រាជធានីភ្នំពេញ ៖ ការរីករាលដាលជាសហគមន៍នៃជំងឺកូវីដ១៩ នៅក្នុងប្រទេសកម្ពុជាកំពុងវិវត្តន៍កាន់តែធ្ងន់ធ្ងរ ហើយទីតាំងអាជីវកម្មកាន់តែច្រើនក៏ត្រូវបានបិទដើម្បីស្រាវជ្រាវរកអ្នកពាក់ព័ន្ធមកធ្វើតេស្តនិងធ្វើចត្តាឡីស័ក ។
ងាកមកមើលស្ថានភាពនៅតាមផ្សារនានាក្នុងរាជធានីភ្នំពេញ ឃើញថាក៏មានសកម្មភាពស្ងប់ស្ងាត់ខុសប្លែកពីធម្មតាដែរដូចជាផ្សារថ្មីដែលធ្លាប់មានមនុស្សអ៊ូរអរ និងជាផ្សារកណ្ដាលក្រុងភ្នំពេញ តែអ្នកចេញចូលផ្សារមួយនេះ កាន់តែស្ងាត់ទៅៗពីមួយទៅមួយថ្ងៃ ។
អ្នកស្រី ចាន់ ប៊ុណ្ណា អាជីវករមួយរូបនៅផ្សារធំថ្មីបានឱ្យដឹងថា ស្ថានភាពភ្ញៀវចូលទិញអីវ៉ាន់នៅក្នុងផ្សារធំថ្មីពីមួយថ្ងៃទៅមួយថ្ងៃកាន់តែតិចទៅៗ ហើយស្ថានភាពលក់ដូរក៏កាន់តែស្ងាត់ទៅៗដែរ ដោយអាជីវករមួយចំនួនបានបិទតូប និងមួយចំនួនទៀតនៅបើកធម្មតា តែអ្នកនៅបើកតូបក៏មិនប្រាកដថាមានភ្ញៀវចូលមកទិញដែរ គឺស្ងប់ស្ងាត់ដូចតែគ្នាទេ ។
អ្នកស្រីបន្តថា កាលពីថ្ងៃមិលមិញឃើញថាស្ងាត់តែក៏មានភ្ញៀវមួយៗចូលមកក្នុងផ្សារ តែមកដល់ថ្ងៃនេះ ( ថ្ងៃទី២៦ កុម្ភៈ ) កាន់តែស្ងប់ស្ងាត់ទៅទៀត ហើយអាជីវករបិទតូចក៏កាន់តែច្រើន ។ ហើយបើសិនជាស្ថានភាពនេះ នៅតែអូសបន្លាយទៀត វានឹងធ្វើប៉ះពាល់កាន់តែធ្ងន់ដល់ប្រាក់ចំណូលរបស់អាជីវករក៏ដូចជាអ្នកស្រីផងដេរ ។
អ្នកស្រីបន្ថែមថា តាំងពីមុនមានព្រឹត្តិការណ៍២០កុម្ភៈ សកម្មភាពអាជីវកម្មក្នុងផ្សារធំថ្មីហាក់កម្រើកឡើងវិញបន្តិច ធ្វើឱ្យអាជីវករសប្បាយចិត្តនិងរំពឹងថាស្ថានភាពនឹងវិលទៅរកភាពដើមវិញ តែមិនបានប៉ុន្មានស្រាប់តែមកជួបព្រឹត្តិការណ៍ឆ្លងសហគមន៍ជាថ្មី និងធ្ងន់ធ្ងរជាងព្រឹត្តិការណ៍មុនទៅទៀត ។
