រាជធានីភ្នំពេញ ៖ លោក ង៉ែត ជូ អ្នកប្រឹក្សាពីហិរញ្ញវត្ថុឯករាជ្យម្នាក់បានលើកឡើងថា ការចំណាយ​ថវិកាតាមការចង់ ឬការចំណាយលុយទិញរបស់អ្វីមួយនៅពេលមានការបញ្ចុះតម្លៃ​នោះមិនមែនជាការចំណាយត្រឹមត្រូវនោះឡើយ ប្រសិនរបស់នោះមិនមែនជាតម្រូវ​ការចាំបាច់នៅក្នុងការប្រើប្រាស់​ ។ លោកថា មុននឹងទិញសម្ភារៈអ្វីមួយត្រូវសួរ​ខ្លួនឯងឲ្យបាន ២ទៅ ៣ដង ថាខ្លួនការប្រើប្រាស់របស់នោះចាំបាច់កម្រិតណា ។

លោកបានលើកឡើងដូច្នេះ «សួរខ្លួនឯងតើអ្នកប្រាកដជាត្រូវការ​សម្ភារៈ​នោះចាំ​បាច់ ឬទេ ? បើទិញហើយតើអ្នកនឹងប្រើប្រាស់សម្ភារៈនោះញឹកញាប់ប៉ុណ្ណា ឬហៅថា ប្រើ​អោយអស់ថ្លៃ ឬទេ ? មិនគួរទិញសម្ភារអ្វីមួយដែលអ្នកគ្រាន់តែចង់បាន ឬដោយសារ​តែគេបញ្ចុះតម្លៃ» ។

អ្នកមានបទពិសោធន៍ខាងសន្សំរូបនេះ បានលើកជាឧទាហរណ៍ថា «រដូវចូលឆ្នាំខ្មែរ​ក្រុមហ៊ុនលក់កាបូបស្ពាយបញ្ចុះតម្លៃពី ១០០ដុល្លាមកត្រឹម ៦០ដុល្លា ។ ប្រសិនបើអ្នក​មិនត្រូវ​ការប្រើចាំបាច់នោះទេ ហើយអ្នកទិញព្រោះតែជាឱកាសបញ្ចុះតម្លៃ (ទិញរួច អ្នកមិនសូវប្រើហើយទុកចោលក្នុងទូ) នោះអ្នកមិនមែនចំណេញ ៤០ដុល្លានោះទេ គឺផ្ទុយទៅវិញអ្នកខាតអស់ ៦០ដុល្លា ។

ការលើកឡើងរបស់លោក ង៉ែត ជូ ដូចខាងលើនេះ បានទាក់ទងទៅនឹងរបៀប​សន្សំប្រាក់ ។ អ្នកសន្សំប្រាក់ដែលទទួលលទ្ធផលល្អ មួយចំនួនបានលើក​ឡើងថាមុនធ្វើការ​ចំណាយលើអ្វីមួយ គេត្រូវសួរខ្លួនឯងឲ្យបានពីរទៅបីដងថាតើទិញ​របស់នោះដើម្បីតែចង់ទិញឬជាតម្រូវការ​ ។ បើជាតម្រូវការចាំទិញ ប៉ុន្តែបើគ្រាន់តែជាចង់​ទិញ ដូចលោក ង៉ែត ជូ បានលើកឡើងថា ទិញនៅពេលគេបញ្ចុះតម្លៃនោះទេ គឺមិនចំណេញដោយ ការទិញរបស់បែបនេះនឹងធ្វើឲ្យការសន្សំ បរាជ័យ​ ៕