ខេត្តកំពង់ឆ្នាំង ៖ កុមារអាយុ១ឆ្នាំ៨ខែម្នាក់បានបាត់បង់ជីវិត និងកុមារតូចៗ៥នាក់ទៀត បានរងគ្រោះសម្រាកព្យាបាលនៅមន្ទីរពេទ្យ ដោយសារតែពុលសត្វគីង្គក់ ក្រោយពីពួកគេបានចាប់ រួចក៏នាំគ្នាដុតហូបពេលដែលឪពុកម្ដាយមិននៅផ្ទះ ។ ហេតុការណ៍នេះបានកើតឡើងនៅវេលាម៉ោង៤និង៣០នាទីសៀល…
ខេត្តកំពង់ឆ្នាំង ៖ កុមារអាយុ១ឆ្នាំ៨ខែម្នាក់បានបាត់បង់ជីវិត និងកុមារតូចៗ៥នាក់ទៀត បានរងគ្រោះសម្រាកព្យាបាលនៅមន្ទីរពេទ្យ ដោយសារតែពុលសត្វគីង្គក់ ក្រោយពីពួកគេបានចាប់ រួចក៏នាំគ្នាដុតហូបពេលដែលឪពុកម្ដាយមិននៅផ្ទះ ។ ហេតុការណ៍នេះបានកើតឡើងនៅវេលាម៉ោង៤និង៣០នាទីសៀល ថ្ងៃទី៣ ខែមីនា ឆ្នាំ២០២១ ស្ថិតនៅភូមិត្រពាំងព្នៅ ឃុំច្រេស ស្រុកកំពង់ត្រឡាច ។
តាមការបញ្ជាក់ពីនគរបាលមូលដ្ឋានបានដឹងថា កុមារារងគ្រោះដែលបាត់បង់ជីវិតដោយសារតែពុលសត្វគីង្គក់នោះមានឈ្មោះ ឃិត បូរ៉ា អាយុ១ឆ្នាំ៨ខែ មានឪពុកឈ្មោះ សុខ ឃូឡា និងម្ដាយឈ្មោះ អាន សារិន ។ ចំណែកក្មេងរងគ្រោះ៥នាក់ទៀតមាន ៖ ១-កុមារា ត្រុង វាសនា អាយុ៥ឆ្នាំ, ២-កុមារា ឃតត ពិសិដ្ឋ អាយុ៧ឆ្នាំ, ៣-កុមរា វី សុផារិទ្ធ អាយុ៧ឆ្នាំ, ៤-កុមារី សល់ មីនា អាយុ៨ឆ្នាំ និង៥-កុមារា ឃិត ពៅ អាយុ៤ឆ្នាំ។ កុមារតូចៗទាំងអស់រស់នៅភូមិ-ឃុំកើតហេតុខាងលើ ។
ប្រភពដដែលបានបន្តថា មុនពេលកើតហេតុ ម៉ោងប្រមាណជាង១០ព្រឹក ខណៈពេលដែលឪពុកម្ដាយរបស់ពួកគេបានធ្វើការនៅរោងចក្រអស់ ចំណែកជីដូនជីតាក៏នាំគ្នាទៅវត្ត ហើយពួកគេក្មេងៗក៏បាននាំគ្នាដើរទៅវាលស្រែ ក៏នាំគ្នាចាប់បានសត្វគីង្គក់ រួចយកមកអាំងហូបតែម្តង។
ប្រភពដដែលបន្តថា លុះដល់ថ្ងៃរសៀលបន្តិច ទើបបណ្ដាលឲ្យពុល ស្របពេលដែលជីដូនត្រឡប់មកពីវត្តវិញ ហើយក៏ឃើញចៅមានអាការៈពុលបែបនេះ ក៏នាំគ្នាដឹកយកទៅសង្គ្រោះនៅមណ្ឌលសុខភាព ស្រុកកំពង់ត្រឡាច។ ប៉ុន្តែដោយសារសភាពធ្ងន់ពេក ទើបបណ្ដាលឲ្យកុមារាឃិត បូរ៉ា បានបាត់បង់ជីវិតតែម្តង ។
បើតាមការបញ្ជាក់របស់លោកនាយប៉ុស្តិ៍រដ្ឋបាលឃុំច្រេស បានឲ្យដឹងថា បើសិនជាពុលភ្លាមៗ ហើយដឹកទៅសង្គ្រោះ គ្រូពេទ្យប្រហែលជាអាចនឹងជួយទាន់ ប៉ុន្តែតាំងពីព្រឹករហូតដល់រសៀល ទើបអាណាព្យាបាល ជាពិសេសជីដូនដែលមកពីវត្តវិញបានដឹង ហើយបានបញ្ជូនទៅសង្គ្រោះនៅមន្ទីរពេទ្យបង្អែកស្រុក ប៉ុន្តែអ្វីៗវាហួសពេលទៅហើយ៕
ចែករំលែកព័តមាននេះ