Starbucks នឹងមានវត្តមាននៅកម្ពុជាឆាប់ៗនេះ
រាជធានីភ្នំពេញ ៖ Starbucks ដែលជាក្រុមហ៊ុនបម្រើសេវាអាហារទាន់ចិត្តដ៏ធំជាងគេរបស់សហរដ្ឋអាមេរិក បានប្រកាសបើកសាខាលើកដំបូងរបស់ខ្លួននៅក្នុងប្រទេសកម្ពុជានៅចុងឆ្នាំ២០១៥ខាងមុខនេះ ។
រាជធានីភ្នំពេញ ៖ Starbucks ដែលជាក្រុមហ៊ុនបម្រើសេវាអាហារទាន់ចិត្តដ៏ធំជាងគេរបស់សហរដ្ឋអាមេរិក បានប្រកាសបើកសាខាលើកដំបូងរបស់ខ្លួននៅក្នុងប្រទេសកម្ពុជានៅចុងឆ្នាំ២០១៥ខាងមុខនេះ ។
សាខានេះ តំណាងឲ្យទីផ្សារទី១៦របស់ក្រុមហ៊ុនStarbucks ដែលបង្ហាញពីការកើនឡើងយ៉ាងឆាប់រហ័សក្នុងតំបន់ អាស៊ីប៉ាស៊ីហ្វិក និងប្រទេសចិន ។ នេះបើយោងតាមសេចក្តីប្រកាសព័ត៌មានរបស់ក្រុមហ៊ុន Starbucks ប្រចាំនៅទីក្រុងហុងកុង កាលពីម្សិលមិញ ។
បើយោងតាមសេចក្តីប្រកាសព័ត៌មានឲ្យដឹងថា ទីតាំងដំបូងដែលStarbucks នឹងប្រកាសបើកគឺស្ថិតក្នុងអាកាសយានដ្ឋានអន្តរជាតិភ្នំពេញដែលទើបពង្រីកថ្មី ហើយរំពឹងថា នឹងបើកសាខាទី២នៅទីប្រជុំជននៃរាជធានីភ្នំពេញនាដើមឆ្នាំ២០១៦ ។
លោក John Culver ប្រធានក្រុមហ៊ុនមេរបស់ក្រុមហ៊ុនStarbucks កាហ្វេ ការអភិវឌ្ឍនូវច្រកចែកចាយ និងការបង្កើតBrandថ្មីៗ ប្រចាំនៅប្រទេសចិន និងអាស៊ីប៉ាស៊ីហ្វិក មានប្រសាសន៍ថា កម្ពុជាជាប្រទេសដ៏អស្ចារ្យដែលសម្បូរដោយកេរដំណែលវប្បធម៌ ។ ដូច្នេះហើយ បានជាក្រុមហ៊ុនStarbucksនាំយកនូវបទពិសោធន៍នៃរសជាតិកាហេ្វStarbucksមកកាន់ទីផ្សារកម្ពុជា ។
លោក John Culver មានប្រសាសន៍បញ្ជាក់ថា ៖ « យើងសង្ឃឹមថា យើងនឹងក្លាយជាផ្នែកមួយក្នុងការផ្តល់ជូននូវកាហ្វេក្នុងប្រទេសកម្ពុជា ដោយភ្ចាប់ជាមួយនឹងប្រពៃណីរបស់ខ្លួន និងចែករំលែកទាំងការចង់បានយ៉ាងជ្រាលជ្រៅ និងចំណេះដឹងលើគុណភាពល្អបំផុតនៃកាហ្វេមកពីជុំវិញពិភពលោក » ។
ដោយកសាងនូវទំនាក់ទំនងជាង១៥ឆ្នាំជា មួយក្រុមហ៊ុន Hong Kong Maxim’s Group បានទទួលចុះកិច្ចព្រមព្រៀងបើកសាខាStarbucksនៅកម្ពុជាទៅក្រុមហ៊ុន Coffee Concept (Cambodia) Limited ដែលជាបុត្រសម្ព័ន្ធមួយរបស់ក្រុមហ៊ុន Hong Kong Maxim’s Group ។
ក្រុមហ៊ុន Coffee Concept (Cambodia) Limited នឹងទទួលខុសត្រូវសម្រាប់ការបញ្ជូនចែកចាយនូវបទពិសោធន៍ទាំងឈ្មោះនិងរសជាតិកាហ្វេ Starbucks ទៅកាន់អតិថិជន និងធ្វើឲ្យមានការកើនឡើងនៃBrand នៅក្នុងប្រទេស ។ បទពិសោធន៍របស់ក្រុមហ៊ុន Maxim ក្នុងកិច្ចព្រមព្រៀងនេះបានកសាងនូវការវិនិយោគដ៏ជោគជ័យ និងបានធ្វើឲ្យម៉ាកល្បី Starbucks កើនឡើងក្នុងក្រុងហុងកុងទាំងមូល ម៉ាកាវ និងភាគច្រើនថ្មីៗនេះនៅវៀតណាម ។ នេះបើយោងតាមសេចក្តីថ្លែងការណ៍ ។
