រាជធានីភ្នំពេញ ៖ លោកស្រី យក់ សម្បត្តិ រដ្ឋលេខាធិការនៃក្រសួងសុខាភិបាលបានថ្លែងឲ្យដឹងថាការពាក់ម៉ាស់តែម្យ៉ាង គឺមិនគ្រប់គ្រាន់សម្រាប់ការពារបងប្អូនពីការឆ្លងនូវវីរុសកូវីដ ១៩ ព្រោះថាម៉ាស់មុខគឺការពារបានតែមាត់និងច្រមុះ ដូច្នេះទាមទារឲ្យមានការអនុវត្តនូវលាងដៃឲ្យបានញឹកញាប់បំផុតព្រោះវីរុសកូវីដ…
រាជធានីភ្នំពេញ ៖ លោកស្រី យក់ សម្បត្តិ រដ្ឋលេខាធិការនៃក្រសួងសុខាភិបាលបានថ្លែងឲ្យដឹងថាការពាក់ម៉ាស់តែម្យ៉ាង គឺមិនគ្រប់គ្រាន់សម្រាប់ការពារបងប្អូនពីការឆ្លងនូវវីរុសកូវីដ ១៩ ព្រោះថាម៉ាស់មុខគឺការពារបានតែមាត់និងច្រមុះ ដូច្នេះទាមទារឲ្យមានការអនុវត្តនូវលាងដៃឲ្យបានញឹកញាប់បំផុតព្រោះវីរុសកូវីដ ១៩ មិនមែនឆ្លងតាមតែច្រមុះនិងមាត់ទេ តែត្រចៀកនិងភ្នែកក៏វាឆ្លងដែរ ។
តាមរយៈសារសម្លេងចែកចាយនារសៀល ថ្ងៃទី ២៦ ខែកុម្ភៈ ឆ្នាំ២០២១នេះ លោកស្រី យក់ សម្បត្តិបានពន្យល់ថា «ខ្ញុំសូមផ្តល់ព័ត៌មានមួយដែលជាការដកពិសោធន៍នៅបរទេស និងអន្តរជាតិផ្សេងៗ ការពាក់ម៉ាស់នេះ គឺការពារបានតែច្រមុះ ហើយនិងមាត់ទេ ។ ដោយឡែកភ្នែកហើយ និងត្រចៀកយើងអត់មានអីគ្របបានទេ អ៊ីចឹងហើយសំខាន់ គឺការលាងដៃ» ។
លោកស្រី បានមានប្រសាសន៍បន្តថា មានប្រទេសមួយចំនួនគាត់ធ្វើរបាយការណ៍ព្រឹកមិញ ខ្ញុំមើលបន្តផ្ទាល់ គឺថាមួយគ្រួសារ គឺគាត់បាន quarantine (ចត្តាឡីស័ក) បានត្រឹមត្រូវ គាត់មិនចេញទៅណា មិនចូលរួមហ្វូងមនុស្សធំៗលើសពី១០នាក់មានការហាមឃាត់ហ្នឹង ប៉ុន្តែការអនុវត្តរបស់គាត់អត់បានត្រឹមត្រូវ គាត់មិនសូវលាងដៃ គាត់ប៉ះពាល់គ្នា អ៊ីចឹងទីបំផុតទៅ ឥឡូវឪពុកម្តាយស្លាប់ទាំងពីរនាក់ហើយ នៅតែកូនកំពុងសម្រាក់ព្យាបាលនៅមន្ទីរពេទ្យ ។
លោកស្រី យក់ សម្បត្តិបានណែនាំដល់ក្រុមគ្រូពេទ្យបន្តថា «ដូច្នេះខ្ញុំសុំអំពាវនាវឲ្យក្រុមគ្រូពេទ្យយើង ជាពិសេសការណែនាំទៅប្រជាពលរដ្ឋគឺថាលាងដៃគឺជាការសំខាន់ណាស់ ។ ឥឡូវនេះគឺថាសូម្បីតែនៅអាមេរិក ព្រឹកមិញដែលគេផ្សាយបន្តផ្ទាល់ហ្នឹងគឺថា ការលាងដៃ សំអាតដៃ សំអាតខ្លួនប្រាណនេះគឺជាភារកិច្ចមួយដែលសំខាន់ ។ ហើយទ្វារបែកចេញចូលនេះ ពេលដែលយើងរុញទ្វារហើយ គឺយើងត្រូវប្រយ័ត្នប្រយែងលាងដៃ យើងជាពិសេសទ្វារដែលសាធារណៈប្រើប្រាស់ ។ អ៊ីចឹងខ្ញុំគ្រាន់តែសុំចែករំលែកនូវព័ត៌មានអ្វីដែលខ្ញុំបានតាមដានជារៀងរាល់ព្រឹក គឺថាសូមប្រយ័ត្នប្រយែងសម្រាប់ភ្នែកនិងត្រចៀក ព្រោះវីរុសនេះមិនមែនចូលតែច្រមុះហើយនិងមាត់ទេ»។
សូមរម្លឹកថាក្រសួងសុខាភិបាល បានឲ្យដឹងព្រឹកថ្ងៃទី ២៦ ខែកុម្ភៈនេះថាកម្ពុជាបានរកឃើញករណីវិជ្ជមានកូវីដ-១៩ ចំនួន៤៤ នាក់បន្ថែមទៀត ដែលក្នុងនោះចំនួន ៤០នាក់ គឺជាប់ពាក់ព័ន្ធព្រឹត្តិការណ៍សហគមន៍២០កុម្ភៈ ដែលនាំឲ្យចំនួនឆ្លងពាក់ព័ន្ធព្រឹត្តិការណ៍សហគមន៍២០កុម្ភៈហក់ឡើងយ៉ាងឆាប់រហ័សដល់ចំនួន ២៣៤នាក់ នៅរាជធានីភ្នំពេញ ខេត្តព្រះសីហនុ និងខេត្តកណ្តាល ខណៈការឆ្លងសរុបទូទាំងប្រទេសកើនឡើងដល់ចំនួន ៧៤១នាក់ ក្នុងនោះ ៤៧៧នាក់ទទួលបានការព្យាបាលជាសះស្បើយ និងករណីស្លាប់គ្មាន ៕
ចែករំលែកព័តមាននេះ