ខេត្តព្រៃវែង ៖ រថយន្ត២គ្រឿងក្នុងចំណោម៣គ្រឿងបានផ្ទុះឆេះហុយផ្សែងទ្រលោមងងឹតមេឃក្នុងហេតុការណ៍គ្រោះថ្នាក់ចរាចរណ៍មួយកើតឡើង នៅរសៀលថ្ងៃទី២៥ ខែកុម្ភៈ ឆ្នាំ២០២១ លើផ្លូវក្រវាត់ក្រុងព្រៃវែងតភ្ជាប់ផ្លូវជាតិលេខ១១ បណ្ដាលឲ្យរថយន្ត២គ្រឿងផ្ទុះឆេះអស់ទាំងស្រុង និងមានមនុស្ស៣នាក់ រងរបួសធ្ងន់និងស្រាល…
ខេត្តព្រៃវែង ៖ រថយន្ត២គ្រឿងក្នុងចំណោម៣គ្រឿងបានផ្ទុះឆេះហុយផ្សែងទ្រលោមងងឹតមេឃក្នុងហេតុការណ៍គ្រោះថ្នាក់ចរាចរណ៍មួយកើតឡើង នៅរសៀលថ្ងៃទី២៥ ខែកុម្ភៈ ឆ្នាំ២០២១ លើផ្លូវក្រវាត់ក្រុងព្រៃវែងតភ្ជាប់ផ្លូវជាតិលេខ១១ បណ្ដាលឲ្យ
រថយន្ត២គ្រឿងផ្ទុះឆេះអស់ទាំងស្រុង និងមានមនុស្ស៣នាក់ រងរបួសធ្ងន់និងស្រាល ក្នុងភូមិសាស្ត្រក្រុងព្រៃវែង ខេត្តព្រៃវែង ។
ហេតុការណ៍គ្រោះថ្នាក់ចរាចរណ៌ដ៏គួរឱ្យរន្ធត់បានធ្វើឱ្យមានការភ្ញាក់ផ្អើលពេញក្រុងព្រៃវែង ដោយសារតែមានរថយន្តរហូតដល់៣គ្រឿង បានបុកគ្នាលាន់ឮដូចរន្ទះខែប្រាំងនៅលើផ្លូវក្រវាត់ក្រុង រហូតធ្វើឱ្យរថយន្តចំនួន២គ្រឿងត្រូវឆេះអស់ទាំងស្រុង នៅសល់តែគ្រោងឆ្អឹង និងមនុស្ស៣នាក់បានរងរបួសព្រោះចេញទាន់ ។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង១រសៀលថ្ងៃទី២៥ កុម្ភៈ នៅលើផ្លូវក្រវាត់ក្រុងចំណុចសង្កាត់កំពង់លាវ ក្រុងព្រៃវែង ។ ចំណែករថយន្តដែលរងគ្រោះនៅក្នុងហេតុការណ៍នេះ ទី១ជាប្រភេទរថយន្តបែនដឹកដី រថយន្តទី២ម៉ាកហ្វដ និងទី៣ម៉ាកហ៊ីយ៉ាន់ដាយចំណុះ៥តោន ជារថយន្តដឹកស្រាបៀរអង្គរ ។
ដោយឡែក ជនរងគ្រោះទាំង៣នាក់នៅក្នុងហេតុការណ៍នេះ គេនៅមិនទាន់ស្គាល់អត្តសញ្ញាណនៅឡើយទេ ដោយសារក្រោយកើតហេតុភ្លាម ជនរងគ្រោះត្រូវបានគេនាំយកទៅសង្គ្រោះនៅមន្ទីរពេទ្យបាត់អស់ ។
ប្រភពព័ត៌មានពីសមត្ថកិច្ចបានឱ្យដឹងថា យោងតាមការសាកសួរពីសាក្សីនៅកន្លែងកើតហេតុ គ្រោះថ្នាក់ចរាចរណ៍នេះ គឺបង្កឡើងដោយសារតែរថយន្តហ៊ីយ៉ាន់ដាយ ដឹកស្រាបៀរដែលបើកក្នុងទិសដៅពីជើងទៅត្បូង ពេលមកដល់កន្លែងកើតហេតុ បាន
រេចង្កូតចេញពីគន្លងរបស់ខ្លួន ចូលមកខាង ឆ្វេងដៃ ហើយបានជ្រុលទៅបុកនឹងរថ
យន្តមួយគ្រឿងទៀតម៉ាកហ្វដ ពាក់ផ្លាកលេខភ្នំពេញ ២AA ២០៩៣ ដែលបើកមកបញ្ច្រាសទិសគ្នា គឺបុកពេញទំហឹង បណ្តាលឱ្យរថយន្តទាំង២ផ្ទុះឆេះតែម្តង ខណៈរថ យន្តហ្វដបានឆេះធ្លាក់ទៅជើងទេរផ្លូវ ។ ចំណែករថយន្តដឹកស្រាបៀរឆេះនៅកណ្តាលទ្រូងថ្នល់តែម្តង ។
ប្រភពដដែលនេះបានបន្តទៀតថា ពេលដែលរថយន្តទាំង២បុកគ្នា និងឆេះភ្លាមៗនោះ ក៏មានរថយន្តបែនដឹកដី១គ្រឿងទៀត បានបើកមកដល់ដែរ ហើយរថយន្តបានព្យាយាមជាន់ហ្វ្រាំងឈប់កុំឱ្យជ្រុលទៅបុករថយន្តហ៊ីយ៉ាន់ដាយ ដែលកំពុងឆេះនៅលើថ្នល់នោះ តែដោយសារមានល្បឿនលឿនហើយបង្ខំជាន់ហ្វ្រាំងទាំងប្រថុចញ៉ុច ទើបធ្វើឱ្យរថយន្តវាត់កន្ទុយផ្ទុះបែកកង់ក្រោយទាំង២ ហើយប្រាស់ខ្លួនដេកច្រងាង នៅលើផ្លូវតែម្តង ដោយពុំបានបុកប៉ះជាមួយរថយន្តនៅខាងមុខទេ ។
លោក នុត ប៊ុនឌឿន អធិការនគរបាលក្រុងព្រៃវែង បានឱ្យដឹងថា ក្រោយកើតហេតុភ្លាម កម្លាំងរបស់លោក និងកម្លាំងស្នងការដ្ឋានបានទៅដល់កន្លែងកើតហេតុ ជួយធ្វើអន្តរាគមភ្លាមៗ ដោយបានប្រើរថយន្តពន្លត់អគ្គិភ័យបាញ់ទឹកពន្លត់ អស់ចំនួន៣រថយន្តទើបអណ្តាតភ្លើងត្រូវបានរលត់ ។ ជាមួយគ្នានោះក៏បានជួយនាំយកជនរងគ្រោះចំនួន៣នាក់នាំទៅសង្គ្រោះនៅឯមន្ទីរពេទ្យផងដែរ ៕
ចែករំលែកព័តមាននេះ