Michael Wu ប្រធាននិងនាយកគ្រប់គ្រងក្រុមហ៊ុន Hong Kong Maxim’s Group បានមានប្រសាសន៍ដូច្នេះថា ៖ « យើងសប្បាយរីករាយក្នុងការពង្រីកភាពជាដៃគូរបស់យើងជាមួយ Starbucks នៅកម្ពុជា ហើយនឹងប្រើប្រាស់នូវបច្ចេកទេសទាំងអស់ ចំណេះដឹងនៃម៉ាក Starbucks ដើម្បីនាំយកបទពិសោធន៍Starbucks ទៅកាន់អតិថិជនក្នុងទីផ្សារ » ។
លោក ចាង ប៊ុនលាង នាយកប្រតិបត្តិក្រុមហ៊ុន Brownដែលជាក្រុមហ៊ុនបម្រើសេវាកម្មកាហ្វេ និងអាហារទាន់ចិត្តឈានមុខគេមួយនៅប្រទេសកម្ពុជា មានសុទិដ្ឋិនិយមជាមួយនឹងវត្តមានរបស់ Starbucks មកកាន់កម្ពុជា ។
លោក ចាង ប៊ុនលាង បញ្ជាក់ថា ៖ « តាមពិតវាល្អសម្រាប់ស្រុកខ្មែរដែលមានBrand ចូលមកច្រើន អាចធ្វើឲ្យក្រុមហ៊ុនក្នុងស្រុកដែលបម្រើសេវាកាហ្វេមានភាពច្នៃប្រឌិតនូវអ្វីដែលខ្លូនកំពុងធ្វើ ជាក់ស្តែងដូចជា Brownសព្វថ្ងៃបើយើងមិនខំធ្វើហាងឲ្យថ្មីហើយស្អាត និងស្វែងរកផលិតផលថ្មីៗទៀតទេ អីុចឹង វាមិនល្អ និងអាចទាក់ទាញអតិថិជនបានទេ ដូច្នេះយើងខំធ្វើយ៉ាងម៉េចឲ្យល្អជាងមុន » ។
ចំពោះលោក ប៊ុនលាង ដែលជាស្ថាបនិកវ័យក្មេងរបស់Brownមិនបានព្រួយបារម្ហពីម៉ាកល្បីៗរបស់បរទេសទេ ពីព្រោះ Brownធ្លាប់ឆ្លងកាត់ការប្រកួតប្រជែងជាមួយម៉ាកល្បីៗរបស់បរទេសជាច្រើនហើយ ។ មួយវិញទៀតតម្លៃកាហ្វេរបស់ Brownទាបជាងពី១៥ទៅ២០ភាគ បើប្រៀបធៀបជាមួយកាហ្វេម៉ាកពីបរទេស ។
លោក ប៊ុន លាង បន្តថា តាមផែនការ Brown នឹងពង្រីកសាខា៥បន្ថែមទៀត ខណៈពេលដែលឥឡូវ Brownមានតែ១០សាខាប៉ុណ្ណោះនៅរាជធានីភ្នំពេញ ។
ដោយឡែកសព្វថ្ងៃនេះ Starbucks បានប្រតិបត្តិការជាង៥.២០០ហាង និងផ្តល់ការងារឲ្យបុគ្គលិកច្រើនជាង៨០.០០០នាក់ លើទីផ្សារទាំង១៥នៅក្នុងប្រទេសចិន និងតំបន់អាស៊ីប៉ាស៊ីហ្វិក ។
តាមរយៈការផ្តល់សហការជាដៃគូពី Coffee Concepts (Hong Kong) Limited ដែលជាបុត្រសម្ព័ន្ធឲ្យ Hong Kong Maxim’s Groupនោះ Starbucksបានប្រតិបត្តិការច្រើនជាង១៥០ហាងនៅហុងកុង និងម៉ាកាវ ដូចគ្នានេះដែរ Starbucksបានប្រតិបត្តិការ១៥ហាងនៅវៀតណាម តាមរយៈក្រុមហ៊ុន Viet Idea Food and Beverages Limited ដែលទទួលបានអាជ្ញាប័ណ្ណបន្តពី Coffee Concepts (Vietnam) Limited ។ នេះបើយោងតាមសេចក្តីថ្លែងការណ៍របស់ Starbucks ៕
ចែករំលែកព័តមាននេះ