ភ្នំពេញ៖ បុរសជនជាតិចិនម្នាក់ ដែលគេផ្សព្វផ្សាយថា បានរត់ចេញពីមណ្ឌលចត្តាឡីស័ក រាជធានីភ្នំពេញនោះ គឺគាត់មិនបានរត់ចេញពីមណ្ឌលចត្តាឡីស័ក នៅភ្នំពេញ ដូចការផ្សព្វផ្សាយព័ត៌មានមួយចំនួនទេ។ បុរសចិនរូបនេះ កំពុងស្ថិតនៅក្នុងកន្លែងព្យាបាលនៅឡើយ។ នេះបើតាមលោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល។
លោកស្រី ឱ វណ្ណឌីន បានបញ្ជាក់នៅយប់ថ្ងៃទី២៦ ខែកុម្ភៈនេះថា «ខ្ញុំសូមច្រានចោលទាំងស្រុងនូវព័ត៌មានប្រឌិតនេះ ព្រោះអ្នកជំងឺ កំពុងតែស្ថិតនៅក្នុងមណ្ឌលចត្តាឡីស័ក ព្យាបាលជំងឺនៅឡើយទេ ដោយមិនបានរត់ចេញពីមណ្ឌល ដូចការលើកឡើងនេះដែរទេ»។
សូមរម្លឹកថា រូបថតប៉ាស្ព័ររបស់បុរសចិនម្នាក់ ត្រូវបានមន្ទីរទេសចរណ៍ខេត្តកែប ផ្សព្វផ្សាយតាមហ្វេសប៊ុកថា បានរត់ចេញពីមណ្ឌលចត្តាឡីស័ក ខណៈបុរសនោះ កំពុងផ្ទុកជំងឺកូវីដ១៩។ ប៉ុន្តែប៉ុន្មានម៉ោងក្រោយមក នៅយប់ថ្ងៃទី២៦ ខែកុម្ភៈនេះ ហ្វេសប៊ុករបស់មន្ទីរទេសចរណ៍ ខេត្តកែប បានលុបចោលនូវប្រកាសរបស់ខ្លួននោះចេញវិញ៕ ដោយ៖ ភី ផល
ចែករំលែកព័តមាននេះ