ភ្នំពេញ៖ ក្រសួងការពារជាតិ បានប្រកាសថា ចាប់ពីថ្ងៃទី១០-២៨ ខែកុម្ភៈ ឆ្នាំ២០២១ ការចាក់វ៉ាក់សាំងបង្ការជំងឺកូវីដ១៩ លើកទី១ ចាក់បាន ៥១៩០៩ នាក់ ( ស្ត្រី ៤៨៨៧នាក់ )។ ដោយឡែក ចាក់លើកទី២ ចាប់ពីថ្ងៃទី២៥-២៨​ ខែកុម្ភៈ បានចំនួន ៩៥១នាក់ ( ស្ត្រី ២២៩នាក់ )។ ក្នុងម្នាក់ ត្រូវចាក់ ២លើក​ ដោយលើកទី២ មានរយៈពេលចន្លោះពី ១៤ថ្ងៃ ទៅ​២៨ថ្ងៃ គិតចាប់ពីចាក់លើកទី១។​

ក្រសួងការពារជាតិ បានទទួលជំនួយ​វ៉ាក់សាំងកូវីដ១៩ ពីចិន ចំនួន ៣០ម៉ឺនដូស ដូចក្រសួងសុខាភិបាលដែរ​។ ប៉ុន្តែវ៉ាក់សាំងកូវីដ១៩ របស់ក្រសួងការពារជាតិ អាចចាក់បានចាប់ពីអាយុ ១៨ឆ្នាំ រហូតដល់លើស ៥៩ឆ្នាំ​។

ក្រសួងការពារជាតិ បានចាប់ផ្តើមចាក់វ៉ាក់សាំងដល់កងទ័ព ចាប់តាំងពីថ្ងៃទី១០ ខែកុម្ភៈ នៅមន្ទីរពេទ្យព្រះកេតុមាលា។ ក្រោយមកក៏ពង្រីកទៅចាក់នៅបញ្ជាការដ្ឋាន​កងទ័ព និងបណ្តាអង្គភាពទិសយោធភូមិភាគ ដែលរហូតដល់ថ្ងៃទី២៨កុម្ភៈនេះ មានចំនួន ១៩អង្គភាព​ ដែលចាក់វ៉ាក់សាំង​កូវីដ​។

នៅពេលនេះ ដំណើរការចាក់វ៉ាក់សាំងលើកទី២ សម្រាប់កងទ័ព ត្រូវបានក្រសួងការពារ​ជាតិ ធ្វើឡើងតែនៅមន្ទីរពេទ្យ​ព្រះកេតុមាលា ក្នុងរាជធានីភ្នំពេញ តែមួយប៉ុណ្ណោះ៕