រាជធានីភ្នំពេញ ៖ កម្ពុជាជាប្រទេសមួយដែលធ្លាប់មានកើត ឬផ្ទុះនូវជំងឺប៉េសជ្រូកអាហ្វ្រិកហើយជំងឺនេះបានធ្វើអន្តរាយទៅដល់អ្នកចិញ្ចឹមជ្រូកក្នុងស្រុកភាគច្រើនកាលពីឆ្នាំ២០១៩។ជំងឺប៉េសជ្រូកអាហ្វ្រិកបានស្ងប់ស្ងាត់មិនទាន់ប៉ុន្មានឆ្នាំផង ស្រាប់តែពេលនេះបាន ធ្វើឱ្យអ្នកចិញ្ចឹមសត្វជ្រូកហាក់ចាប់ផ្តើមមានការព្រួយបារម្ភឡើងវិញជាថ្មី ដោយសារតែជំងឺនេះ គ្មានថ្នាំឬវ៉ាក់សាំងណាអាចចាក់ព្យាបាលបាន បន្ទាប់ពីខាងមន្ត្រីជំនាញរបស់កម្ពុជាថ្មីៗនេះពិនិត្យរកឃើញមានវត្តមានមេរោគជំងឺប៉េស្ដជ្រូកអាហ្វ្រិកលើសត្វជ្រូកនាំចូលខុសច្បាប់ពីប្រទេសថៃ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វនៅកម្ពុជាបានឱ្យដឹងនៅថ្ងៃទី២៦កុម្ភៈនេះថា ការរកឃើញនៅជំងឺ ប៉េសជ្រូកអាហ្វ្រិកនេះ ប្រាកដជាធ្វើឱ្យយើងមានក្តីបារម្ភហើយ ព្រោះជំងឺនេះគ្មានថ្នាំព្យាបាលនិងគ្មានវ៉ាក់សាំងការពារនោះទេ។អីចឹងសមាគមមានក្តីបារម្ភខ្លាំងណាស់ បើសិនជាជំងឺនេះផ្ទុះឡើងវិញ ពិតជាធ្វើឱ្យអន្តរាយដល់កសិករចិញ្ចឹមជ្រូកយើងទៀតហើយ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វនៅកម្ពុជាសង្កត់ធ្ងន់ថា«កន្លងមក ខ្ញុំតែងតែក្រើនរំលឹកដល់អ្នកចិញ្ចឹមជ្រូកជាប្រចាំ ។ខ្ញុំថាជំងឺប៉េសជ្រូកអាហ្វ្រិកមិនភ្លេចយើងទេ មានតែបងប្អូនទេដែលភ្លេចជំងឺប៉េសជ្រូកអាហ្វ្រិចនេះ ហើយនៅពេលដែលខ្ញុំបានលើកឡើងបែបនេះ យើងសង្កេតឃើញថាពួកគាត់មានការភិតភ័យ ពិសេសម្ចាស់កសិដ្ឋានចិញ្ចឹមជ្រូកធំៗ គាត់មានក្តីបារម្ភខ្លាំងណាស់ ហើយប្រឹងប្រែងធ្វើជីវៈសុវត្ថិភាពជាប្រចាំ។តែសម្រាប់ប្រជាកសិកររបស់យើង ពួកគាត់តែងតែប្រថុយប្រថាន» ។
លោកបន្តថា ជំងឺប៉េសជ្រូកអាហ្វ្រិកនៅក្នុងប្រទេសកម្ពុជាប្រាកដនៅមានជំងឺនេះវាមិនទាន់មានការសាបរលាបបាត់ភ្លាមៗនៅឡើយទេ តែបើអ្នកចិញ្ចឹមមានការប្រុងប្រយ័ត្ន វាជួយទប់ស្កាត់បានមួយផ្នែកធំ។ប៉ុន្តែបើមានការធ្វេសប្រហែសវានឹងចូលដល់កន្លែងចិញ្ចឹមសត្វភ្លាម(ផ្ទុះជំងឺ)។
តាមប្រធានសមាគមអ្នកចិញ្ចឹមសត្វរូបនេះ« បានអំពាវនាវទៅដល់កសិករ អ្នកចិញ្ចឹមជ្រូកនៅកណ្តាលវាលឬមិនមានការរៀបចំ គ្រប់គ្រងបានល្អ បើសិនមានផ្ទុះជំងឺប៉េសជ្រូកអាហ្វ្រិកនេះឡើងវានឹងធ្វើនឹងធ្វើឱ្យប៉ះពាល់ទៅដល់កសិដ្ឋានឬក្រុមហ៊ុនចិញ្ចឹមជ្រូក ព្រោះត្បិតអីជ្រូកទាំងនេះនិងមាននាំទៅលក់នៅលើទីផ្សារ។ដូចនេះសូមបងប្អូនដែលជាអ្នកចិញ្ចឹមជ្រូក មេត្តាធ្វើជីវៈសុវត្ថិភាពឱ្យបានខ្ពស់ ហើយកុំនាំអ្វីដែលធ្វើពីសាច់ជ្រូកនាំចូលមកកសិកដ្ឋាន»។
យោងតាមអគ្គនាយកដ្ឋានសុខភាពសត្វ និងផលិតកម្មសត្វកាលពីថ្ងៃទី២៥កុម្ភៈថ្មីៗនេះបង្ហាញថា មន្ដ្រីជំនាញរបស់វិទ្យាស្ថានជាតិស្រាវជ្រាវសុខភាពសត្វ និងផលិតកម្មសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បានចុះត្រួតពិនិត្យការអនុវត្តរបស់មន្ត្រីត្រួតពិនិត្យអនាម័យសត្វ និងផលិតផលសត្វនៅកន្លែងប្រមូលផ្ដុំសត្វចំណុចដើមទី និងចុះយកវត្ថុវិភាគឈាមជ្រូកដែលនាំចូលពីប្រទេសថៃឡង់ដ៏ចូលមកព្រះរាជាណាចក្រកម្ពុជា ដែលស្ថិតនៅភូមិផ្អុង សង្កាត់កូនគ្រៀល ក្រុងសំរោង ខេត្តឧត្ដរមានជ័យ ដើម្បីបង្ការ និងកាត់បន្ថយហានិភ័យនៃជំងឺឆ្លងសត្វផ្សេងៗ ដែលអាចកើតឡើងតាមរយៈការនាំចូលជ្រូក ធ្វើឱ្យប៉ះពាល់ដល់សុខភាពសាធារណៈនិងផលប្រយោជន៍របស់កសិករចិញ្ចឹមជ្រូកនៅប្រទេសកម្ពុជា។
បើតាមអគ្គនាយកដ្ឋានសុខភាពសត្វ និងផលិតកម្មសត្វគូសបញ្ជាក់ថា«នៅពេលថ្មីៗកន្លងមកនេះ អគ្គនាយកដ្ឋានសុខភាពសត្វ និងផលិតកម្មសត្វ បានបង្ក្រាបបទល្មើសចលនាសត្វ និងផលិតផលសត្វជាច្រើនករណី និងបានយកវត្ថុវិភាគមកវិភាគរកវត្តមានមេរោគបង្កជំងឺ ជាលទ្ធផលឃើញថា មានវត្តមានមេរោគជំងឺប៉េស្ដជ្រូកអាហ្វ្រិកលើសត្វជ្រូកនាំចូលខុសច្បាប់ពីប្រទេសថៃឡង់ដ៏»៕
ចែករំលែកព័តមាននេះ