ខេត្តព្រះសីហនុ ៖ ខណៈតួលេខនៃអ្នកកើតកូវីដ១៩ ពាក់ព័ន្ធនឹងព្រឹត្តិការណ៍សហគមន៍២០កុម្ភៈបានកើនឡើងដល់៦២នាក់ នៅខេត្តព្រះសីហនុ គិតត្រឹមព្រឹកថ្ងៃទី៣ ខែមីនា ឆ្នាំ២០២១ នេះក៏ដោយ រដ្ឋបាលខេត្តព្រះសីហនុបានលើកឡើងថា នៅមានបងប្អូនមួយចំនួនតួចនៅតែបន្តជួបជុំគ្នាច្រើន លើសពីការកំណត់របស់ក្រសួងសុខាភិបាលនៅតាមកម្មវិធីរៀបអាពាហ៍ពិពាហ៍ ពិធីបុណ្យទានផ្សេង និងពិធីខួបកំណើតជាដើម ។
ជាក់ស្តែងការឆ្លងនៅខេត្តព្រះសីហនុពាក់ព័ន្ធនឹងព្រឹត្តិការណ៍២០កុម្ភៈនោះ គឺមានជនជាតិខ្មែរកាន់តែច្រើនត្រូវបានរកឃើញថាកើតកូវីដ-១៩ ។ ជាក់ស្តែង យោងតាមប្រកាសរបស់ក្រសួងសុខាភិបាលចុះថ្ងៃទី ៣ ខែមីនា នេះគឺមានអ្នកឆ្លងក្នុងសហគមន៍២០ កុម្ភៈនៅខេត្តព្រះសីហនុចំនួន ១០ នាក់ ក្នុងនោះ៩នាក់ជាជនជាតិខ្មែរ ។
រដ្ឋបាលខេត្តព្រះសីហនុក៏បានឲ្យដឹងផងដែរថា «បន្ថែមពីលើនេះ ក៏មានបងប្អូនប្រជាពលរដ្ឋមួយចំនួនបានធ្វើដំណើរតាមដងផ្លូវសាធារណៈ ឬចូលទិញទំនិញតាមផ្ទះ ឬតាមផ្សារដោយមិនមានពាក់ម៉ាសនៅឡើយ »។
យោងតាមសេចក្តីអំពាវនាវលើកទី ៥ របស់រដ្ឋបាលខេត្តព្រះសីហនុ ចុះថ្ងៃទី ២ ខែមីនា បានបន្តថា «សកម្មភាពទាំងនេះ ងាយបង្កការឆ្លងរីករាលដាលនៃជំងឺកូវីដ-១៩ កាន់តែមានទំហំធំទៅៗ ហើយអាចឈានដល់ការឆ្លងជំងឺកាចសាហាវនេះទៅក្នុងសហគមន៍ ដែលនាំឲ្យពិបាកក្នុងាការគ្រប់គ្រង» ។
ដោយសង្កេតឃើញថាអត្រានៃការឆ្លងកូវីដ-១៩ពាក់ព័ន្ធព្រឹត្តការណ៍២០កុម្ភៈនៅមានចំនួនច្រើន ហើយពលរដ្ឋមួយចំនួនបន្តធ្វេសប្រហែស មានៈជួបជុំគ្នាច្រើនលើសកំណត់ និងខ្លះមិនបានពាក់ម៉ាស់នៅទីសាធារណៈ និងតាមផ្សារនោះ រដ្ឋបាលខេត្តព្រះសីហនុបានស្នើសុំពលរដ្ឋចូលរួមទប់ស្កាត់ការឆ្លងរីករាលដាលនៃជំងឺកូវីដ-១៩ ដោយក្នុងនោះ រដ្ឋបាលខេត្តព្រះសីហនុ ស្នើសុំបងប្អូនថា «សូមពន្យាពេលនៃការរៀបចំពិធីនានាក្នុងដំណាក់កាលនេះ បើសិនជាករណីមិនចាំបាច់» តែបើក្នុងករណីចាំបាច់ខានមិនបាន ចំពោះពិធីរៀបចំនីមួយៗត្រូវកាត់បន្ថយចំនួនមនុស្ស ត្រូវរៀបចំម៉ាស៊ីនបាញ់សម្លាប់មេរោគ ម៉ាស៊ីនវាស់កម្តៅ និងរៀបចំពាក់ម៉ាសសម្រាប់ភ្ញៀវ និងមានរៀបចំអាល់កុល ឬជែល ដើម្បីភ្ញៀវបានលាងដៃមុនចូលទីតាំងលក់ដូររបស់ខ្លួន ។
រដ្ឋបាលខេត្តព្រះសីហនុ ក៏បានស្នើបន្តថា «សូមបឈ្ឈប់ការជួបជុំគ្នានៅទីកន្លែងប្រមូលផ្តុំច្រើនកុះករក្នុងករណីមិនចាំបាច់» ៕
ចែករំលែកព័តមាននេះ