ប្រយ័ត្ន​! ជំងឺ​ក្លន​លូន អាច​បង្ក​គ្រោះ​ថ្នាក់​​ធ្ងន់ធ្ងរ​បាន​! – Koh Santepheap Daily

ADផ្ទាំងផ្សព្វផ្សាយពាណិជ្ជកម្ម

Picture

ប្រយ័ត្ន​! ជំងឺ​ក្លន​លូន អាច​បង្ក​គ្រោះ​ថ្នាក់​​ធ្ងន់ធ្ងរ​បាន​!

1 ខែ មុន
  • Phnom Penh

រាជធានី​ភ្នំពេញ ៖ ជំងឺ​ក្លន​លូន គឺជា​ការ​បិទ​មិន​ជិត​ពី​កំណើត (congénitale) ឬ​ការ​យារ​ធ្លាក់ (faibless) នៃ​ស្រោម​គ្រប​ពោះ ដែល​បណ្តាល​ឲ្យ​ផ្នែក​មួយ​នៃ​ពោះវៀន​លូន​ចេញ ហើយ​បង្កើត​បានជា​ដុំ​ពក​មួយ​នៅ​ក្រោម​ស្បែក​។…

រាជធានី​ភ្នំពេញ ៖ ជំងឺ​ក្លន​លូន គឺជា​ការ​បិទ​មិន​ជិត​ពី​កំណើត (congénitale) ឬ​ការ​យារ​ធ្លាក់ (faibless) នៃ​ស្រោម​គ្រប​ពោះ ដែល​បណ្តាល​ឲ្យ​ផ្នែក​មួយ​នៃ​ពោះវៀន​លូន​ចេញ ហើយ​បង្កើត​បានជា​ដុំ​ពក​មួយ​នៅ​ក្រោម​ស្បែក​។ នេះ​ជា​បកស្រាយ​របស់​លោក​វេជ្ជបណ្ឌិត ប្លោក វុ​ឌ្ឍី ឯក​ទេស​វះកាត់​ប្រព័ន្ធ​រំលាយ​អាហារ​នៃ​មន្ទីរពេទ្យ​កាល់​ម៉ែ​ត ។

លោក​វេជ្ជបណ្ឌិត ប្លោក វុ​ឌ្ឍី ក៏​បាន​ប្រាប់​ឲ្យ​ដឹង​ទៀត​ថា ៖
មូលហេតុ ៖ កត្តា​មួយ​ចំនួន​ដែល​បណ្តាល​ឲ្យ​កើត​ជំងឺ​ក្លន​លូន​មាន ៖

Picture
  • កត្តា​ពី​កំណើត ៖ ទារក​ខ្លះ​កើតមក​អាច​មាន​ក្លន​លូន​ពី​កំណើត អាច​បាត់​ទៅ​វិញ​ដោយ​ខ្លួនឯង​មុន​អាយុ​២​ឆ្នាំ​។
  • ភាព​ចាស់ ឬ​យារ ៖ នៅ​ពេល​វ័យ​ចាស់ជរា
  • មូលហេតុ​មួយ​ផ្សេង​ទៀត​របស់​ក្លន​លូន គឺ​បណ្តាល​មក​ពី​ការ​លើក​របស់​ធ្ងន់​ៗ​ពេក ឬ​ការ​ប្រឹង​ខ្លាំង​ពេក (​ចំពោះ​ស្ត្រី ដូច​ជា​ពេល​សម្រាលកូន​)​។

រោគ​សញ្ញា ៖ ជំងឺ​នេះ អាច​កើតជា​រោគ​សញ្ញា​ដូច​ជា ៖

  • កើតឡើង​ដោយ​ស្ងៀមស្ងាត់​។
  • ជា​ដុំ​ពក​នៅ​ក្បែរ​ក្រលៀន ឬ​ស្រោមពង​ស្វាស (​ប្រុស និង​ស្រី​អាច​កើត​មាន​ដូច​គ្នា​) ។
  • ករណី​មិន​ទាន់​មាន​ផល​លំបាក (complication) ដុំ​ពក​កើត​មាន ឬ ប៉ោង​ធំ​នៅ​ពេល​ប្រឹង ឬ​ក្អក ជា​ដុំ​ពក​ទន់​នៅ​ក្បែរ​ក្រលៀន ឬ​ធ្លាក់​ចូល​ក្នុង​ស្រោមពង​ស្វាស​។
  • ករណី​មាន​ក្លន​លូន ហើយ​មិន​បាន​ព្យាបាល​ត្រឹមត្រូវ វា​នឹង​វិវត្តន៍​ទៅ​ជា​ដុំ​ពក​ធំ​រមួល ឬ​អាច​រលួយ​ពោះវៀន ដែល​ធ្លាក់​ចូល​រន្ធ​ក្លន​នោះ ហើយ​អ្នកជំងឺ​មាន​រោគ​សញ្ញា​ដូច​ជា ចុកពោះ ចង់​ក្អួត ទល់លាមក​។

