រាជធានីភ្នំពេញ ៖ រថយន្ត Starex មួយគ្រឿង បើបរដោយបុរសជនជាតិចិនម្នាក់ ក្នុងល្បឿនលឿនដូចហោះដល់ផ្លូវបំបែកជាបួនមិនបន្ថយល្បឿនជ្រុលទៅបុកផ្ទប់រថយន្ដដឹកសំរាមក្រុមហ៊ុនស៊ីនទ្រី ដែលធ្វើដំណើរឆ្លងកាត់ទទឹងផ្លូវគ្នាពេញទំហឹង បណ្តាលឲ្យរថយន្តStarex រួញស្រុញមួយកំណាត់មុខ កៀបអ្នកបើកបរក្នុងរថយន្តរបួសស្រាល កាលពីវេលាម៉ោង១រំលងអាធ្រាត្រឈានចូលថ្ងៃទី២៧ ខែកុម្ភៈ ឆ្នាំ២០២១ នៅចំណុចស្តុបណតប្រ៊ីត តាមបណ្ដោយផ្លូវ២០០៤ សង្កាត់អូរបែកក្អម ខណ្ឌសែនសុខ។ រថយន្តបង្កម៉ាក HYUNDAI GRAND STAREX ពណ៌ខ្មៅ ពាក់ស្លាកលេខ ភ្នំពេញ 2AX-5361 ខូចខាតខ្ទេចមួយកំណាត់មុខ ចំណែករថយន្តរងគ្រោះជារថយន្តដឹកសំរាមរបស់ក្រុមហ៊ុនស៊ីនទ្រី។
ប្រភពពីកន្លែងកើតហេតុបានប្រាប់ឲ្យដឹងថា មុនកើតហេតុ គឺពួកគាត់ឃើញរថយន្ត ដឹកសំរាមក្រុមហ៊ុនស៊ីនទ្រី ម៉ាក FUSO ពណ៌បៃតង គ្មានស្លាកលេខ ធ្វើដំណើរតាមបណ្តោយផ្លូវណដប្រ៊ីត ទិសដៅពីជើងទៅត្បូង ដោយមិនដឹងក្នុងរថយន្តនោះមានអ្នករួមដំណើរប៉ុន្មាននាក់នោះទេ។ ប្រភពដដែលបានបន្តទៀតថា ខណៈរថយន្ដដឹកសំរាមធ្វើដំណើរមកដល់កន្លែង កើតហេតុក៏មានរថយន្តមួយគ្រឿងទៀតម៉ាក STAREX បើកបរដោយបុរសជនជាតិចិនម្នាក់សង្ស័យស្រវឹងស្រាធ្វើដំណើរតាមបណ្ដោយផ្លូវ២០០៤ ទិសដៅពីកើតទៅលិច ក្នុងល្បឿនលឿនដូចហោះដល់ផ្លូវបំបែកមិនបន្ថយល្បឿនក៏ជ្រុលបុកផ្ទប់រថយន្ដដឹកសំរាម ចំកង់មុខខាងស្តាំពេញទំហឹងបណ្តាលរថយន្ដ STAREX រួញស្រុញមួយកំណាត់មុខកៀបអ្នកបើកបរក្នុងរថយន្តរបួសស្រាល។
ចំណែករថយន្តដឹកសំរាមវិញ ខូចខាតដាច់កង់មុខខាងឆ្វេងមួយគ្រាប់ និងបន្ទាប់ពីបង្កហេតុអ្នកបើកបរ និងអ្នករួមដំណើរក្នុងរថយន្តដឹកសំរាមបានចេញពីរថយន្ដចុះរត់គេចខ្លួនបាត់ស្រមោលអស់ នៅសល់តែរថយន្តបង្ក ត្រូវបានប្រជាពលរដ្ឋជួយសង្គ្រោះអ្នកបើកទ្វារទាញអ្នកបើកបរចេញពីក្នុងរថយន្តបង្ក និងហៅរថយន្ដសង្គ្រោះគ្លីនិកឯកជនមកដឹកទៅព្យាបាលរបួសភ្លាមៗផងដែរ នៅសល់តែរថយន្ត ទាំងពីរគ្រឿងត្រូវបានសមត្ថកិច្ចវាស់វែងយកទៅរក្សាទុកនៅការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរងចាំដោះស្រាយបន្តនៅពេលក្រោយ៕ ដោយ ៖ យឹម ឈឿន
ចែករំលែកព័តមាននេះ