ខេត្តកំពង់ឆ្នាំង ៖ គ្រួសារមួយរស់នៅភូមិទឹកចេញ ឃុំក្បាលទឹក ស្រុកទឹកផុស បានប្រកបរបរធ្វើចំការដាំដំណាំច្រើនប្រភេទ ធ្វើឱ្យកំរិតជីវភាពបានសមរម្យ ដោយក្នុងនោះ ក្រូចឆ្មាដែលទើបហុចផលចុងក្រោយ បានផលគួរជាទីគាប់ចិត្ត…
ខេត្តកំពង់ឆ្នាំង ៖ គ្រួសារមួយរស់នៅភូមិទឹកចេញ ឃុំក្បាលទឹក ស្រុកទឹកផុស បានប្រកបរបរធ្វើចំការដាំដំណាំច្រើនប្រភេទ ធ្វើឱ្យកំរិតជីវភាពបានសមរម្យ ដោយក្នុងនោះ ក្រូចឆ្មាដែលទើបហុចផលចុងក្រោយ បានផលគួរជាទីគាប់ចិត្ត និងជាដំណាំយូរអង្វែង មិនដូចដំណាំផ្សេងៗទៀត។
លោក ទ្រី គា ជាកសិករបានឱ្យដឹងថា លោកបានដាំដំណាំច្រើនប្រភេទ មានដូចជា ចេក ល្ហុង ត្រឡាច ននោង ស្លឹកគ្រៃ ជាដើម ដោយដំណាំទាំងនោះ វាហុចផលក្នុងរយៈពេលខ្លី ។ ដោយឡែកសម្រាប់ដើមក្រូចឆ្មា គាត់បានដាំរយៈពេល៦ឆ្នាំហើយ ទើបនឹងប្រមូលផល នៅឆ្នាំទី៦នេះ ។មូលហេតុយឺតយូរក្នុងការទទួលផល មកពីគាត់ដាំកូន មិនដាំមែកផ្សាំដែលទទួលផលលឿន តែឆាប់ងាប់ដើមវិញ ។
កសិកររូបនោះបានបន្តថា ផ្ទៃដីចំការគាត់មានទំហំ១ហិកតា៨០អា ដោយក្នុងនោះ គាត់បានដាក់ដាំដើមក្រូចឆ្មាចំនួន៣០០ដើម លើផ្ទៃកន្លះហិកតា ។ សម្រាប់ឆ្នាំទី៦ គាត់អាចបេះក្រូចឆ្មា បានពី៤០០ទៅ៤៥០គីឡូ ក្នុងមួយខែៗ ដែលតម្លៃទីផ្សារ ក្នុងមួយគីឡូលក់បានថ្លៃពី៤០០០រៀល គឺស្មើជាង១លានរៀល ។ប្រាក់ចំណូលនេះបានយកទៅចំណាយទិញប្រេងបូមទឹក ទិញជី និងសល់ប៉ុន្មានសម្រាប់ផ្គត់ផ្គង់ជីវភាពគ្រួសារ បានសមរម្យមួយកំរិតដែរ ។
យ៉ាងនេះក្តី កសិកររូបនោះ បានត្អូញតែពីការធ្វើដំណើរលើផ្លូវលំបាក និងខ្វះខាតអគ្គិសនីប្រើប្រាស់ ព្រោះជាទីជនបទដាច់ស្រយាល ។ លោកសុំស្នើដល់អាជ្ញាធរភូមិឃុំ ជួយអភិវឌ្ឍន៍តំបន់នោះឱ្យមានការរីកផ្លូវថ្នល់ និងអគ្គិសនីផងដែរ។
សូមបញ្ជាក់ដែរថា៖ ភូមិទឹកចេញ ជាភូមិមួយនៅឆ្ងាយដាច់ស្រយ៉ាល មិនទាន់មានការអភិវឌ្ឍន៍ ផ្លូវ និងអគ្គិសនីនៅឡើយនោះទេ គឺជាភូមិមួយជាប់នឹង ភូមិអមលាំង ខេត្តកំពង់ស្ពឺ ។
ចែករំលែកព័តមាននេះ