អ្នកវិភាគសេដ្ឋកិច្ចបានមើលឃើញថា ទំហំនៃការប៉ះពាល់ទៅលើប្រាក់ចំណូលនិងសេដ្ឋកិច្ចគ្រួសារ របស់ពលរដ្ឋកម្ពុជា ពីការរីករាលដាលនៃជំងឺកូវីដ១៩ ក្នុងសហគមន៍លើកនេះ អាចនឹងធ្ងន់ធ្ងរ ខណៈអាជីវកម្មជាច្រើនបានបិទដើម្បីស្រាវជ្រាវរកអ្នកពាក់ព័ន្ធ ហើយទំហំនៃការប៉ះពាល់នេះ ក៏កាន់តែធំឡើងៗពីមួយថ្ងៃទៅមួយថ្ងៃ ។
លោកវន់ ពៅ ប្រធានសមាគមសេដ្ឋកិច្ចឯងរាជ្យក្រៅប្រព័ន្ធ បានឱ្យដឹងថា នៅពេលបិទអាជីវកម្មបែបនេះ គឺជៀសមិនផុតពីប៉ះពាល់នោះទេ ក្នុងនោះមានទាំងប៉ះពាល់ដោយប្រយោល និងប៉ះពាល់ដោយផ្ទាល់ ។ អ្នកប៉ះពាល់ផ្ទាល់ គឺជាអ្នកធ្វើការនៅក្នុងអាជីវកម្មនោះ ហើយទទួលបានចំណូលពីអាជីវកម្មដែលបិទនោះ ចំណែកអ្នកប៉ះពាល់ប្រយោលជាអ្នកដែលបានប្រយោជន៍ពីអ្នកធ្វើការនៅទីតាំងនោះ ដូចជាក្រុមអ្នកលក់ដូរ ក្រុមអ្នករត់ម៉ូតូឌុប កង់បីតាក់ស៊ីជាដើម ។
បើតាមលោកចន្ថា អ្នករត់កង់បីឥណ្ឌាមួយរូប នៅរាជធានីភ្នំពេញបានឱ្យដឹងថា រយៈពេលប៉ុន្មានខែចុងក្រោយនេះ ពោលគឺនៅខែធ្នូ និងខែមករា ឃើញថាស្ថានភាពកូវីដ១៩ ហាក់ស្ងប់ស្ងាត់ ធ្វើឱ្យសកម្មភាពសេដ្ឋកិច្ចនិងអាជីវកម្មមួយចំនួនក៏ចាប់ផ្ដើមដំណើរការឡើងវិញ ក្នុងនោះរូបលោកក៏ទទួលបានចំណូលឡើងវិញដែរ តែស្រាប់តែថ្មីៗនេះ ក៏មានការឆ្លងជាថ្មីក្នុងសហគមន៍ ដែលជំរុញឱ្យរូបលោកក៏ដូចជាបងប្អូនដទៃទៀតជួបបញ្ហាជាថ្មី និងធ្វើឱ្យបាត់ចំណូលជាថ្មីផងដែរ ។
លោកបន្តថាកាលពីផ្ទុះក្នុងសហគមន៍លើកមុនរូបលោកមិនហ៊ានចេញដឹកភ្ញៀវទេ គឺនៅតែផ្ទះដោយសារតែខ្លាចពីជំងឺនេះផង ហើយក៏មិនមានភ្ញៀវសម្រាប់ដឹកទៅទៀត ព្រោះគេក៏សំងំនៅផ្ទះ ហើយបើសិនជាព្រឹត្តិការណ៍នេះកាន់តែធំទៀតលោកមានតែសំងំនៅផ្ទះជាថ្មី ។
សូមរំលឹកថា រហូតមកដល់ពេលនេះទីតាំងប្រមាណជាង៧០ទីតាំងហើយដែលជាប់ពាក់ព័ន្ធនឹងព្រឹត្តិការណ៍២០កុម្ភៈ២០២១ និងរកឃើញអ្នកឆ្លងជំងឺកូវីដ១៩ក្នុងសហគមន៍ជាង២០០នាក់ហើយ គិតត្រឹមថ្ងៃទី២៦ កុម្ភៈ ២០២១ ក្នុងនោះភាគច្រើនជាជនជាតិចិនខណៈអ្នកឆ្លងសរុបនៅកម្ពុជាបានហក់ឡើងដល់ ៧៤១នាក់ ៕
ចែករំលែកព័តមាននេះ