ខេត្តតាកែវ ៖ រូបសំណាកសម្គាល់ខេត្តតាកែវ មានរូប ព្រះវិស្ណុ ត្រូវបានអាជ្ញាធរសង់រួចរាល់ហើយ នៅមានច្រើនកន្លែងទៀត តាមបណ្ដាក្រុងស្រុកនីមួយៗ ដូចជា៖ រូបតាកែវយាយកែវ…
ខេត្តតាកែវ ៖ រូបសំណាកសម្គាល់ខេត្តតាកែវ មានរូប ព្រះវិស្ណុ ត្រូវបានអាជ្ញាធរសង់រួចរាល់ហើយ នៅមានច្រើនកន្លែងទៀត តាមបណ្ដាក្រុងស្រុកនីមួយៗ ដូចជា៖ រូបតាកែវយាយកែវ រូបព្រះនាងលីវយី(នាងនាគ) រូបតាសោម រូបលោកតាប្រាជ្ញឈួន រូបផ្ការំដួល រូបផ្កាឈូក ។ល។ នាពេលខាងមុខ នឹងមានរូបសំណាកដ៏ប្រណីត ២បន្ថែមទៀត ដែលមិនធ្លាប់ឃើញទេ ពីមុនមកនោះ គឺរូបសំណាក បង្កង និង ពងទាកូន ។
លោក អ៊ូច ភា អភិបាល នៃគណៈអភិបាលខេត្តតាកែវ អមដំណើរដោយលោក-លោកស្រី ប្រធានមន្ទីរអង្គភាពជុំវិញខេត្ត និងមន្ត្រីជំនាញពាក់ព័ន្ធ បានអញ្ជើញចុះពិនិត្យសកម្មភាពការកែលម្អរ តាមដងផ្លូវចូលក្រុងដូនកែវ និងសិក្សាគំរោងស្ថាបនារូបសំណាក បង្កង និងរូបសំណាក ពងទាកូន ដែលជាមុខម្ហូប ដ៏មានសក្កានុពល ប្រចាំខេត្តតាកែវ ។
ក្នុងឱកាសចុះពិនិត្យនៅព្រឹកថ្ងៃទី១៥ ខែមីនា ឆ្នាំ២០២១នោះដែរ លោកអភិបាលខេត្ត ក៏បានណែនាំដល់ក្រុមការងារស្ថាបនាទាំងអស់ ត្រូវធ្វើស្របទៅតាមស្ដង់ការបច្ចេកទេស ឲ្យបានត្រឹមត្រូវ និងបានឆាប់រហ័ស ព្រោះថា ការកែលម្អរនេះ ពិតជាមានសារសំខាន់ណាស់ សម្រាប់លើសម្រស់ ក៏ដូចជាសោភ័ណ្ឌក្រុងដូនកែវ របស់យើង ដើម្បីជាផ្នែកមួយ សម្រាប់ទាក់ទាញភ្ញៀវទេសចរណ៍ជាតិ និងអន្តរជាតិ បានចូលមកទស្សនាឲ្យបានច្រើនកុះករ ។
ដោយឡែកសម្រាប់គំរោងស្ថាបនា រូបសំណាក «បង្កង» និងរូបសំណាក «ពងទាកូន» ក៏ត្រូវបានលោក អ៊ូច ភា អភិបាលខេត្ត បានណែនាំដល់មន្ត្រីជំនាញពាក់ព័ន្ធទាំងអស់ ត្រូវសិក្សាអំពីគម្រោងនេះ ឲ្យបានជាក់លាក់ និងទទួលយករាល់មតិរបស់សាធារណៈទាំងអស់ មកពិនិត្យមើល ទៅតាមស្ថានភាពជាក់ស្ដែង ។
ជុំវិញការគ្រោងនឹងសាងសង់រូបសំណាកទាំង២នេះដែរ តាមរយៈមតិរបស់សាធារណៈជន មានតែរូបសំណាក «ពងទាកូន» មួយប៉ុណ្ណោះ ដែលរងនូវការរិះគន់ជាច្រើនលើសលុប នៅលើបណ្តាញសង្គមហ្វេសប៊ុករបស់រដ្ឋបាលខេត្តតាកែវ ។
បើយោងតាមលោកបណ្ឌិត
យ៉ង សាំងកុមារ បង្ហាញទស្សនៈមិនយល់ស្របថា «ពងទាកូន ឃុំស្រែរនោង ស្រុកត្រាំកក់ខេត្តតាកែវ ជាកន្លែងដែលកសិករបានចាប់ផ្តើមភ្ញាស់ពងទា របៀបសិប្បនិមិត្តមុនគេ កាលពីប្រមាណជាង៧០ឆ្នាំមុន (អ្នកស្រែរនោងគួរសាងសង់រូបអ្នកដែលនាំមកនូវបច្ចេកទេសភ្ញាស់ពងទាមុនគេដែលគាត់ដូចជាមានដើមកំណើតមកពីស្រុកចិន) ។ ក្រោយមកចំណេះដឹងនេះ បានសាយភាពទៅខេត្តផ្សេងទៀត ជាពិសេសខេត្តកំពង់ចាម និងបាត់ដំបង ។
យើងគួរទទួលស្គាល់ស្នាដៃប្រវត្តិសាស្ត្រអ្នកស្រែរនោង ក្នុងការងារនេះ ។ ក្នុងនាមខ្ញុំជាអ្នកស្រុកត្រាំកក់ខេត្តតាកែវ ការយកពងទាកូន ជាសំណង់និមិត្តរូបខេត្តតាកែវ ដូចជាមិនសមស្របទេ ដោយសារផលិតផលពងទាកូន មិនមានគុណសម្បត្តអ្វី ដែលពិសេសលើសគេ ហើយនៅខេត្តណា ក៏មានផលិតពងទាកូនឆ្ងាញ់ដែរ ។ ទន្ទឹមនេះក៏មានអ្នកខ្លះមិនគាំទ្រការបរិភោគពងទាកូន ដោយមូលហេតុសាសនា និងសីលធម៌ផងដែរ ។
ការសាងសង់សំណង់និមិត្តរូបគួររើសអ្វីមួយ ដែលពិសេសទាំងភូមិសាស្ត្រ ទាំងប្រវត្តិសាស្ត្រ និងទាំងគុណតម្លៃ នៃផលិតផល ។ ផលិតផល សូត្រស្រុកព្រៃកប្បាស អាចជាជម្រើសមួយដែរ ។ រូបនាគ ឬស្តេចនាគ ក៏អាចជាជម្រសមួយដែរ បើចង់បាននិមិត្តរូប ដែលជាលក្ខណ: វប្បធម៌ និងប្រវត្តិសាស្ត្រនគរគោកធ្លក ។ល។
ខ្ញុំយល់ថា រដ្ឋបាលខេត្តតាកែវ គួរធ្វើការស្ទង់មតិ ប្រជាពលរដ្ឋខេត្តតាកែវជាពិសេស ក្នុងចំណោមចាស់ទុំ ក្នុងការសម្រេចចិត្តសារជាថ្មី» ។
សរុបមកតាមរយៈការ (ខមិន Comment) សាធារណៈជនភាគច្រើន បានបញ្ចេញមតិដូចៗគ្នា ក្នុងន័យ មិនគាំទ្រ អោយរដ្ឋបាលខេត្តតាកែវសាងសង់រូបសំណាក «ពងទាកូន» ឡើយ ៕
ចែករំលែកព័តមាននេះ