រាជធានីភ្នំពេញ ៖ កូវីដ ១៩ បានធ្វើឲ្យសេដ្ឋកិច្ចជាតិជារួមធ្លាក់ចុះ ដូចយើងបានដឹងហើយ ចំណែកពលរដ្ឋជាច្រើនបានត្អូញពីប្រាក់ចំណូល ប៉ុន្តែបើក្រលេកមើលការចំនួនអ្នកទិញរថយន្តទៅប្រើប្រាស់វិញមិនធ្លាក់ចុះនោះឡើយ ។ នេះបើផ្អែកតាមការឲ្យដឹងពីភ្នាក់ងារលក់រថយន្តផ្ទាល់ ។
អ្នកលក់រថយន្តឲ្យក្រុមហ៊ុនល្បីៗនៅក្នុងប្រទេសកម្ពុជាអះអាងថា ទោះបីមានវិបត្តិកូវីដ ១៩ ប៉ុន្តែចំនួនលក់រថយន្តរបស់ពួកគេមិនមានការធ្លាប់ចុះឡើយ ហើយបើមានក្រុមហ៊ុនខ្លះបញ្ជាក់ថា បានធ្លាក់ចុះ តែចំនួនធ្លាក់ចុះមានបន្តិចបន្តូចប៉ុណ្ណោះ ។ ប្រការនេះអាចមកពីការនិយមប្រើប្រាស់រថយន្តរបស់ពលរដ្ឋកម្ពុជាក៍មិនដឹង ។
អ្នកលក់រថយន្តឲ្យក្រុមហ៊ុននាំចូលរថយន្តថ្មីៗ ដែលពលរដ្ឋកម្ពុជាពេញនិយមប្រើ និយាយ ក្នុងលក្ខណ្ឌមិនឲ្យបញ្ចេញឈ្មោះរបស់ខ្លួន និងឈ្មោះក្រុមហ៊ុន បានអះអាងថា «អ្នកមានតម្រូវការប្រើប្រាស់រថយន្តនៅតែបន្តទិញរថយន្ត ទោះបីនៅក្នុងកាលៈទេសៈណាហើយពេលកន្លងទៅពួកគាត់នៅតែមានលទ្ធភាពទិញរថយន្តថ្មីៗយកទៅប្រើ មិនខុសពីពេលមិនទាន់មានកូវីដ ១៩ នោះទេ» ។
បុគ្គលិកលក់រថយន្តឲ្យក្រុមហ៊ុនធំៗជាច្រើន មិនបង្ហាញពីចំនួនលក់របស់ក្រុមហ៊ុនខ្លួននោះឡើយ ប៉ុន្តែពួកគេបាននិយាយថា ការលក់រថយន្តបច្ចុប្បន្ននេះមានការប្រកួតប្រជែងគ្នា ដោយសារថយន្តនាំចូលមកកម្ពុជាមានច្រើនម៉ាក ច្រើនសេរី មានទាំងរថយន្តថ្មី និងរថយន្តដែលប្រើប្រាស់នៅបរទេសរួចហើយ ។
កន្លងមកមានតែក្រុមហ៊ុន RMA ទេដែលបានបង្ហាញពីការធ្លាក់ចុះការលក់រថយន្ត នៅពេលមានវិបត្តិកូវីដ ១៩ ។ លោក ងន សាំង អគ្គនាយកក្រុមហ៊ុនខាងលើធ្លាប់បានប្រាប់កាសែត កោះសន្តិភាព ថា កាលពីឆ្នាំ ២០២០ ដោយសារតែវិបត្តិកូវីដ ១៩ ក្រុម អ អិម អេ មានការធ្លាក់ចុះបរិមាណនាំចូលប្រមាណ ១០% ។ លោកថា ក្រុមហ៊ុនផ្សេងៗទៀតក៏មានការធ្លាក់ចុះដូចគ្នា ។
តាមការសង្កេតឃើញបច្ចុប្បន្ននេះ ការលក់រថយន្តមានការប្រកូតប្រជែងគ្នាខ្លាំង ក្រុមហ៊ុននាំចូលរថយន្តបានចាប់ដៃគូជាមួយធនាគារ គ្រឹះស្ថានហិរញ្ញវត្ថុ ដើម្បីបង្ករភាពងាយស្រួលដល់អ្នកទិញរថយន្តបង់រំលោះ ។ អ្នកលក់រថយន្តថា ចំនួនពលរដ្ឋដែលយកលុយសុទ្ធទៅទិញរថយន្ត និងអ្នកទិញរថយន្តបង់រំលោះមានប្រហាក់ប្រហែលគ្នា ។
ក្រសួងសាធារណការ និងដឹកជញ្ជូន ធ្លាប់ឲ្យដឹងថា កម្ពុជាមានកំណើនការប្រើប្រាស់រថយន្តពី ១ ឆ្នាំទៅ ១ ឆ្នាំចន្លោះពី ៣០ ទៅ ៤០ ម៉ឺនគ្រឿង ។ នេះជាតួលេខកំណើនមួយ ខ្ពស់ខ្លាំង បើប្រៀបធៀបការអភិវឌ្ឍន៍ផ្លូវគមនាគមន៍ ដូច្នេះកំណើនប្រើប្រាស់រថយន្តនេះ ចង់មិនចង់បានធ្វើឲ្យប្រព័ន្ធគមនាគមន៍ផ្លូវគោកនៅកម្ពុជាជួបប្រឈមទៅនឹងឧបសគ្គជាច្រើនដូចជាបញ្ហាគ្រោះថ្នាក់ និងកកស្ទះចរាចរណ៍កើតឡើងជាញឹកញាប់ ។
នៅក្នុងខែកុម្ភៈ ឆ្នាំ ២០២១នេះ រដ្ឋាភិបាលបានចេញអនុក្រិត្យបញ្ចុះតម្លៃពន្ធអាករនាំចូលរថយន្តប្រភេទខ្លះមកកម្ពុជា ។ ការបន្ថយពន្ធអាករពិសេស ដែលមានចន្លោះពី ១៥ ទៅ ៣០% ដូចជាកែពន្ធអាករពិសេសដែលធ្លាប់មានពី ៣០% នៅត្រឹម ២០% ពី ៦០% នៅ ៥០% និងខ្លះពី ៧០% នៅត្រឹម ៥៥% ជាដើម មិនបានធ្វើឲ្យតម្លៃលក់រថយន្តលើទីផ្សារធ្លាក់ចុះនោះឡើយ ។ អ្នកលក់រថយន្តផ្ទាល់និយាយថា ការបន្ថយពន្ធនោះ មិនបានធ្វើឲ្យមានការប្រើប្រួលថ្លៃរថយន្តនោះទេ ដោយសារវាជាផ្នែកមួយនៃពន្ធចំនួនបីប្រភេទ ដែលរដ្ឋបានយកលើការនាំចូលរថយន្តមកកម្ពុជា ៕
ចែករំលែកព័តមាននេះ