ខេត្តបាត់ដំបង៖ បុរសជនជាតិខ្មែរម្នាក់ ដែលនាំស្ត្រីជនជាតិថៃចំនួន០២នាក់ឆ្លងដែនដោយខុសច្បាប់ មករកប្ដីនៅស្រុកខ្មែរ ត្រូវបានកម្លាំងសមត្ថកិច្ចឃាត់ខ្លួន កាលពីរសៀលថ្ងៃទី០៤ មីនា នៅចំណុចភូមិគីឡូ១៣ ឃុំសន្តិភាព ស្រុកសំពៅលូន…
ខេត្តបាត់ដំបង៖ បុរសជនជាតិខ្មែរម្នាក់ ដែលនាំស្ត្រីជនជាតិថៃចំនួន០២នាក់ឆ្លងដែនដោយខុសច្បាប់ មករកប្ដីនៅស្រុកខ្មែរ ត្រូវបានកម្លាំងសមត្ថកិច្ចឃាត់ខ្លួន កាលពីរសៀលថ្ងៃទី០៤ មីនា នៅចំណុចភូមិគីឡូ១៣ ឃុំសន្តិភាព ស្រុកសំពៅលូន ហើយនឹងអាចបញ្ជូនទៅកាន់តុលាការទៀតផង ខណ:ស្ដ្រីជនជាតិថៃ០២នាក់ត្រូវបញ្ជូនទៅមណ្ឌលចត្តាឡីស័ក។
សមត្ថកិច្ចបានឱ្យដឹងថា មេខ្យល់នាំមនុស្សឆ្លងដែនខុសច្បាប់រូបនេះឈ្មោះ ហែម ម៉ាប់ អាយុ៣៩ឆ្នាំ នៅភូមិពោជ្រៃ ឃុំសិរីមាជ័យ ស្រុកសំពៅលូន។ ដោយឡែក ស្ត្រីជនជាតិថៃ ម្នាក់ឈ្មោះណាប់ ផាផន អាយុ២៥ឆ្នាំ និងម្នាក់ទៀតឈ្មោះ សុផាផន អាយុ២៣ឆ្នាំ ពួកគេរស់នៅក្រុងបាកក។
បើតាមចម្លើយ មេខ្យល់ខាងលើបានប្រាប់សមត្ថកិច្ចថា ខ្លួនបាននាំស្ត្រីជនជាតិថៃទាំង០២នាក់នោះឆ្លងដែនចូលស្រុកខ្មែរ ដើម្បីស្វែងរកប្ដីដែលជាជនជាតិខ្មែរ។ ខ្លួនបាននាំនារីថៃ នោះឆ្លងដែនតាមច្រករបៀងមួយកន្លែង លុះចូលដល់ទឹកដីខ្មែរក៏ត្រូវកម្លាំងសមត្ថកិច្ចឃាត់ខ្លួនសួរនាំតែម្ដង។
ប្រភពពីសមត្ថកិច្ចបានឲ្យដឹងថា មេខ្យល់និងស្ត្រីជនជាតិថៃ នេះត្រូវបានកម្លាំងនគរបាលវរ:ការពារព្រំដែនលេខ៨១៧ និង កម្លាំងយោធាកងពលលេខ៥៣ ឃាត់ខ្លួនក្រោយឆ្លងដែនពីថៃ មកដល់ដីខ្មែរ ។
ប្រភពដដែលបានបញ្ជាក់ថា ក្រោយពីឃាត់ខ្លួន គេបានបញ្ជូនជនទាំង០៣ទៅកាន់អធិការស្រុកសំពៅលូន ដើម្បីចាត់ការបន្ត។ ប៉ុន្តែបើតាមព័ត៌មានចុងក្រោយ មេខ្យល់ឈ្មោះ ហែម ម៉ាប់ អាចនឹងត្រូវបញ្ជូនទៅតុលាការ រីឯស្ត្រីជនជាតិថៃទាំង០២នាក់ត្រូវបានបញ្ជូនទៅកាន់មណ្ឌលចត្តាឡីស័ក ដែលនៅស្រុកសំពៅលូន ៕
ចែករំលែកព័តមាននេះ