រាជធានីភ្នំពេញ ៖ អ្នកជំនាញម្នាក់បានលើកឡើងថា ប្រសិនជាអ្នកមានបានបន្តិចបន្តួច នោះកុំទាន់អាល់ភ្លើតភ្លើន ឱ្យសោះ ! ព្រោះការភ្លើតភ្លើននេះអាចត្រឹមមួយរយៈពេលខ្លីប៉ុណ្ណោះ ប៉ុន្តែវេទនាគឺនឹងមានរយៈពេលវែង ។…
រាជធានីភ្នំពេញ ៖ អ្នកជំនាញម្នាក់បានលើកឡើងថា ប្រសិនជាអ្នកមានបានបន្តិចបន្តួច នោះកុំទាន់អាល់ភ្លើតភ្លើន ឱ្យសោះ ! ព្រោះការភ្លើតភ្លើននេះអាចត្រឹមមួយរយៈពេលខ្លីប៉ុណ្ណោះ ប៉ុន្តែវេទនាគឺនឹងមានរយៈពេលវែង ។
ពាក្យថាភ្លើតភ្លើននេះ លោកគ្រូ អួន សារ៉ាត់ ជាអ្នកបណ្តុះបណ្តាលម្នាក់នៅក្នុងក្លិបអ្នកជំនួញឆ្លាត បានបកស្រាយដូចនេះថា «ភ្លេចខ្លួននេះគឺសតិ គឺអារម្មណ៍ចេញពីខ្លួន ហើយវាក៏ចាប់ផ្តើមឈ្លក់វង្វេងពុល ស្រវឹងទៅលើរឿងសប្បាយៗរីករាយៗ ហ៊ឺរហារៗ ហើយទីបំផុតអ្នកខ្លះក៏ត្រូវយំ ! ដោយសារភ្លើតភ្លើនភ្លេចខ្លួន ។ អ្នកខ្លះសប្បាយភ្លើតភ្លើន បានលុយបន្តិចបន្តួចមក ចាប់ផ្តើមដើរលេង គិតតែពីរឿងដើរលេង មានលុយនៅផ្ទះមិនស្ងៀម ខ្លះទៀតភ្លើតភ្លើនបានលុយតិចតួចតាំងដើរប្រមែរប្រមូលមិត្តភ័ក្តប៊នភើន មកស៊ីផឹកប្រូប្រាច អ្នកខ្លះទៀតភ្លើតភ្លើនតែរឿងដើរផ្សារ សម្ភារៈនិយមទិញយ៉ាងពេញទំហឹង ទិញម៉ាចាស់ដៃ ទិញមិនខ្ជីខ្វល់ខ្វាយថាទៅថ្ងៃក្រោយទៅ នឹងវិនាសយ៉ាងណានោះទេ» ។
លោកគ្រូ បន្តថា អ្នកខ្លះទៀតភ្លើតភ្លើនទិញបំណុល កាលដែលប្រាក់ចំណូលនៅតិចដូចមិនសូវអីទេ ដល់ប្រាក់ចំណូលកើនឡើងតែបន្តិច ចាប់ផ្តើមប្រហើនភ្លើតភ្លើនទិញបំណុល បង់រំលស់នេះបង់រំលស់នោះ ឬបង់ផ្តាច់នេះបង់ផ្តាច់នោះ សុទ្ធសឹងតែជារបស់មិនបានរកចំណូលបន្ថែម គិតតែបន្ថែមចំណាយ ហើយការភ្លើតភ្លើនទាំងអស់នឹងហើយគឺជាការត្រួសត្រាយផ្លូវឱ្យទៅរកសេចក្តីវិនាស ទៅរកសេចក្តីអន្តរាយ និងទៅរករណ្តៅ ។
ក្នុងការគ្រប់គ្រងសាច់ប្រាក់ លោកគ្រូ បានណែនាំថា នៅពេលដែលយើងរកបានប្រាក់បន្តិចបន្តួចនឹង នោះគឺជារឿងត្រូវប្រុងប្រយ័ត្នបំផុតក្នុងការចំណាយ យើងគួរតែសន្សំលុយកាក់ដែលបានមកនោះទុកវិនិយោគ ទុករកស៊ី ឬយកលុយទៅបង្កើតប្រភពប្រាក់ចំណូលបន្ថែម ឱ្យបានកាន់តែច្រើនបំផុត ដើម្បីធានាបាននូវស្ថេរភាពហិរញ្ញវត្ថុ ក្នុងរយៈពេលណាមួយដែលយើងមិនអាចធ្វើការងារបាន ឬពេលដែលយើងអវត្តមានពីការងារ ឬក៏ចូលនិវត្តន៍ជាដើមនឹង អញ្ចឹងយើងត្រូវសង្វាតសាងសង់ចំណូលមួយដែលមានស្ថេរភាពនេះ មានន័យថាមិនគួរគិតតែពីបច្ចុប្បន្នទេតែត្រូវគិតដល់អនាគតវែងឆ្ងាយ ។
លោកគ្រូបន្ថែមថា ៖ «អ្នកខ្លះមានហើយប៉ុន្តែបែរជាត្រឡប់ទៅជាក្រវិញក៏មាន នោះក៏ព្រោះតែការភ្លើតភ្លើននេះឯង រីឯអ្នកខ្លះក្រទេក៏អាចទៅជាអ្នកមានបានដែរនោះក៏ព្រោះថាគាត់មិនបានភ្លើតភ្លើន គាត់មានស្មារតីប្រុងប្រយ័ត្នចំពោះក្មេងៗខ្លះដែលគាត់មានទស្សនៈថា “សប្បាយទាន់ខ្លួននៅក្មេង ចាស់ព្រេងទៅលែងសប្បាយកើតហើយ” ទស្សនៈបែបនេះ គឺជាទស្សនៈមួយយល់ច្រលំ យល់ខុស គិតខុស ហើយការគិតខុសនេះគឺជាការគិតខុសមួយធ្ងន់ណាស់ គឺវាអាចធ្វើឱ្យខូចអនាគតតែម្តង ។ ជាការពិតណាស់ មិនមែនយើងសប្បាយឱ្យទាន់ខ្លួននៅក្មេងនោះទេ គឺយើងត្រូវសប្បាយទាំងវ័យកណ្តាល និងនៅពេលដែលយើងចាស់ទៅ ហើយការសប្បាយនោះទៀតសោតគឺត្រូវសប្បាយដោយការឆ្លាតវៃ ប្រកបដោយការយល់ដឹង កុំសប្បាយទាំងល្ងិតល្ងង់ ល្ងីល្ញើរ» ។
លោកគ្រូថា នៅក្មេងអ្វីដែលយើងត្រូវផ្តោតសំខាន់នោះ គឺការសិក្សារៀនសូត្រ ក្រេបយកចំណេះដឹងផ្សេងៗ ដើម្បីកសាងសមត្ថភាព ដើម្បីជាគ្រឹះទៅថ្ងៃមុខ និងការរៀនអប់រំចរិយាមាយាទ ឱ្យបានល្អត្រឹមត្រូវកុំឱ្យក្លាយជាជនចោរម្សៀតដែលញ្ញាត្ត គេខ្លាចនឹងរាប់អាន។ ការប្រតិបត្តិខ្លួននេះគឺត្រូវធ្វើទាន់ខ្លួននៅក្មេង មិនមែនសប្បាយហ៉ឺរហារដើរលេងពារលា ទាន់ខ្លួននៅក្មេងនោះទេ ៕
ចែករំលែកព័តមាននេះ