្រះវិហារត្រូវបានឆេះអស់ស្ទើរតែទាំងស្រុង ។ ដើមឈើដែលក្លាយជាចំណីព្រះអគ្គីនេះ បានដុះកម្ពស់លិចក្បាលទៅហើយ…
ខេត្តព្រះវិហារ ៖ កូនឈើបេងនិងធ្នង់ប្រមាណ៥ម៉ឺនដើម ដែលបានដាំនៅលើផ្ទៃដីជាង១០០ហិកតា នៅក្នុងតំបន់ឧទ្យានជាតិតេជោសែនឫស្សីត្រឹប ក្នុងស្រុកឆែប ខេត្តព្រះវិហារត្រូវបានឆេះអស់ស្ទើរតែទាំងស្រុង ។ ដើមឈើដែលក្លាយជាចំណីព្រះអគ្គីនេះ បានដុះកម្ពស់លិចក្បាលទៅហើយ ។ មូលហេតុនៃការឆេះនេះត្រូវបានប្រភពនានាសន្និដ្ឋានថាមកពីជនខិលខូចលួចដុត ។
ករណីជនមិនស្គាល់អត្តសញ្ញាណលួចដុតដើមឈើ ដាំក្នុងឧទ្យានជាតិតេជោសែនឫស្សីត្រឹប គឺជាលើកទី១ ប៉ុន្តែនៅមានបទល្មើសលួចកាប់ដើមឈើធំៗជាច្រើនទៀតក៏កើតមាននៅក្នុងឧទ្យានជាតិផងដែរ ដែលត្រូវបានអ្នករស់នៅក្បែរនោះ បាននាំគ្នាលួចចូលកាប់បំផ្លាញដើមឈើធំៗប្រមាណ៣០០ដើម និងនៅតែបន្តរងការកាប់បំផ្លាញ ។ ហើយដើមឈើប្រភេទខុសៗគ្នារាប់រយដើមដែលបានកាប់បំផ្លាញនោះ គឺត្រូវបានរកឃើញក្នុងផ្ទះអ្នកដែលរស់នៅក្នុងឧទ្យាននោះ ។
ជុំវិញករណីលួចដុតកូនឈើប្រណីតទាំងនេះ លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានមានប្រសាសន៍នៅក្នុងវីដេអូឡាយ តាមប្រព័ន្ធហ្វេសប៊ុកថា «កូនឈើប្រណីតៗទាំងអស់នោះ ជាការខិតខំប្រឹងប្រែងដាំឡើងវិញក្រោមអធិបតីភាពរបស់ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា អញ្ជើញមកដាំ ដើម្បីផ្ដល់ជាធនធានធម្មជាតិទុកដល់ក្មេងជំនាន់ក្រោយ អាចថែរក្សាបន្តទៀតទៅថ្ងៃខាងមុខ ។ ត្រូវបានជនអគតិ ធ្វើការដុតបំផ្លាញ ដែលកូនឈើទាំងនេះ ភាគច្រើនជាប្រភេទឈើបេង ឈើធ្នង់ មានចំនួនជាង៥ម៉ឺនដើម» ។
បើតាមលោកបណ្ឌិត សុខ ទូច ការដុតបំផ្លាញនេះមិនមែនជាការដុត ដើម្បីដេញសត្វព្រៃនោះទេ គឺមានបំណងតែម្ដងដែលបានដុត៣កន្លែងនៃផ្ទៃដី១០០ហិកតា ហើយចាប់ផ្ដើមឆេះពីម៉ោង១១ព្រឹករហូតដល់ម៉ោង៤រសៀលថ្ងៃទី១៤ មីនា ។ ប្រធានរាជបណ្ឌិត្យសភាកម្ពុជារូបនេះ រៀបរាប់ពីអារម្មណ៍សោកស្ដាយខ្លាំងជាពន់ពេក បន្ទាប់ពីបានឃើញសភាពកូនឈើប្រណីតឈើដែលខំដាំទាំងនោះ ត្រូវបានឆេះអស់ស្ទើរទាំងស្រុងក្នុងរយៈពេលមួយពព្រិចភ្នែក ដោយសារជនអគតិ ឈ្លានីស និងដោយសារកម្លាំងជំនួយក្នុងការពន្លត់មានចំនួនតិចពេក មិនអាចជួយពន្លត់បានទាន់ពេលវេលា ។ ដើម្បីរក្សាព្រៃឈើ សត្វព្រៃឱ្យនៅគង់វង្សសម្រាប់កូនចៅជំនាន់ក្រោយ រាជបណ្ឌិត្យសភា បានអប់រំឱ្យគាត់ស្រឡាញ់ព្រៃឈើអស់រយៈពេល២ឆ្នាំមកហើយ និងសុំឱ្យកុំកាប់ព្រៃឈើ កាប់ឈើរានយកដី ប៉ុន្តែគាត់អាចអាស្រ័យអនុផលព្រៃឈើមានដូចជា ផ្សិត វល្លិ ទំពាំង ។ល។
បន្ថែមពីនេះ រាជបណ្ឌិត្យសភាក៏បានបង្កើតការងារឱ្យគាត់មកចិញ្ចឹមមេគោទឹកដោះ ចៀម ពពែ ដើម្បីឱ្យគាត់អាចរក្សាបាននូវវប្បធម៌របស់ខ្លួន ដូចជាការរៀបចំយកជ័រពីដើមច្បោះ (ជ័រត្រាចជាដើម) និងទីតាំងឡស្លដែកបុរាណ ដែលសុទ្ធសឹងតែជាវប្បធម៌របស់ជនជាតិគួយ ដែលជាជនជាតិដើមភាគតិច ។
សូមបញ្ជាក់ថា ឧទ្យានរាជបណ្ឌិត្យសភាកម្ពុជាតេជោសែន ឫស្សីត្រឹបត្រូវបានបង្កើតឡើងដោយព្រះរាជក្រឹត្យលេខ នស/រកត/០៤១៤/៤៣៦ ចុះថ្ងៃទី១៧ ខែមេសា ឆ្នាំ២០១៤ មានផ្ទៃដីសរុបចំនួន ១១៤.៣៥គីឡូម៉ែតការ៉េ មានទីតាំងស្ថិតក្នុង ឃុំឆែប១ និងឃុំឆែប២ ស្រុកឆែប ខេត្តព្រះវិហារ ។ ឧទ្យាននេះមានតំបន់ជីវចម្រុះ និងមានសក្តានុពលជាច្រើនរួមមាន៖ ធនធានព្រៃឈើ សត្វព្រៃ កេរដំណែលប្រវត្តិសាស្ត្រ បុរាណវត្ថុ (ឡស្លដែកបុរាណ) និងជាតិពិន្ធុ ដែលអាចបម្រើឱ្យមុខងារក្នុងវិស័យបរិស្ថាន ព្រៃឈើ វប្បធម៌ប្រវត្តិសាស្ត្រ និងទេសចរណ៍ច្រើនយ៉ាង ៕
ចែករំលែកព័តមាននេះ