ខេត្តស្វាយរៀង ៖ ជន២នាក់មកពីខេត្តកំពង់ចាមបានធ្វើសកម្មភាពលួចលុយព្រះសង្ឃក្នុងវត្ត និងត្រូវបានប្រជាពុទ្ធបរិស័ទឃើញប្តឹងសមត្ថកិច្ច បើករថយន្តដេញតាមចាប់រហូតបំបុកម៉ូតូដួលទើបចាប់ខ្លួនបាន ។ ករណីនេះកើតឡើងកាលពីវេលាម៉ោងប្រមាណ១១ព្រឹកថ្ងៃទី៤ ខែមីនា ឆ្នាំ២០២១ ខណៈព្រះសង្ឃនិមន្តទៅឆាន់ចង្ហាន់ថ្ងៃត្រង់…
ខេត្តស្វាយរៀង ៖ ជន២នាក់មកពីខេត្តកំពង់ចាមបានធ្វើសកម្មភាពលួចលុយព្រះសង្ឃក្នុងវត្ត និងត្រូវបានប្រជាពុទ្ធបរិស័ទឃើញប្តឹងសមត្ថកិច្ច បើករថយន្តដេញតាមចាប់រហូតបំបុកម៉ូតូដួលទើបចាប់ខ្លួនបាន ។ ករណីនេះកើតឡើងកាលពីវេលាម៉ោងប្រមាណ១១ព្រឹកថ្ងៃទី៤ ខែមីនា ឆ្នាំ២០២១ ខណៈព្រះសង្ឃនិមន្តទៅឆាន់ចង្ហាន់ថ្ងៃត្រង់ ។
បើតាមសមត្ថកិច្ចឲ្យដឹងថា ជនសង្ស័យទាំង២នាក់នេះ ម្នាក់ឈ្មោះ ណុំ ណែត ភេទប្រុស អាយុ២៥ឆ្នាំ ជិះម៉ូតូម៉ាកCBR ពាក់ផ្លាកលេខ សៀមរាប ១P-៦៩៧៦ និងម្នាក់ទៀតឈ្មោះ គ្រឿន វីរៈ ភេទប្រុស អាយុ៣៣ឆ្នាំជិះម៉ូតូម៉ាក WINER ពាក់ផ្លាកលេខ ភ្នំពេញ១AA-៧៨៨៩ ។ ទាំង២នាក់ពុំមានមុខរបរពិតប្រាកដទេ រស់នៅភូមិថ្នា ឃុំស្តើងជ័យ ស្រុកជើងព្រៃ ខេត្តកំពង់ចាម បានឡើងទៅលើកុដិ រួចហើយលួចយកលុយរបស់ព្រះសង្ឃអស់ចំនួន២៨៧.០០០រៀល ។
ប្រភពដដែលឲ្យដឹងទៀតថា ក្រោយពីធ្វើសកម្មភាពរួច ជនសង្ស័យទាំង២នាក់បានជិះម៉ូតូទៅទិសខាងត្បូងតាមផ្លូវជាតិលេខ១៣។ ខណៈនោះអ្នកស្រុកបានឃើញ ទើបទូរស័ព្ទទាក់ទងទៅសមត្ថកិច្ចឲ្យជួយអន្តរាគមន៍តាមចាប់ជនសង្ស័យ ហើយសមត្ថកិច្ចក៏បានចេញអន្តរាគមន៍ភ្លាមៗតែម្ដង ។
វរសេនីយ៍ឯក សំ សំអុល អធិការនគរបាលស្រុករមាសហែក បានបញ្ជាទៅគ្រប់គោលដៅឲ្យស្ទាក់ចាប់ ។ ចំណែកជនសង្ស័យពេលជិះម៉ូតូដល់គោលដៅអនុវត្តច្បាប់ចរាចរណ៍ ក៏បត់ត្រឡប់ក្រោយវិញ ហើយនគរបាលស្រុករមាសហែកដែលដឹងភិនភាគហើយនោះ បានបើករថយន្តដេញតាមនិងកៀរឲ្យដួលទើបឃាត់ខ្លួនបានទាំង២នាក់ ។
ជាមួយនឹងការចាប់ឃាត់ខ្លួននេះ សមត្ថកិច្ចបានដកហូតម៉ូតូដែលក្រុមចោរជិះធ្វើសកម្មភាពទាំង២គ្រឿង រួមនឹងវត្ថុតាងជាប្រាក់ចំនួន២៨៧.០០០រៀល ។ ជនសង្ស័យ ត្រូវបានកសាងសំណុំរឿងបញ្ជូនទៅស្នងការដ្ឋាននគរបាលខេត្តចាត់ការទៅតាមនីតិវិធី ៕
ចែករំលែកព័តមាននេះ