ខេត្តព្រះសីហនុ ៖ មន្ត្រីរដ្ឋបាលខេត្តព្រះសីហនុថ្លែងថា គិតមកត្រឹមថ្ងៃទី១២ ខែមិនា ឆ្នាំ២០២១នេះ ទីតាំងធ្វើចត្តាឡីសក័មួយចំនួន ក្នុងក្រុងព្រះសីហនុ អាជ្ញាធរ រដ្ឋបាលខេត្តបានរំសាយវិញជាបណ្តើរៗហើយ…
ខេត្តព្រះសីហនុ ៖ មន្ត្រីរដ្ឋបាលខេត្តព្រះសីហនុថ្លែងថា គិតមកត្រឹមថ្ងៃទី១២ ខែមិនា ឆ្នាំ២០២១នេះ ទីតាំងធ្វើចត្តាឡីសក័មួយចំនួន ក្នុងក្រុងព្រះសីហនុ អាជ្ញាធរ រដ្ឋបាលខេត្តបានរំសាយវិញជាបណ្តើរៗហើយ ក្រោយដំណើរការរយៈពេល១៤ថ្ងៃ តាមបច្ចេកទេសក្រសួងសុខាភិបាល និងបញ្ចប់ការធ្វើតេស្តមិនមានអ្នកវិជ្ជមានមេរោគ ។
មន្ត្រីដដែលបន្ថែមថា លទ្ធផលនេះរដ្ឋបាលខេត្តព្រះសីហនុ បានថ្លែងអំណរគុណចំពោះម្ចាស់ទីតាំង ភ្ញៀវ និងពលរដ្ឋដែលបានសហការល្អក្នុងការធ្វើចត្តាឡីស័កបានជោគជ័យ និងថ្លែងអំណរគុណចំពោះគ្រូពេទ្យ មន្ត្រីសុខាភិបាល មន្ត្រីរាជការ កងកម្លាំងមានសមត្ថកិច្ច និងផ្នែកពាក់ព័ន្ធក៏ដូចជា សប្បុរសជន ដែលបានចូលរួមអស់ពីកម្លាំងកាយចិត្តក្នុងយុទ្ធនាការទប់ស្កាត់ជំងឺកូវីដ១៩ នៅខេត្តព្រះសីហនុ ។
ទោះជាយ៉ាងនេះក្តី រដ្ឋបាលខេត្តព្រះសីហនុនៅតែអំពាវនាវឲ្យពលរដ្ឋបន្តចូលរួមការពារប្រុងប្រយត្ន័ជាចាំបាច់ និងសហការអនុវត្តន៍គ្រប់វិធានការដែលរដ្ឋបាលខេត្តដាក់ចេញ ដើម្បីធានាថាការប្រយុទ្ធប្រឆាំងមេរោគកូវីដ១៩ ឆ្លងចូលសហគមន៍ទទួលបានជោគជ័យ ។
សុំបញ្ជាក់ថា ឯកឧត្តមគួច ចំរើន អភិបាលខេត្តព្រះសីហនុបានចេញសារក្រើនរំលឹកជាបន្តបន្ទាប់ ឲ្យពលរដ្ឋចូលរួមក្នុងនោះមានការអំពាវនាវចំពោះបងប្អូនដែលត្រូវធ្វើចត្តាឡីស័ក សូមរក្សាខ្លួនអោយបានល្អ ហើយក្នុងករណីល្មើសនឹងវិធានចត្តាឡីស័កណាមួយបងប្អូននឹងប្រឈមការពិន័យ និងវិធានការផ្លូវច្បាប់បន្ថែមទៀត ។
ដោយឡែកចំពោះបងប្អូនដែលដឹងថា ខ្លួនមានជាប់ពាក់ព័ន្ធផ្ទាល់ ឬដោយប្រយោល សូមអញ្ជើញមកធ្វើតេស្ដ ដើម្បីស្វែងរកមេរោគកូវីដ-១៩ ។ បងប្អូនប្រជាពលរដ្ឋដែលមិនមានការចាំបាច់ សូមកុំចាកចេញពីផ្ទះមួយរយៈសិន ដើម្បីទុកពេលវេលាបានគ្រប់គ្រាន់ដល់អាជ្ញាធរកងកម្លាំងសមត្ថកិច្ច ក្រុមគ្រូពេទ្យ អាចគ្រប់គ្រងស្ថានការណ៍ និងបញ្ចប់ការឆ្លងជំងឺកូវីដ-១៩ បានទាន់ពេលវេលាវិលទៅរកប្រក្រតីភាពឡើងវិញបានឆាប់រហ័ស ៕
ចែករំលែកព័តមាននេះ