បន្ទាយមានជ័យ៖ ស្រូវប្រាំងប្រមាណជិត ១.០០០ហិកតា ដែលកំពុងខ្វះទឹក ត្រូវបាន​អភិបាលខេត្ត ដឹកនាំមន្ត្រីជំនាញ ជួយអន្តរាគមន៍ ដើម្បីសង្គ្រោះ កាលពីថ្ងៃទី២៥ ខែកុម្ភៈ ឆ្នាំ២០២១ នៅឃុំរហាល ស្រុកព្រះនេត្រព្រះ។

លោក ឃូរ ពៅ អភិបាលស្រុកព្រះនេត្រព្រះ បានប្រាប់ថា ស្រូវប្រាំងប្រមាណជិត ១.០០០ហិកតា នៅក្នុងឃុំរហាល ស្រុកព្រះនេត្រព្រះ កំពុងខ្វះទឹក បណ្តាលឲ្យ​គ្រាមស្វិតជាបណ្តើរ​ៗ​ហើយ។ បើគ្មាន​ទឹក បូមបញ្ចូលទេ ស្រូងនោះ អាចងាប់ និងចេញមិនរួច។ ដូច្នេះ​ប្រជាកសិករ តាមរយៈលោកអភិបាលស្រុក បាន​ស្នើសុំ អោយអភិបាលខេត្ត ជាពិសេសមន្ទីរ​ជំនាញ មានមន្ទីរធនធានទឹក និងឧតុនិយមខេត្ត មន្ទីរកសិកម្ម រុក្ខាប្រមាញ់​ និង​នេសាទ ខេត្ត ជួយអន្តរាគមន៍ផង ព្រោះស្រូវ ដែលកំពុងចេញ និងដាក់គ្រាប់ខ្វះទឹក ដែលភាគច្រើនជាស្រូវអ៊ីអ៊ែ និងស្រូវ​សែនក្រអូប។

ក្រោយទទួលព័ត៌មានពីអាជ្ញាធរមូលដ្ឋាន ហើយដែលប្រជាកសិករ កំពុងសុំជំនួយ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានដឹកនាំកម្លាំង​ ចុះអន្តរាគមន៍ បូមទឹក ដាក់បញ្ចូលស្រូវប្រាំង ប្រមាណជិត ១០០០ហិកតានោះ ដែលជាប្រភេទស្រូវ ២ខែកន្លះ និងស្រូវ ៣ខែ ទទួលផល។

ឯកឧត្តមបានចុះពិនិត្យជាក់ស្តែង ឃើញស្រូវ កំពុងផើម និងចេញខ្លះៗហើយ តែគ្មាន​ទឹក បណ្តាលឲ្យ​ដីបែកក្រហែង កន្លែងខ្លះស្វិត អាចប្រឈមនឹង​ងាប់ជាបណ្តើរៗ បើមិនជួយអន្តរាគមន៍បានទាន់ពេលទេនោះ។

ឯកឧត្តម បានអោយមន្ទីរធនធានទឹក និងឧតុនិយម ខេត្តបន្ទាយមានជ័យ ត្រូវ​សហការគ្នាជាមួយមន្ទីរកសិកម្ម រុក្ខាប្រមាញ់ និង​នេសាទ ខេត្ត ត្រូវរកប្រភពទឹក ដោះស្រាយ​ អោយបានឆាប់ ដើម្បីសង្គ្រោះស្រូវ ដែលគ្មានទឹក ដើម្បីទទួលបានផល។

ភ្លាមៗនោះ មន្ទីរជំនាញ បានដុតដៃដុតជើង រកប្រភពទឹក ដែលបើកចេញពីស្ពានទី២ អាងត្រពាំងថ្ម ស្រុកភ្នំស្រុក បង្ហូរទំលាក់ចូលប្រឡាយមេ ក្នុងឃុំរហាល ស្រុក​ព្រះនេត្រព្រះ ​បូមបញ្ចូលស្រូវជាបណ្តើរៗ ដើម្បីសង្គ្រោះបន្ទាន់ ឲ្យស្រូវ​អាចប្រមូលផលបាន ព្រោះស្រូវចេញខ្លះហើយ៕ ដោយ៖ ប៊ុន ធឿន