ជប៉ុនបន្តផ្តល់ឥណទានឥតសំណងជាង១១ម៉ឺនដុល្លារលើវិស័យអប់រំកាយនិងកីឡានៅកម្ពុជា
- ភ្នំពេញ
រាជធានីភ្នំពេញ ៖ នៅថ្ងៃទី ៥ ខែ មីនា ឆ្នាំ ២០២១ ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុន…
រាជធានីភ្នំពេញ ៖ នៅថ្ងៃទី ៥ ខែ មីនា ឆ្នាំ ២០២១ ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុន…
រាជធានីភ្នំពេញ ៖ នៅថ្ងៃទី ៥ ខែ មីនា ឆ្នាំ ២០២១ ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុន ប្រចាំព្រះរាជាណាចក្រកម្ពុជា បានចុះហត្ថលេខាលើកិច្ចសន្យា ផ្តល់ជំនួយឥតសំណង សម្រាប់គម្រោងទ្រង់ទ្រាយតូចផ្នែកវប្បធម៌គូសាណូណិ និងគម្រោងទ្រង់ទ្រាយតូចសន្តិសុខមនុស្សជាតិគូសាណូណិ ប្រមាណជាទឹកប្រាក់ជាង ១១ម៉ឺនដុល្លារអាមេរិក។
ឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូត បានថ្លែងនៅថ្ងៃចុះកិច្ចសន្យានេះថា ៖ «ខ្ញុំបានចុះហត្ថលេខាលើកិច្ចសន្យាផ្តល់ជំនួយឥតសំណងសម្រាប់គម្រោងទ្រង់ទ្រាយតូចផ្នែកវប្បធម៌គូសាណូណិ និងគម្រោងទ្រង់ទ្រាយតូចសន្តិសុខមនុស្សជាតិគូសាណូណិ។ យើងបានចុះហត្ថលេខាលើកិច្ចសន្យាផ្តល់ជំនួយឥតសំណង តាមរយៈការផ្លាស់ប្តូរកិច្ចសន្យាតាមប្រៃសណីយ៍ ដោយមិនមានការប្រារព្ធពិធីទេ ដោយសារការឆ្លងរីករាលដាលចូលសហគមន៍នៃវីរុស កូវីត១៩ កាលពីថ្ងៃទី២០ ខែកុម្ភៈ និងដើម្បីកាត់បន្ថយហានិភ័យពាក់ព័ន្ធនឹងវីរុសកូវីត១៩។ ខ្ញុំសង្ឃឹមយ៉ាងមុតមាំថា ស្ថានភាពនឹងមានភាពប្រសើរឡើងក្នុងពេលឆាប់ៗនេះ»។
ឯកឧត្តម មិកាមិ ម៉ាសាហ៊ីរ៉ូ បានបន្តថា ចាប់តាំងពីឆ្នាំ ១៩៩១ បន្ថែមលើគម្រោងឥណទាននិងជំនួយឥតសំណងខ្នាតធំ រដ្ឋាភិបាលជប៉ុនបាននិងកំពុងអនុវត្តគម្រោង KUSANONE នៅកម្ពុជា ដើម្បីជួយដល់អាជ្ញាធរមូលដ្ឋាន និងអង្គការក្រៅ រដ្ឋាភិបាលក្នុងការអនុវត្តគម្រោងរបស់ពួកគាត់។ KUSANONE មានន័យថា “ឬសស្មៅ” ក្នុងភាសា ជប៉ុន។ នៅក្នុងរយៈពេល ៣ទស្សវតន៍ចុងក្រោយនេះ ស្ថានទូតជប៉ុនប្រចាំប្រទេសកម្ពុជា បានចូលរួមចំណែកក្នុងគម្រោងជាង៦០០ តាមរយៈជំនួយឥតសំណង KUSANONE។ យើងមានសេចក្តីសោមនស្សរីករាយដែលគម្រោងទាំងនេះ បានចូលរួមចំណែកដោយផ្ទាល់ ក្នុងការកែលម្អគុណភាពនៃជីវភាពរបស់ប្រជាជនកម្ពុជានៅកម្រិតមូលដ្ឋាន និងការលើកកម្ពស់វប្បធម៌ និងការអប់រំថ្នាក់ឧត្តមសិក្សានៅកម្រិតមូលដ្ឋាន។
លោកសូមណែនាំពត៌មានលម្អិតអំពីគម្រោងទាំងពីរដែលបានចុះហត្ថលេខា ដូចខាងក្រោម៖
