រាជធានីភ្នំពេញ ៖ រូបភាពនិងសកម្មភាពរបស់ចោរប្លន់ ត្រូវបានថតជាប់ក្នុងកាមេរ៉ាសុវត្ថិភាពទាំងអស់ ស្ថិតក្នុងទីតាំងកើតហេតុវេរលុយវីងមួយកន្លែង នៅម្តុំច្រមុះជ្រូកស្ទឹងមានជ័យ កើតឡើងកាលពីវេលាម៉ោង០៤ និង៥៧នាទីរសៀលថ្ងៃទី២៦ កុម្ភៈ ហើយក៏សង្ឃឹមថា…
រាជធានីភ្នំពេញ ៖ រូបភាពនិងសកម្មភាពរបស់ចោរប្លន់ ត្រូវបានថតជាប់ក្នុងកាមេរ៉ា
សុវត្ថិភាពទាំងអស់ ស្ថិតក្នុងទីតាំងកើតហេតុវេរលុយវីងមួយកន្លែង នៅម្តុំច្រមុះជ្រូកស្ទឹងមានជ័យ កើតឡើងកាលពីវេលាម៉ោង០៤ និង៥៧នាទីរសៀលថ្ងៃទី២៦ កុម្ភៈ ហើយក៏សង្ឃឹមថា សមត្ថកិច្ចនឹងធ្វើការស្រាវជ្រាវរកជនដៃដល់រូបនេះឱ្យទាល់តែបានក្នុងពេលឆាប់ៗ ។
តាមសកម្មភាពក្នុងកាមេរ៉ាបានបង្ហាញ គឺឃើញជននេះមកឈប់ម៉ូតូឈរនៅមុខទីតាំងហាងមួយសន្ទុះ ក្នុងសម្លៀកបំពាក់ពាក់យ៉ាងជិតឈឹង ដោយមានពាក់មួកសុវត្ថិភាពការពារទៀតផង ដោយឈរសំឡឹងរកឱកាសហុចឱ្យខ្លួនគេ ។
តាមវីដេអូទី២របស់កាមេរ៉ាគឺឃើញចោរនេះ ដើរចូលក្នុងទីតាំងវេរលុយដោយឃើញម្ចាស់កំពុងអង្គុយលេង ហើយចោរក៏ដើរចូលដល់ក្នុងរួចមកសំឡុតទាំងកំរោល និងមានដកកាំភ្លើងផងដែរ ។ ប៉ុន្តែចៃដន្យកាំភ្លើងដកបាញ់មិនផ្ទុះ ទើបម្ចាស់ប្រតាយប្រតប់ទៅវិញធ្វើឱ្យចោររត់ចេញក្រៅចោលទាំងម៉ូតូ ទាំងកាំភ្លើង ហើយក៏បង្កការភ្ញាក់ផ្អើលឆោឡោតែម្តង ។
នេះអាចចាត់ទុកជាសំណាងល្អបំផុតដល់ម្ចាស់ទីតាំងនិងស្ត្រីចំណាស់ម្នាក់ទៀតព្រោះពួកគាត់ប្រឈមគ្រោះថ្នាក់ខ្លាំងបំផុត តែកាំភ្លើងចោរបាញ់មិនផ្ទុះ ។ ហើយបើចោរដកកាំភ្លើងបាញ់បានវិញមិនដឹងថា តើមនុស្សប៉ុន្មាននាក់នឹងមានគ្រោះថ្នាក់ទេ ព្រោះទីតាំងកើតហេតុ ជាតំបន់ប្រជុំជនដែលមានមនុស្សធ្វើដំណើរច្រើនណាស់ ។
សូមរំលឹកថា ៖ ចោរប្លន់ប្រដាប់អាវុធម្នាក់ ធ្វើសកម្មភាពចូលបាញ់ប្លន់ ទីតាំងវីងមួយកន្លែងយីហោ «ប៉េង សុខចំរើន» មានទីតាំងស្ថិតតាមបណ្តោយផ្លូវលេខ២១៧ (យចំណុចច្រមុះជ្រូកស្ទឹងមានជ័យ) ក្នុងសង្កាត់ស្ទឹងមានជ័យទី១ ខណ្ឌមានជ័យ បង្កការភ្ញាក់ផ្អើលយ៉ាងខ្លាំង ។
នៅមុនកើតហេតុ ចោរប្លន់ម្នាក់ខាងលើ ជិះម៉ូតូមួយគ្រឿង ម៉ាកស្គុបពី ពណ៌ផ្កាឈូក ពាក់ស្លាកលេខភ្នំពេញ 1BX-5216 ចូលទៅទីតាំងវីងខាងលើ រួចដកកាំភ្លើងខ្លីម៉ាក កា៥៩ ពីចង្កេះធ្វើសកម្មភាពភ្ជង់ទៅលើបុរសជាម្ចាស់ទីតាំងគំរាមប្លន់យកលុយ ។ លុះមិនបានប៉ុន្មានផង ជនល្មើសបានបាញ់១គ្រាប់ ប៉ងសម្លាប់ម្ចាស់ទីតាំង តែគ្រាប់កាំភ្លើង មិនផ្ទុះ! បណ្តាលអោយបុរសជាម្ចាស់ទីតាំង ស្ទុះទៅវាយប្រតាយប្រតប់ជាមួយជនល្មើស រហូតជ្រុះកាំភ្លើង និងដណ្តើមបានកាំភ្លើងពីជនល្មើសវិញ ជាហេតុធ្វើអោយជនល្មើសភ័យស្ទុះរត់ចេញពីទីតាំងវីង ប៉ងគេចខ្លួន ។
ភ្លាមៗនោះ បុរសជាម្ចាស់ទីតាំង ក៏បានកាន់កាំភ្លើងដេញតាម និងបានបាញ់ទៅកាន់ជនល្មើសចំនួន១គ្រាប់ដែរ តែគ្រាប់កាំភ្លើង មិនផ្ទុះទៀត (ចំគ្រាប់ស្អុយបាញ់អត់ផ្ទុះដូចគ្នា) ជាហេតុធ្វើអោយជនល្មើស មានឱកាសរត់ដោយថ្មើរជើង គេចខ្លួនបាត់ស្រមោលតែម្តង ។បន្ទាប់មក បុរសជាម្ចាស់ទីតាំងវីង បានត្រឡប់ទៅផ្ទះខ្លួនវិញ ព្រោះខ្លាចមានអ្នកចូលទៅយកលុយ ទើបជនល្មើសអាចរត់គេចបានដោយគ្មានអ្នកតាម ។
ក្រោយកើតហេតុ កម្លាំងនគរបាលមូលដ្ឋាន និងកម្លាំងកងរាជអាវុធហត្ថខណ្ឌ រួមជាមួយកងរាជអាវុធហត្ថរាជធានីភ្នំពេញ បានចុះដល់ទីតាំងខាងលើ ដើម្បីពិនិត្យ និងសាកសួរនាំព័ត៌មាន ។ រួចហើយក៏បាន អញ្ចើញម្ចាស់ទីតាំង ទៅកាន់មូលដ្ឋានកងរាជអាវុធហត្ថខណ្ឌមានជ័យ ដើម្បីសាកសួរនាំបន្ថែម និងដាក់ពាក្យបណ្តឹងផងដែរ។
ចែករំលែកព័តមាននេះ