ប្រទេសថៃកាលពីថ្ងៃទី១៩ សីហា បានចេញដីកាចាប់ខ្លួនជនបរទេសម្នាក់សង្ស័យជាអ្នកវាយប្រហារដោយគ្រឿងផ្ទុះនៅក្រុងបាងកក បណ្តាលឱ្យមនុស្សស្លាប់២២នាក់ កាលពីថ្ងៃទី១៧ សីហា រួចចេញផ្សាយរូបរ៉ូបូមួយរបស់ជនសង្ស័យនេះ ព្រមទាំងសុំជំនួយរបស់ប៉ូលិសអន្តរជាតិអាំងទែរប៉ូល ។
យោងតាមដីកានេះចេញដោយតុលាការព្រហ្មទណ្ឌក្រុងបាងកក ជនបរទេសមិនស្គាល់អត្តសញ្ញាណនេះសង្ស័យជាឃាតករចូលរួមដៃជាមួយពួកជនអាក្រក់ ហើយចូលរួមក្នុងការផលិតគ្រាប់បែកច្នៃ ។ ជននេះជាជនបរទេសម្នាក់មាឌខ្ពស់ ស្បែកស ។
ប៉ូលិសគូសបញ្ជាក់ថា រូបគេស្ថិតក្នុងបណ្តាញមួយ និងថា មនុស្ស២នាក់ទៀតដែលថតបានដោយកាមេរ៉ាវីដេអូត្រួតពិនិត្យមុនពេលផ្ទុះ ក៏ជាជនសង្ស័យជួួយដល់អ្នកដាក់គ្រាប់បែកដែរ ។
លើរូបភាពរ៉ូបូជនសង្ស័យផ្សាយដោយប៉ូលិសថៃ បុរសនេះមានវ័យក្មេង សក់ពណ៌ត្នោត ហើយពាក់វ៉ែនតាមានដងខ្មៅ។
យោងតាមអ្នកនាំពាក្យប៉ូលិសជាតិថៃ លោកប្រាវុធ ថាវនស៊ីរី ថា ជនសង្ស័យសំខាន់ឮនិយាយភាសាបរទេសមួយ តែពុំមែនភាសាអង់គ្លេសទេ ។ ជននេះនិយាយភាសាថៃមួយឃ្លា ដែលជាទូទៅសំដៅលើតុងរបស់ពួកអ៊ិស្លាម មានដើមកំណើតនៅអាស៊ីខាងត្បូង អាស៊ីកណ្តាល ឬមជ្ឈឹមបូពា ។
លោកប្រាវុធ បន្តថា ជនសង្ស័យ២នាក់ទៀតឃើញក្នុងរូបភាពនៅជិតជនសង្ស័យសំខាន់ ពេលដែលគេដាក់ថង់ស្ពាយរបស់គេលើបង់មួយ ហាក់ដូចជាពួកគេចង់លាក់មុខពីភ្នែករបស់មនុស្សទាំងឡាយ ។
ប៉ូលិសពុំច្បាស់ដែរ ដែលជនសង្ស័យសំខាន់ស្ថិតនៅលើដែនដីខ្លួននៅឡើយ រួចនាថ្ងៃទី២០ សីហា បានស្នើជំនួយរបស់អាំងទែរប៉ូលឱ្យជួយរកជនបរទេសសង្ស័យនេះ ។ ឧត្តមសេនីយ៍អាពីឆាត ស៊ូរីបូនយ៉ា ប្រមុខកងឯកភាពអាំងទែរប៉ូលប្រទេសថៃ ថ្លែងប្រាប់ AFP ថា លោកក៏ពុំដឹងដែរ តើជនសង្ស័យនេះចាកចេញពីដីថៃរួចហើយ ឬយ៉ាងណា ។ លោកបន្តថា ថៃនឹងស្នើដល់អាំងទែរប៉ូលឱ្យជួយផ្តល់ព័ត៌មានបន្ថែមនានាលើអត្តសញ្ញាណ ប្រភព ឬបណ្តាសកម្មភាពរបស់ពួកជនសង្ស័យ ។
២ថ្ងៃក្រោយការវាយប្រហារ ដែលពុំមានក្រុមណាប្រកាសទទួលខុសត្រូវ ប៉ូលិសថៃពុំអាចកំណត់អត្តសញ្ញាណបុរសសង្ស័យ ដែលឃើញក្នុងកាមេរ៉ាត្រួតពិនិត្យ ។
របបយោធាថៃវាយតម្លៃកាលពីថ្ងៃទី២០ សីហា ថា មិនច្បាស់ដែលការវាយប្រហរនៅក្រុងបាងកកកាលពីថ្ងៃទី១៧ សីហា ជាស្នាដៃរបស់ភេរវកម្មអន្តរជាតិ ខណៈជនបរទេសម្នាក់នេះជាជនសង្ស័យសំខាន់ ។
ក្នុងសង្កថាមួយតាមទូរទស្សន៍ វរសេនីយ៍ឯក វីនថៃ ស៊ូវ៉ារី អ្នកនាំពាក្យរបស់រដ្ឋាភិបាលយោធា និយាយថា វាមិនច្បាស់ដែលនេះជាស្នាដៃរបស់ក្រុមភេរវកម្មអន្តរជាតិមួយ ។ លោកបន្តថា ជនជាតិចិនពុំមែនជាគោលដៅដោយផ្ទាល់នៃការវាយប្រហារឡើយ ។
ក្នុងចំណោមអ្នកស្លាប់ មានជនបរទេស១៣នាក់ ភាគច្រើនជាជនជាតិចិន ដែលនិយមមកកាន់ព្រះវិហារ ERAWAN កន្លែងវាយប្រហារ ។ ក្រៅពីអ្នកស្លាប់ក្នុងចំណោមអ្នករបួសជាង១២០នាក់ រហូតដល់ព្រឹកថ្ងៃទី២០ សីហា ៦៧នាក់ ស្ថិតក្នុងមន្ទីរពេទ្យនៅឡើយ ក្នុងនោះ១២នាក់ស្ថិតក្នុងសភាពធ្ងន់ធ្ងរ ។
ចំណែកប្រមុខប៉ូលិសថៃ លោក SOMYOT POOMPANMOUNG និយាយថា មនុស្សជាង១០នាក់ចូលរួមក្នុងការវាយប្រហារនេះ ។ លោកបញ្ជាក់ថា ការវាយប្រហារត្រូវបានរៀបចំដោយក្រុមនានា ហើយការរៀបចំប្រហែលប្រើពេលជាង១ខែ ។ លោកលើកឡើងពីអ្នករួមគំនិតដែលមានវត្តមាននៅកន្លែងវាយប្រហារគឺមានពួកអ្នកមើលផ្លូវ ពួកអ្នករៀបចំគ្រាប់បែក និងពួកអ្នកដែលជួយ តើត្រូវគេចខ្លួនបែបណា ៕
ចែករំលែកព័តមាននេះ