១. នៅក្នុងគម្រោងទី១ ”គម្រោងសាងសង់ផ្លូវរត់អត្តពលកម្មចំនួន ៨ ខ្សែ នៅវិទ្យាស្ថានជាតិអប់រំកាយ និងកីឡា” និងការទទួលជំនួយនេះ ដោយវិទ្យាស្ថានជាតិអប់រំកាយ និងកីឡា (NIPES) ក្រោយជំនួយពីរដ្ឋាភិបាលជប៉ុន ដែលនឹងផ្តល់ថវិកា ៩០,៦៤០ ដុល្លារអាមេរិក។ គម្រោងនេះនឹងត្រូវបានគាំទ្រតាមរយៈជំនួយឥតសំណងសម្រាប់គម្រោងទ្រង់ទ្រាយតូចផ្នែកវប្បធម៌ ដែលជួយសម្របសម្រួលការផ្លាស់ប្តូរវប្បធម៌ និងរឹតចំណងមិត្តភាពនិងការយោគយល់គ្នាឲ្យកាន់តែខ្លាំងឡើង រវាងប្រទេសជប៉ុននិងប្រទេសកម្ពុជា តាមរយៈការគាំទ្រដល់ការកសាងហេដ្ឋារចនាសម្ព័ន្ធនានា ដើម្បីលើកកម្ពស់វប្បធម៌ និងការអប់រំថ្នាក់ឧត្តមសិក្សានៅកម្ពុជា។ គរុសិស្ស និងគ្រូប្រមាណ ៤០០នាក់ នៅ NIPES និងសិស្សជាង ៩៣ម៉ឺននាក់មកពីសាលារៀនជិតខាង នៅកម្ពុជា នឹងអាចប្រើប្រាស់ផ្លូវរត់អត្តពលកម្មថ្មីនេះ សម្រាប់ការប្រលង និងព្រឹត្តិការណ៍កីឡាផ្សេងៗ ព្រមទាំងអាចទទួលបានការអប់រំកាយប្រសើរជាងមុន។
២. នៅក្នុងគម្រោងទី២ ”គម្រោងសាងសង់កន្លែងលាងដៃនៅក្នុងសាលារៀនចំនួន៦ នៅភាគខាងលិចនៃខេត្តស្ទឹងត្រែង” ដែលត្រូវបានទទួលដោយ មន្ទីរអប់រំ យុវជន និងកីឡា ខេត្តស្ទឹងត្រែង។ រដ្ឋាភិបាលជប៉ុននឹងផ្តល់ថវិកាចំនួន ២៥,៥៣៤ ដុល្លារអាមេរិក គម្រោងសាងសង់នៅភាគខាងលិចនៃខេត្តស្ទឹងត្រែង។ រដ្ឋាភិបាលជប៉ុនរំពឹងថា គម្រោងនេះនឹងកែលម្អអនាម័យសម្រាប់សិស្សប្រមាណ ៨៤០នាក់ និងគ្រូ ៨០នាក់ នៅសាលារៀនចំនួន៦ នៅក្នុងតំបន់ ព្រមទាំងជួយការពារពីជម្ងឺឆ្លងផ្សេងៗរួមទាំងកូវីត១៩ផងដែរ។
ឯកឧត្តម មិកាមិ ម៉ាសាហ៊ីរ៉ូបានបន្ថែមថា ៖ «ខ្ញុំមានសេចក្តីសោមនស្សរីករាយដោយសង្កេតឃើញថានាពេលថ្មីៗនេះ ប្រទេសកម្ពុជា បាននិងកំពុងមានការអភិវឌ្ឍយ៉ាងឆាប់រហ័ស។ ទោះបីជាយ៉ាងណាក៏ដោយ ខ្ញុំក៏ទទួលស្គាល់ថានៅតែមានបញ្ហាប្រឈមមួយចំនួនដែលត្រូវដោះស្រាយ ដើម្បីលើកកម្ពស់គុណភាពនៃជីវភាពរស់នៅរបស់ ប្រជាជន។ លើសពីនេះ ការដោះស្រាយឲ្យបានដិតដល់នូវបញ្ហាពាក់ព័ន្ធនឹងសុខភាព និងអនាម័យក៏កាន់តែមានសារៈសំខាន់ផងដែរ ជាពិសេសនៅពេលដែល មានការគម្រាមគំហែងពីវីរុសកូវីត១៩ ទៅទូទាំងពិភពលោក។ ប្រទេសជប៉ុននឹងបន្តចូលរួមចំណែកក្នុងការដោះស្រាយបញ្ហាប្រឈមទាំងនោះ តាមរយៈគ្រោងការណ៍សហប្រតិបត្តិការសេដ្ឋកិច្ច និងអភិវឌ្ឍន៍ផ្សេងៗ រួមទាំង “គូសាណូណិ” ផងដែរ។ ខ្ញុំសូមជូនពរ ឯកឧត្តម លោកជំទាវ លោក លោកស្រី សូមមានសុខភាពល្អ សុភមង្គល និង សូមឲ្យមិត្តភាពជប៉ុន-កម្ពុជាកាន់តែរីកចម្រើន»៕
ចែករំលែកព័តមាននេះ