សម្គាល់ ៖ ការ​ឡើង​ហើម​កូនកណ្តុរ ក៏​អាច​បណ្តាល​ឲ្យ​មាន​ដុំ​ពក​ត្រង់​ក្រលៀន​ដែរ ដែល​គេ​អាច​ច្រឡំ​គ្នា ដែល​ជា​ជំងឺ​ផ្សេង​មួយទៀត​។

Picture

គ​) ការ​ការពារ និង​ការ​ព្យាបាល ៖
វិធី​ដែល​អាច​ការពារ និង​ព្យាបាល​ជំងឺ​ក្លន​លូន​មាន ៖

  • ជៀសវាង​ការ​ប្រើ​កំលាំង ឬ​លើក​របស់​ធ្ងន់​ៗ​ពេក
  • ប្រើ​ខ្សែ​ក្រ​វ៉ា​ត់​ទ្រ​កន្លែង​ដែល​មាន​ក្លន
  • ប្រឹក្សា​យោបល់​ជាមួយ​វេជ្ជបណ្ឌិត​ជំនាញ
  • បើ​ក្លន​លូន​ប៉ោង​ធំ អាច​សាកល្បង​រុញ​វា​បញ្ចូល​ទៅ​វិញ ដោយ​ឲ្យ​អ្នកជំងឺ​ដេក​លើកជើង​ឱ្យ​ខ្ពស់​ជាង​ក្បាល ហើយ​សង្កត់​ថ្នម​ៗ​ទៅ​លើ​កន្លែង​ដែល​ប៉ោង​នោះ​។ បើ​រុញ​វា​មិន​ចូល​វិញ​ទេ​ត្រូវ​ឈប់​ភ្លាម ហើយ​ស្វែងរក​ជំនួយ​ពី​គ្រូពេទ្យ​ជំនាញ​ជា​បន្ទាន់​។
  • ក្នុង​ករណី​ក្លន​មានការ​ឈឺចាប់​យ៉ាង​ខ្លាំង ឬ​បណ្តាល​ឲ្យ​មាន​ក្អួត ហើយ​អ្នកជំងឺ​ទល់លាមក​គ្មាន​បត់ជើងធំ​ទេ នោះ​អាច​ជា​សញ្ញា​គ្រោះថ្នាក់​។ ត្រូវ​មក​ជួប​ពិគ្រោះ​ជាមួយ​គ្រូពេទ្យ​ជំនាញ ដែល​អាច​ត្រូវ​ធ្វើការ​វះកាត់​ជា​ចាំបាច់​។

លោក​វេជ្ជបណ្ឌិត ប្លោក វុ​ឌ្ឍី ឯកទេស​វះកាត់​ប្រព័ន្ធ​រំលាយ​អាហារ​នៃ​មន្ទីរពេទ្យ​កាល់​ម៉ែ​ត បាន​សូមពរ​ដល់​លោក​អ្នក​បើ​មាន​រោគ​សញ្ញា​ដូច​បាន​រៀបរាប់​ខាងលើ សូម​បងប្អូន​អញ្ជើញ​មក​ពិគ្រោះ​​ប្រឹក្សា​ជា​បន្ទាន់​ជាមួយ​គ្រូពេទ្យ​ជំនាញ​នៃ​មន្ទីរពេទ្យ​កាល់​ម៉ែ​ត ដើម្បី​ទទួល​បានការ​ពន្យល់​​លំអិត​អំពី​ស្ថានភាព​នៃ​ជំងឺ និង​វិធីសាស្ត្រ​នៃ​ការ​ព្យាបាល ទាន់​ពេលវេលា ដើម្បី​ជៀសវាង​បង្ក​គ្រោះថ្នាក់ និង​ផលវិបាក​ធ្ងន់ធ្ងរ ៕