ភ្នំពេញ៖ ច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ត្រូវបានប្រមុខរដ្ឋស្តីទី សម្តេច សាយ ឈុំ ចុះហត្ថលេខាលើព្រះរាជក្រឹត្យ ប្រកាសឲ្យប្រើប្រាស់ហើយ នៅថ្ងៃទី១១ ខែមីនា ឆ្នាំ២០២១។
ច្បាប់ថ្មីនេះ មាន ០៦ជំពូក និង១៨មាត្រា បានកំណត់កម្រិតទោសព្រហ្មទណ្ឌ ចំពោះអ្នកល្មើស និងបើកសិទ្ធិឱ្យរាជរដ្ឋាភិបាល បិទតំបន់ពាក់ព័ន្ធនឹងជំងឺកូវីដ១៩។
មាត្រា៤ នៃច្បាប់នេះ រដ្ឋាភិបាលកម្ពុជា អាចដាក់ចេញនូវវិធានការមួយចំនួនជាបណ្តោះអាសន្ន រួមមាន ហាមឃាត់ការធ្វើដំណើរ ហាមឃាត់ការជួបជុំ ហាមឃាត់ការធ្វើពាណិជ្ជកម្ម និងហាមឃាត់សកម្មភាពការងារនៅកន្លែងណាមួយ និងអាចបិទតំបន់ណាមួយ ដែលមានជំងឺកូវីដ-១៩ ឆ្លងរាលដាល។
មាត្រា៥ ក្នុងច្បាប់នេះ បានកំណត់ថា ទីតាំងអាជីវកម្ម នឹងត្រូវបិទចោល ព្យួរ ឬដកហូតអាជ្ញាបណ្ណ បើទីតាំងអាជីវកម្មនោះ មិនអនុវត្តតាមវិធានការរបស់រដ្ឋាភិបាល ខណៈមាត្រា៦ ចែងថា អ្នកគេចវេះពីការធ្វើចត្តាឡីស័ក និងអ្នក ដែលលួចរត់ចេញពីកន្លែងធ្វើចត្តាឡីស័ក ហើយចម្លងជំងឺកូវីដ-១៩ ដល់អ្នកដទៃ ត្រូវពិន័យប្រាក់ពី ២លានរៀល ដល់ ១០លានរៀល ព្រមទាំងត្រូវជាប់ពន្ធនាគារពី ៦ខែ ទៅ ៣ឆ្នាំ។
មាត្រា ៨ បានកំណត់ថា អ្នកគេចវេះពីការព្យាបាលជំងឺកូវីដ-១៩ ឬលួចរត់ចេញពីកន្លែងព្យាបាល ត្រូវពិន័យពី ៥លានរៀល ដល់ ២០លានរៀល ព្រមទាំងអាចជាប់ពន្ធនាគារពី ១ឆ្នាំ ដល់ ៥ឆ្នាំ ហើយបើឆ្លងដល់អ្នកដទៃ អ្នកនោះ នឹងត្រូវមានទោសកាន់តែធ្ងន់ គឺត្រូវដាក់ពន្ធនាគារពី ៥ឆ្នាំ ដល់ ១០ឆ្នាំ។
មាត្រា៩ នៃច្បាប់ថ្មីនេះ បានចែងថា អ្នកដែលមានចេតនាចម្លងជំងឺកូវីដ-១៩ ដល់អ្នកដទៃ ត្រូវដាក់ពន្ធនាគារពី ៥ឆ្នាំ ទៅ ១០ឆ្នាំ ហើយបើចេតនាក្នុងការចម្លងដល់អ្នកដទៃនេះ ត្រូវបានរកឃើញថា ធ្វើឡើង ដោយមានការរៀបចំជាក្រុម ឬមានអង្គការចាត់តាំង អ្នកនោះ នឹងត្រូវជាប់ពន្ធនាគារ កាន់តែយូរ គឺពី ១០ឆ្នាំ ទៅ ២០ឆ្នាំ៕
ចែករំលែកព័តមាននេះ